قیش موسومی ییتیب کیلیشی و یاغینگرچیلیکلر باشلنگنی بیلن بیرگه، کابل ده ایشچیلردن قطاری، ایش فرصتلری کمهیگنیدن خواطر بیلدیرگنلر. اولرنینگ ایتیشلریچه، هوا ساووق بولیشی همده قوریلیش ایشلری و خذمت کورسهتیش فعالیتلری توختهتیلیشی یا-ده کمهیشی، کونلیک ایش زمینهسینی چیکلهب و اولرگه حیاتنینگ دستلبکی نیازلری تامینلنیشینی قیینلشتیرگن.
کابل یشاوچیسی و توقیز کیشیلیک عایله سرپرستی بولمیش ۵۰ یاشر محمد مبیننینگ ایتیشیچه، ۲۰ ییلدن بویان هر کونی دیوارلرنی رنگ قیلیش بیلن درآمد قولگه کیلتیریش فرصتینی کوتیب تورگن. اونینگ کوپهیتیریشیچه، هوا ساووق بولگنی بیلن یالغیز بیر کون ایشله آلگن و قولگه کیلتیرهدیگن درآمد عایله نیازلرینی تامینلش اوچون ییترلی ایمس. «بیر آیده یالغیز بیر کون ایشله آلدیم، بیراق مجبورمیز. توقیز کیشیلیک بیر عایله سرپرستیمین. ایش یوق و درآمد یوق. مجبور دوستلردن قرض آلسم که ایش تاپیلگنی صورتده، ایشلب و قرضلرینی قیته بیرسم.»
ایشچیلردن باشقه بیری غلام ایشان، ایرتنگدن آخشمگچه قودوق قازیش بیلن عایلهسیگه بیر لقمه نان تاپیش اوچون سعیوحرکت قیلهدی. کابلنینگ حاجی یعقوب تورت یولیده اولتیرگن غلام ایشاننینگ ایتیشیچه، کوپینچه پیت ایش تاپه آلمهی ناامید بولیب اوییگه قیتهدی. «هیچ ایش یوق، حاضر یاغینگرچیلیک بولگنی بیلن خو اصلا ایش یوق. الله گه توکل قیلیب کیلهمیز که بیران ایش تاپیلسه دیب، لیکن هیچ ایش یوق. شونچه قیلهمیز که تیریک قالسهک. ایکی هفتهده بیر-ایکی مرته ایش تاپیلهدی.»
شونینگدیک اوی قوریلیش ایشلریده ایشلهیدینگن ۵۵ یاشر محمد صادقنینگ ایتیشیچه، ایش یوقلیگی و یاغینگرچیلیک، اونینگ قیینچیلیکلرینی ایکی برابر قیلگن. او، ایشچیلر وضعیتی یخشیلنیشی و ایش فرصتلری یرهتیلیشی اوچون حکومت تامانیدن توجه قیلینیشینی سورهگن. «ایش یوق، آیده بیر مرته هم ایشگه کیتمهیمیز. بیر ییلدن بیری اوی کرایهسینی بیرگنیم یوق. دولتده، اهالیگه ایش تاپیلیشینی ایستهیمین که مصروف بولهیلیک و اویگه بیر لقمه حلال نان آلیب بارهیلیک.»
شونینگدیک اقتصادی ای بیلرمانلردن قطاری، ایش یوقلیگی و اینیقسه قیش موسومیده ایشچیلر ایشی کمهیشینی، مملکتده قشاقلیک کوچهیشی اصلی عامللریدن بیری دیگنلر.
اقتصادی ایش بیلرمانلردن عبدالوافع نایبزینینگ ایتیشیچه: «افغانستان ده قیش موسومیده ایشچیلرنینگ ایش تاپه آلمسلیگی، عایلهلری درآمدینینگ کیسیلیشی یا-ده کمهیشیگه سبب بولهدی و بو مستقیم شکلده قشاقلیک کوپهیشیگه سبب بولهدی، چونکه عایلهلرنینگ درآمدی کم دیر و پول ییغه آلمهیدیلر که نتیجهده، آزیق-آوقت امکانیتلری آز بولهدی و آزیق-آوقت خوفسیزلیگی کوچهیهدی. بو وضعیت قشاقلیک چرخهسینی چقورراق قیلهدی و عایلهلرنینگ جبرلنیشینی کوپهیتیرهدی.»
بیرلشگن ملتلر تشکیلاتینینگ انسانسیورلیک یاردملرنی هماهنگ قیلووچی ادارهسی (اوچا)، میلادی ۲۰۲۶-ییلده افغانستان یشاوچیلریدن ۲۱ میلیون ۹۰۰ مینگ تهسینینگ انسانسیورلیک یاردملرگه نیازمند بولیشینی معلوم قیلگنی بیرحالده، مملکت یشاوچیلریدن قطاری قشاقلیک و ایش یوقلیگیدن شکایت قیلگنلر.
