ذبیح‌الله مجاهد، سخن‌گوی امارت اسلامی، در واکنش به گفته‌های رییس‌جمهور تاجیکستان، مبنی بر بدل‌شدن ولایت‌های شمالی افغانستان به محل پرورش تروریستان بین‌المللی، آن را بی‌اساس خوانده و می‌گوید که برای رفع این نگرانی، خواهان گفت‌وگو با تاجیکستان است.
مجاهد، امروز (شنبه، ۱۳ جوزا) به سلام‌وطندار گفت: «رؤسای جمهور کشورها، نباید در این مسٔله دامن بزنند ما خواهان گفت‌وگو با آن‌ها استیم و به آن‌ها اطمینان می‌دهیم که استراتژی امارت، هم همین است که به هیچ کشور زیان وارد نمی‌شود.»
سلام‌وطندار فارسی را در فیسبوک دنبال کنید
ذیبح‌الله مجاهد هم‌چنان می‌گوید که بحث تشکیل حکومت فراگیر و تأمین حقوق زن، موضوع داخلی افغانستان است و کشورهای منطقه و جهان، نباید به آن دخالت کند.
شرکت‌کنندگان دومین نشست سران آسیای میانه و کشورهای اتحادیه‌ی اروپا که روز گذشته –جمعه، ۱۲ جوزا- در قیرقیزستان برگزار شده بود، بر تشکیل حکومت فراگیر، تأمین حقوق زنان و مبارزه با تروریزم در افغانستان تأکید کرده اند.
سلام‌وطندار فارسی را در تویتر دنبال کنید
امام‌علی رحمان، رییس‌جمهور تاجیکستان، در این نشست گفت که افغانستان به ویژه ولایت‌های شمالی آن، به محل پرورش تروریستان بین‌المللی تبدیل شده است. او، افزوده است: «در شرایط کنونی افغانستان، اتخاذ اقدامات مشترک برای مبارزه با تهدید گسترش تروریزم، افراط‌گرایی، جرایم سایبری، قاچاق مواد مخدر و اسلحه مهم است.»
این در حالی است که هفته گذشته، تاجیکستان به علت افزایش نگرانی‌هایش از فعالیت گروه‌های هراس‌افکنی در افغانستان، در هم‌مرزی این کشور، دو پاسگاه ساخته است.
