افغانستان ده بیرلشگن ملت‌لر تشکیلاتی نینگ خلق‌ارا آزیق-آوقات دستوری، بوگون (چهارشنبه، ۱۹-میزان)، هرات ولایتی نینگ زلزله یوز بیرگن منطقه‌لریدن ویدیو ترقه‌تیش بیلن ایتیشیچه، مذکور یوز بیرگن زلزله‌ده تیریک قالگنلر، کیچه‌لر نی ویرانه‌لرده اوتکزیب و باش‌پنه‌سیز قالگنلر.
افغانستان ده بیرلشگن ملت‌لر تشکیلاتی خلق‌ارا آزیق-آوقات دستوری نینگ رابطه‌لر بولیمی مسئولی فیلیپ کروف، بوگون مذکور دستور نینگ «ایکس» صحیفه‌سیده ترقه‌تیلگن ویدیو‌ده ایتیشیچه، هرات ده تورت کون آلدین یوز بیرگن کوچلی زلزله‌ده تیریک قالگنلر، آچ و قورقوو بیلن حیات کیچیرماقده.
فیلیپ نینگ کوپه‌یتیریشیچه: «مین بوییرده اوتکن نیچه کون ایلگری‌ده‌گی زلزله عاقبتیده بوتونله‌ی نابود ایتیلگن قشلاققه من، بو زلزله عاقبتیده یوزلرچه کیشی اولیب و مینگ‌لرچه کیشی هم یره‌لنگن، تیریک قالگنلر هم ایسه قورققن همده آچ دیر، کوپلب کیشی باش پنه‌سیز ساووق کیچه‌لرنی آچیق جای‌لرده اوتکزه‌دیلر.»
بیزلرنینگ «ایکس» ترماغی ده هم تعقیب قیلینگ!
باشقه بیر تامان‌دن، بیرلشگن ملت‌لر تشکیلاتی نینگ انسان‌پرورلیک یاردم‌لر نی هماهنگ قیلووچی دفتری (اوچا)، شونینگدیک اوتگن کون کیچ قورون اوشبو نهاد نینگ «ایکس» صحیفه‌سیده بیر گزارش ترقه‌تیش بیلن ایتیشیچه، هرات ده یوز بیرگن سونگی زلزله‌لرده ۱۲ مینگ‌دن آرتیق کیشی زیان کورگن.
مذکور نهاد نینگ «ایکس» صحیفه‌سیده کیلیشیچه: «هرات ولایتی نینگ بیش تومنیده ۱۷۳۰ عایله شامل، ۱۲۱۱۰ کیشی نینگ زلزله عاقبتیده زیان کورگنی تخمین ایتیله‌دی. زنده جان تومنیده اوی‌لردن یوز فایزی ویران بولگن بو تومن زلزله‌دن اینگ آغیر زیان کورگن منطقه دیر، ۱۹۱ ایرکک و ۲۹۴ عیال شامل ۴۸۵ کیشی زلزله‌ده یوقالگن دیر. شونینگدیک ۳۳ همراه‌سیز باله، ۱۷ قرری انسان و همده ۵۳ عیال عایله سرپرستی، تانیلگن.»
مذکور گزارش‌ده اوچا نینگ اورغولشیچه، تیریک قالگنلر، عاجل باش پنه، ایچیملیک سوو، آزیق-آوقات و کییم-کیچککه نیازلری بار. شونینگدیک تیریک قالگنلر قیین‌چیلیک‌لری نینگ حل بولمه‌گنیدن شکایت قیله‌دیلر.
هرات ولایتی زنده‌جان تومنیده یوز بیرگن زلزله‌ده تیریک قالگن‌لردن فاطمه، ثریا و بی‌بی‌کو نینگ ایتیشلریچه، حاضرگچه دستلبکی نیازلری گه قول تاپه آلمه‌گنلر. فاطمه نینگ ایتیشیچه: «خیمه‌میز یوق، صابون و شامپو، گاز و چای و هیچ نرسه‌میز یوق.»
ثریا نینگ ایتیشیچه: «زلزله بولدی، اوی چپه بولدی، ایکی شهیدی‌میز بار. باشقه یقین‌لریمیز کسل‌خانه‌ده دیر. کسل‌خانه‌دن کسلی‌میز یانیدن کیلگنیم گه قدر، خیمه‌میز نی آلیب کیتگن ایکنلر. باشقه حاضرگچه هیچ قنده‌ی یاردم قولگه کیلتیرمه‌گنمیز.»
شونینگدیک بی‌بی‌کو نینگ ایتیشیچه: «زلزله بولگنی گه قدر، هیچ نرسه ییگنیمیز یوق. زلزله بولگن کون، چای ایچگن ایدیم.»
بو بیلن بیرگه، ساغلیق‌نی سقلش وزیرلیگی سرپرستی قلندر عباد، بوگون بیر یولگه قوییلگن بیر ییغین‌ده، هرات ده زلزله عاقبتیده زیان کورگنلر نینگ درمانلنیشی اوچون اوشبو وزیرلیک نینگ مکمل تیارگرلیگی و امکانیتی‌دن خبر بیرگن.
بیزلرنینگ فیسبوک صحیفه‌میزگه باش اورینگ!
ساغلیق‌نی سقلش وزیرلیگی سرپرستی نینگ ایتیشیچه: خیمه شکلی‌ده، ساغلیق تیم‌لر نی ایجاد قیلگن‌میز. هیلپ موبایلی نینگ قریب ۵۲ کمکی تیمی منطقه گه ییتیشگن که، مکمل امبولانس‌لر، شفاکارلر، قابله و نرس‌لر ایکن دیر. حاضر هم منطقه‌لر نی تقسیم و ساغلیق تیم‌لر نی جایلشتیرگن‌میز. ۶۰ ساغلیق تیمی‌میز بار که کسل‌لر نینگ قیین‌چیلیک‌لری نی حل قیله‌دیلر و ۵۰-۶۰ امبولانسی‌میز بار.»
عامه ساغلیق‌نی سقلش وزیرلیگی سرپرستی نینگ اورغولشیچه، هرات ده زلزله‌دن تیریک قالگنلر گه پاک ایچیملیک، درست ییگولیک ماده و باش پنه تیارلش اوچون، سعی و حرکت‌لر نینگ دوامی بار.
عین حالده، شونینگدیک بوگون ایرتنگ چاغی هرات نینگ شمالی‌ده جایلشگن منطقه‌لرده ۶.۳ درجه ریشترلیک زلزله یوز بیرگن که، ساغلیق‌نی سقلش وزیرلیگی گه کوره، اوشبو زلزله نتیجه‌سیده، حاضرگچه ۱۳۰ کیشی یره‌لنیب، بیر کیشی اولیب و یشش اوی‌لردن کوپینچه ویران بولگن.
