عاشورا مراسمی نینگ یولگه قوییلشی عرفه‌سیده، کابل ده تکیه‌خانه‌لر و مسجد‌لر مسئوللریدن قطاری عزادارلیک مراسمی نینگ امنیتی تامین‌لنیشی خصوصیده خواطر بیلدیرگنلر. مملکت‌ده ناتینچ‌لیک و ثبات‌سیزلر سبب، اوتمیش ییل‌لر گه قره‌گنده شیعه مذهب‌لر سانی تکیه‌خانه‌لر و مسجد‌لرده کمه‌یگن دیر.
اوشبو مراسم نینگ یولگه قوییه‌دیگن مسئوللر نینگ سلام‌وطندار گه ایتیشلریچه، بو ییل اوتمیش ییل‌لر گه قره‌گنده، کوپراق ناتینچ‌لیک بیلن روپه‌ره بولگنلر. اولر گه کوره، اسلامی امارت محل یشاوچیلری بیلن ناآشنا بولگنی باعث، عاشورا کونی‌ده تکیه‌خانه‌لر و مسجد‌لر امنیتی نی تامین قیله آلمهیدی.
مردمی عزادارلیک ستاد مسئوللری نینگ ایتیشلریچه، اسلامی امارت امنیت نی تامین‌لش خصوصیده تجربه‌سی یوق و درست بیر شکلده بویوک عزادارلیک مرکزلر امنیتی نی تامین قیله آلمهیدی.
تکیه‌خانه‌لر و مسجد‌لر مسئوللری اسلامی امارت‌دن امنیت تامین‌لنیشی خصوصیده، اهالی گه اوز امنیت‌لری نی تامین‌لش اوچون رخصت بیریلیشی نی ایسته‌گنلر.
بیزلرنینگ فیسبوک صحیفه‌میزگه باش اورینگ!
کابل غربی‌ده عاشورا مراسمی نینگ یولگه قوییه‌دیگن مسئوللردن بیری محمد احسان نینگ سلام‌وطندار گه ایتیشیچه: «قیغو بیلن بو ییل اوتمیش ییل‌لر گه قره‌گنده، کوپراق امنیتی قیینچیلیکلر بیلن روپه‌ره بولگن‌میز.»
شونینگدیک کابل غربی‌ده عاشورا مراسمی نینگ یولگه قوییه‌دیگن مسئوللردن باشقه بیری علی آقا عطایی نینگ سلام‌وطندار گه ایتیشیچه: «عایله‌لر نینگ اسلامی امارت گه ایشانچ‌لری یوقلیگی سبب، فرزند‌لری نی تکیه‌خانه‌لر گه یوبارمه‌یدیلر، چونکه اسلامی امارت دوست و دشمن نی فرق قیله آلمهیدی. انه‌شوو سبب، بو ییل عزادارلر سانی کمه‌یگن دیر.»
باشقه بیر تاماندن، اهل تشیع یشاوچیلری نینگ سلام‌وطندار گه ایتیشلریچه، بو ییل اوتمیش ییلر گه قره‌گنده امنیت‌لری درست بیر شکلده تامین بولمه‌گن. عزادارلردن محمد علی نینگ ایتیشیچه: «امنیت اوتمیش ییل‌لر گه قره‌گنده آز دیر. اوتمیش ییل یخشی ایدی، لیکن بو ییل امنیت درست بیر شکلده آلینمه‌گن.»
عزادارلردن باشقه بیری حسین نینگ ایتیشیچه: «اسلامی امارت بو ییل تازه کار دیر او یوزدن بیراز تجربه آلیشی گه قدر قیینچیلیکلر نینگ کوپه‌یشی ممکن.»
شو بیلن بیرگه، اولکه یشاوچیلری و مردمی عزادارلیک ستادی عین‌حالده خواطر بیلدیرماقده که، اوتگن کون کابل شهری نینگ آلتینچی ناحیه‌سی حدودلری سرکاریز منطقه‌سیده اویوشتیریلگن پارتلش ده ۸ کیشی هلاک بولیب و باشقه ۱۸ کیشی یره‌لندی؛ تصدیقلنمه‌گن گزارش‌لر اساسیده مذکورهجوم ده ۵۰ دن آرتیق کیشی اولیب و یره‌لنگن.
شونده‌ی بیرحالده، اوشبو پارتلش کوپینچه ایچکی و تشقی عکس‌العمل‌لر بیلن روپه‌ره بولگن. ینگی‌لیکده ایران جمهور رئیسی ابراهیم رییسی اوشبو واقعه گه قرشی عکس‌العمل کورستیب و مذکور هجوم عامل‌لری نی یزیدی‌لر دیگن و اسلامی امارت‌دن جنایت‌چیلر نی تانیب و افغانستان اهالی‌سی نینگ امنیتی نی تامین‌لنیشی ایسته‌گن.
اروپا بیرلشمه‌سی اوشبو هجوم نی قاره‌لب و ایتگن که، اسلامی امارت هزاره‌لر شامل افغانستان اهالی‌سیدن برچه‌سی نی بو کبی هجوم‌لر برابریده حفاظت قیلیشی کیره‌ک.
بیزلرنینگ توییترده هم تعقیب قیلینگ!
بیرلشگن ملت تشکیلاتی‌ده افغانستان دایمی نماینده‌لیگی سرپرستی نصیراحمد فایق هم اوشبو واقعه خصوصیده عکس‌العمل کورستیب و ایتگن که، افغان‌لر هم مملکت‌ده و هم مملکت‌دن تشقی‌ده امنیت‌لری یوق. فایق کابل نینگ غربی گه اویوشتریلگن هجوم نی هزاره‌لر نینگ اولدیریلیشی دیب و تیزلیککه بو کبی هجوم‌لر آلدی آلینیشی نی ایسته‌گن.
مذکور عکس‌العمل‌لر دوامی ده مملکت نینگ سابق جمهور رئیسی حامد کرزی، اوشبو هجوم نی انسانیت گه قرشی دیگن. شونینگدیک سابق دولت اجراییه رئیسی عبدالله عبداله مذهبی ییرلر گه ایوشتیریله‌دیگن هجوم‌لر نی بخشش بولینمه‌گن جنایت دیگن.
ایتیش کیره‌ک که، اوتگن کون کابل ده اویوشتیریلگن هجوم مسئولیتی نی داعش گروهی بوینیگه آلگن دیر.
عاشورا مراسمی امنیتی نینگ قنده‌ی تامین‌لنیشی خصوصیده، اسلامی امارت سوزلاوچی اورین باسری و کابل امنیه قوماندانلیگی سوزلاوچیسی نینگ فکرلری نی آلیش ایسته‌دیک، لیکن کیین‌مه کیین قونقیراغ بیلن موفق بولمه‌دیک.
