ایران بیلن امریکا و اسرائیل اورتهسیده ۱۸ کوندن بیری اوروش دوام ایتماقده ایکن، اوزبیکستان اوشبو مملکتده راکته و هوا هجوملر عاقبتیده جبرلنگنلر گه آزیق-آوقت و طبی واسطهلردن عبارت انسان پرورلیک یاردم یوبارگن.
اوزبیکستان ییتکرمهلرینینگ معلوماتیگه کوره، بو یاردملر ۲۵ حوت/۱۶ مارچ، دوشنبه کونی یوباریلگن و ایراننینگ شمالشرقیده خراسان رضوی ولایتی تومنلریدن بیری درگز شهریده رسمیلر گه تاپشیریلگن.
اوزبیکستان تامانیدن یوباریلگن انسان پرورلیک یاردملر آزیق-آوقت محصولاتلری و طبی واسطهلردن عبارت ایکنلیگی ایتیلگن.
معلوم قیلینیشیچه، یاردم ترکیبیدن اون، گوروچ، شکر، مکران محصولاتلری، کونگهباقریاغی و تورلی کنسرولر کبی آزیق-آوقت محصولاتلری، شونینگدیک دارو واسطهلری همده طبی بویوملر اورین آلگن. بیر نیچته یوک موترلریده جونهتیلگن انسان پرورلیک یوکی الهقچان منزل گه ییتکزیلگن.
ایسلهتیب اوتهمیز، امریکا و اسرائیل، قویاش ۱۴۰۴ ییل، ۹ حوت/۲۸ فبرور کونی ایران گه قرشی قوشمه شکلده هجوم قیلدی، بیراق ایران بو هجوملرنی جوابسیز قالدیرمهدی. تهران اسرائیل و منطقهدهگی امریکا حربی پایگاهلریگه راکتهلر یوللـهدی. قطر، بحرین، کویت، سعودی عربستان و بیرلشگن عرب امیرلیگی دهگی پایگاهلر هجوم نشانیگه ایلندی. اوچینچی هفته گه کیرگن ماجرا عاقبتیده ایکی مینگدن آرتیق انسان هلاک بولگنی، قربانلرنینگ اکثریتی ایران و لبنان حدودلریگه توغری کیلهیاتگنی ایتیلماقده.
مذکور ماجرا، یقین شرق منطقهسیده بیقرارلیک کوچهیشیگه همده دنیا انرژی بازارلریده نرخلر آشیشیگه سبب بولگن.
