پاکستان جنگریلری ۲-حوت، شنبه کیچه ساعت ۱۱:۰۰ اطرافیده، ننگرهار ولایتی بهسود، خوگیانی و غنیخیل تومنلریده نیچه یشش اوی همده پکتیکا ولایتی ارگون تومنیده بوش اوی و برمل تومنیده دینی بیر مدرسهنی بمباردمان قیلگن.
پاکستان اطلاعات و نشرات وزیرلیگینینگ ایتیشیچه، بو، قصاصکارانه حرکت بولیب و اونده چیگره حدودلریده پاکستان طالبلر تحریکی یا-ده تیتیپینینگ ییتی قرارگاهینی نشانگه آلگنلر.
لیکن اسلام امیرلیگی، پاکستان ادعاسینی رد قیلیب، اوشبو هجوملرنی افغانستان توپراغیگه تجاوز دیب و ایتیشیچه، مذکور هجوملر نتیجهسیده عیاللر و بالهلر شامل اونلب تینچاهالی نشانگه آلینگن.
شونینگدیک اسلام امیرلیگی ملی مدافعه وزیرلیگی، بیر بیانیه آرقهلی بو هجوملرنی قارهلب، پاکستان گه مناسب وقتده مناسب و اویلنگن جواب بیریلیشیدن آگاهلنتیرگن. بو توغریده ملی مدافعه وزیرلیگی سوزلاوچیسی عنایتالله خوارزمینینگ ایتیشیچه: «ملی مدافعه وزیرلیگی، بو جنایتنی جدی شکلده قارهلهیدی و بو اقدامنی مملکت ملی حدودی، خلقارا قانونلر، قوشنیچیلیک اساسلری و اسلامی ارزشلرنی بوزیش بیلهدی. ملی مدافعه وزیرلیگی مملکت حدودینی سقلش و اهالی امنیتینینگ تامینلشنی شرعی و ملی مسئولیت بیلهدی. مناسب وقتده، مناسب و اویلنگن جواب قیتریلهدی.»
ملی مدافعه وزیرلیگینینگ کوپهیتیریشیچه، تینچاهالی و دینی مرکزلرنینگ نشانگه آلینیشی، «پاکستان اردوسینینگ استخباراتی و امنیتی موفقیتسیزلیگی» نی کورستهدی و بو کبی اقداملر مذکور مملکتدهگی ایچکی موفقیتسیزلیکلرنی یاشیره آلمهیدی.
حاضرگچه اسلام امیرلیگی رسمی شکلده، پاکستان هجوملری نتیجهسیده شهید بولیب و یرهلنگنلر سانی توغریسیده بیللی آمار ارائه قیلمهگن، لیکن ننگرهار پولیس قوماندانلیگی سوزلاوچیسینینگ ایتیشیچه، پاکستان کوچلرینینگ شنبه کیچه ننگرهار گه اویوشتیرگن هوا هجوملری نتیجهسیده، بیر عایلهنینگ ۲۳ اعضاسی ویرانهلر آستیده قالیب و حاضرگچه اولردن ۵ تهسی ویرانهلر آستیدن چیقریلگن.
شوندهی بیرحالده، افغانستان توپراغینینگ بیر قطار بولیملریگه پاکستان هجوملری، بیر قطار ایچکی و تشقی عکسالعمللر بیلن هم روپهره بولگن.
مملکت سابق جمهور باشلیغی حامد کرزی، ننگرهار و پکتیکا گه پاکستاننینگ هجوملرینی قارهلب و اونی افغانستان ملی حاکمیتینینگ بیللی شکلده بوزیش دیگن. جناب کرزی، قربانلر عایلهلری بیلن همدردلیک بیلدیریب و ینه بیر مرته پاکستان دن، افغانستان برابریدهگی سیاستلرینینگ کوریب چیقیشی و یخشی قوشنیچیلیک یولینینگ توتیشینی سورهگن.
افغانستان سابق دولتی ملی یرهش عالی کینگش باشلیغی عبدالله عبدالله، اوتگن کیچه افغانستان توپراغیگه پاکستاننینگ اویوشتیرگن هجوملرینی قارهلب و ایتیشیچه، بو کبی حرکتلر ثباتسیزلیک و بحران کوچهیشیگه سبب بولهدی. اونینگ کوپهیتیریشیچه، بمباردمان قیلیش، تینچاهالینی نشانگه آلیش و زورهوانلیک حل یولی ایمس؛ ایکی مملکت آرهسیدهگی قیینچیلیکلرنی حل قیلیش اوچون اینگ یخشی یول، صحبت قیلیش دیر.
خلقارا انسان حقلری موسسهسی، بو هجوملرنی انسانسیورلیک خلقارا قانونلرنینگ جدی شکلده بوزیش دیب، مستقل تدقیقات بولیش و عامللرینینگ جوابگرلیککه تارتیلیشینی سورهگن.
شونینگدیک بیلرمانلرنینگ ایتیشیچه، افغانستان ده تینچاهالیگه پاکستان آرقهلی هجوملر دوامی، ایکی مملکت آرهسیده توقنشوولر کوچهیشیگه سبب بولهدی. سیاسی ایش بیلرمانلردن مطیعالله آرینپور و عبدالصادق حمیدزوینینگ ایتیشیچه، مذکور کیسکینلیکلر، منطقهدهگی کوچلی مملکتلر و اسلامی همکارلیکلر تشکیلاتینینگ واسطهچیلیگی بیلن مذاکره یولیدن حل بولیشی ممکن.
سیاسی ایش بیلرمان مطیعالله آرینپورنینگ ایتیشیچه: «امنیت، اقتصاد و اجتماعی نقطهی نظریدن بو هجوملر چیگره منطقهلرده ثباتسیزلیککه سبب بولهدی و دیپلماتیک علاقهلر کوپراق باسیم آستیده قالهدی. ایشانچسیزلیکلر اورته گه کیلهدی. کیلیشووگه ییتیشیش یولی مذاکره و ایشانچ یرهتیش دیر. اسلامی همکارلیک تشکیلاتی بو قسمتده مهم اورینگه ایگه بوله آلهدی.»
سیاسی ایش بیلرمانلردن باشقه بیری عبدالصادق حمیدزوینینگ ایتیشیچه: «پاکستان منطقهده اوروشنی سقلماقچین که چین و روسیهنینگ اقتصادی پلانلری عملگه آشیریلمسه. بو مرته پاکستان گه جدی شکلده جواب بیریلیشی کیرهک.»
سونگی تورت ییلده، اسلامآباد افغانستان توپراغیدن پاکستان طالبلر تحریکینینگ چیگرهلردن تشقری فعالیتلرینی ادعا قیلگن که بو ادعالر، دایم اسلام امیرلیگی تامانیدن رد بولگن.
سونگی آیلرده، پاکستان چیگره حدودلریگه هجوملر کوپهیشی بیلن، افغانستان برابریده بو مملکتنینگ امنیتی یاندهشووی تغییر قیلیب و بو وضعیت، بعضا قوراللی توقنشوو، چیگرهلر یاپیلیشی و ایکی تامان آرهسیده دیپلماتیک باسیملر کوپهیشیگه سبب بولگن که، چیگره ثباتی و منطقهای همکارلیکلرگه هم تاثیر قیلگن.
