با آن‌که روز گذشته شماری از رسانه‌های کشور از فرار شهروندان قرقیز از پامیر بدخشان به تاجیکستان گزارش دادند، اما منابع محلی در بدخشان می‌گویند که مرزبانان تاجیکستان اجازۀ ورود به این خانواده‌ها را نداده‌اند.

طلب‌الدین قادری، معاون شورای ولایتی بدخشان به سلام‌وطندار می‌گوید، مرزبانان تاجیکستان به این خانواده‌ها گفته‌اند که این کشور تنها مسئولیت انتقال افراد مجرد را تا بلخ برعهده گرفته است.

به گفتۀ آقای قادری، هم‌اکنون این شمار خانواده‌ها دوباره به محل زنده‌گی‌شان برگشته‌اند. او می‌افزاید که هیچ خانوادۀ قرقیزی نتوانسته وارد خاک تاجیکستان شود.

سلام‌وطندار فارسی را در فیس‌بوک دنبال کنید

روز گذشته شماری از رسانه‌های کشور به نقل از خبرگزاری دولتی تاجیکستان/خاور گزارش دادند که ۷۷ شهروند قرقیزی‌تبار کشور از ترس طالبان از پامیر بدخشان به تاجیکستان پناه برده و وارد روستای قیزیل‌_ربات ناحیۀ مرغاب تاجیکستان شده‌اند.

قرقیزهای ساکن پامیر بدخشان از اقلیت‌های قومی ساکن در بدخشان‌اند و پیوسته از بی‌توجهی دولت شاکی بوده‌اند. آنان در مرتفع‌ترین منطقۀ بدخشان زنده‌گی می‌کنند و از دست‌رسی‌نداشتن به خدمات صحی، آموزشی و حمل‌ونقل شکایت دارند و حکومت افغانستان هنوز نتوانسته به مشکلات آن‌ها پاسخ بدهد.

سلام‌وطندار را در یوتیوب دنبال کنید

چندی پیش شماری از باشنده‌گان این منطقه به سلام‌وطندار گفته‌ بودند که اگر دولت به مشکلات آن‌ها رسیده‌گی نکند، مجبور اند افغانستان را ترک کنند و به کشورهای همسایه مهاجر شوند.

ادارۀ محلی بدخشان دربارۀ پناه‌بردن ساکنان ناحیۀ پامیر بدخشان به تاجیکستان اظهار بی‌خبری می‌کند.

ولسوالی واخان بدخشان که قرقیزها در بخشی از آن ساکن‌اند، در روزهای پسین به‌دست طالبان سقوط کرد و مسئولان محلی ولسوالی و نیروهای مستقر در این ولسوالی به تاجیکستان فرار کرده بودند.

مرتبط با این خبر:

به اشتراک بگذارید:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
تحلیل‌های مرتبط

اخبار و گزارش‌های سلام وطن‌دار را از شبکه‌های اجتماعی دنبال کنید: