افغانستان تینچلیگی بوییچه آمریکا خاص نماینده‌سی زلمی خلیل‌زاد، قطر ده طالبان دفتری باشلیغی و سیاسی اورین‌باسری ملا عبدالغنی برادر و افغانستان مذاکره قیلووچی تیم اعضالریدن قطاری بیلن اوچره‌شگن.
بوگون (جمعه ۱۰- ثور) طالبان سیاسی دفتری سوزلاوچیسی محمدنعیم بیر توییت آرقه‌لی یازیشیچه، جناب خلیل‌زاد اوتگن کون پنج‌شنبه توشدن کیین ملابرادر بیلن اوچره‌شگن.
اونگه کوره، ایکی تامان افغانستان حاضرگی وضعیتی، جاری تینچلیک پروسه‌سی و مذکور پروسه گه تیگیشلی موضوعلر حقیده صحبت اوتکزگن.
عین حالده، افغانستان اسلامی جمهوریتی نینگ تینچلیک مذاکره قیلووچی هیأتی بیر توییت آرقه‌لی یازیشیچه، بو هیأت اعضالری و خلیل‌زاد آره‌سیده اوتکزیلگن سوزلشووده ایکی تامان افغانستان تینچلیک پروسه‌سی خصوصیده بحث و صحبت قیلیشگن.
مذکور هیأت نینگ کوپه‌یتیریشیچه، جناب خلیل‌زاد افغانستان تینچلیک پروسه‌سی تیزلشتیریلیشی خصوصیده آمریکا نینگ اقدامی توغریسیده صحبت بیریش گه علاوه، ینه بیر مرته مذکور مملکت افغانستان دولتی و ملتی دن حمایت قیلیشی حقیده ایشانچ بیرگن.
افغانستان تینچلیگی بوییچه آمریکا خاص نماینده‌سی دوحه ده افغانستان مذاکره قیلووچی هیأتی بیلن صحبت اوتکزگن بیرحالده، نیچه پیتدن بویان بو هیأتلر آره‌سیده سوزلشوولر توخته‌تیلگن ایدی.
گرچند دوحه سوزلشوولری تیزلشتیریلیشی اوچون ۲۴- اپریل ده ترکیه، بیرلشگن ملتلر تشکیلاتی و قطر میزبانلیگیده استانبول ده بیر ییغین یولگه قوییلیشی گه قرار قیلینگن ایدی، بیراق طالبان نینگ شرکت قیلمه‌گنی باعث بو ییغین فطر بیره‌می دن کیین گه قالدی.