ارگ ریاست‌جمهوری می‌گوید که افغانستان و تاجیکستان پنج تفاهم‌نامۀ همکاری را در بخش‌های مختلف امضا کرده‌اند. این تفاهم‌نامه‌ها در جریان سفر محمداشرف غنی، رئیس‌جمهور به تاجیکستان امضا شده است. آقای غنی و امام‌علی رحمان، رئیس‌جمهور تاجیکستان هنگام امضای این تفاهم‌نامه‌ها حضور داشته‌اند.
طبق خبرنامۀ ارگ ریاست‌جمهوری، این تفاهم‌نامه‌ها در بخش‌های سیاسی، امنیتی، تجارتی، ترانزیتی، ترانسپورتی، انرژی و فرهنگی امضا شده است. در خبرنامه نیز گفته شده است که رئیسان جمهور دو کشور اعلامیۀ مشترک نشست دو جانبۀ افغانستان و تاجیکستان را امضا کرده‌اند.
محمداشرف غنی صبح امروز (دوشنبه، نهم حمل/فروردین) در رأس یک هیأت عالی‌رتبۀ دولتی در یک سفر رسمی دو روزه به تاجیکستان رفت. هدف از سفر آقای غنی شرکت و سخنرانی در نهمین دور نشست وزیران خارجۀ «قلب آسیا_روند استانبول» گفته شده است.
این نشست قرار است فردا سه‌شنبه با حضور وزیران خارجۀ ۱۴ کشور و رئیسان جمهور افغانستان و تاجیکستان برگزار شود. وزیران خارجۀ افغانستان و تاجیکستان به طور مشترک ریاست این نشست را برعهده خواهند داشت.
تقویت اجماع منطقه‌یی دربارۀ صلح افغانستان و توسعۀ هم‌کاری‌های سیاسی، امنیتی و اقتصادی میان کشورهای منطقه از موضوع‌های اصلی بحث در این نشست خواهد بود.
