هرات شهرینینگ کوچهلریدن بیریده بیر ایرکک، هر کونی ایرتهلب قویاش چیقمسدن آلدین اوییدن چیقهدی. اونینگ هر ایرتنگی ایش تاپیب و شام پیتی نرسهدن توله قول بیلن اویگه قیتیش امیدی بیلن باشلنهدی؛ لیکن بو امید ایسه کوپینچه کون بو رقم بولمهیدی.
۴۵ یاشر ایشلاوچی ذبیحالله، هر کونی بو یولدن قتنهیاتگن کیشیلردن بیری دیر. اونینگ ایتیشیچه، ایرتهلب ایش تاپیش اوچون اوییدن چیقهدی، بیراق کوپینچه کون درآمد قولگه کیلتیره آلمسدن اوییگه قیتهدی که بو وضعیت عایله نیازلرینی تامینلشنی اونینگ اوچون قیینلشتیرگن. «هر کونی ایرتهلب ایش امیدی بیلن اویغنهمن، لیکن ایش یوق. اویده ایتیلهدیگن نرسهلرنی آلیب کیله آلمهیمن.»
ذبیحاللهنینگ کوپهیتیریشیچه، مالی امکانیتسیزلیکلر سبب، بعضا بالهلرینینگ ساده ایستهکلرینی هم تامین قیله آلمهیدی. «بالهلرینگ کوزینگ برابریده ایغلهیدی و سین حتا هیچ بیر نرسه قیله آلمهیسین. حتا بیران پیت ۱۰ افغانی هم یانیم گه بولمهیدی.»
ایکینچیلیک یولی بیلن عایلهسینینگ نیازلرنی تامین قیلهدیگن غور یشاوچیسی بولمیش احمد گه کوره، درآمدینینگ ایکینچیلیک بیر موسومیگه باغلیق بولگنی، عایلهسینینگ اقتصادی برقرارلیگینی قیینچیلیک بیلن روپهره قیلگن. اونینگ ایتیشیچه، ییلنینگ کوپینچه آیلریده باشقه بیران ایش امکانیتی بولمهی و انه شوو موضوع عایلهسیگه اقتصادی باسیمنی کوپهیتیرگن. «ایش یوق. ایش امکانیتلری بولمهگنی، کوپینچه کیشی اوز ایستهک و آرزولریگه ییتشه آلهر ایدی.»
شونینگدیک لوگر یشاوچیسی بولمیش عبدالحکیم هم بو کبی بیر وضعیتنی تیلگه کیلیرهدی. اونینگ ایتیشیچه، ایش امکانیتلری کمهیگنی و حیات صرف-خرهجتلری کوپهیگنی، عایله مسئولیتینی اونینگ اوچون آغیرلشتیرگن. «عایله سرپرستی صفتیده، حاضرگی اقتصادی وضعیتده عایله خرهجتلرینی تامینلش جودهیم قیین بولگن. ایش تاپیش فرصتلری آز بولیب و حیات خرهجتلری کوپهیگنی بیلن بیرگه ییترلی درآمد یوقلیگی، بیزلرگه کوپینچه باسیم کیلتیرگن.»
ایش یوقلیگی عاقبتلری یالغیز عایله خرهجتلرینی تامینلش قیینچیلیکلری بیلن چیکلنمهیدی. ایش بیلرمانلرنینگ ایتیشلریچه، ایش ناتینچلیگی بیر کیشینینگ اجتماعی و روحی وضعیتیگه تاثیر قویه آلهدی. جمعیتشناسلردن قربانعلی فکرتلعلینینگ ایتیشیچه، برقرار ایش یوقلیگی بیر کیشینینگ اجتماعی اورنی و اولرنینگ علاقهلریگه سلبی تاثیر قوییب و اجتماعی رواجلنیش امکانیتینی چیکلنتیره آلهدی. «جمعیتده ایشسیزلیک درجهسی یوقاری بولسه، اجتماعی حرکتچینلیک یوقاریلش ایمس، عکسینچه پسهیش حالتگه ایگه بولهدی.»
شونینگدیک روانشناسلردن محمدالله بلوچ، اقتصادی باسیمنی روحی قیینچیلیکلر بوییچه اینگ مهم عامللردن بیری بیلیب و ایتیشیچه، دستلبکی نیازلر تامینلنمسلیگی بیر کیشینینگ روحی سلامتلیگیگه توغری تاثیر قویه آلهدی. «دستلبکی نیازلر تامینلنمهگنی صورتده، بیر کیشینینگ توشینیشی، تینچلیگی و اجتماغی علاقهلری ضرر کوریب، اضطراب و افسردهلیک امکانیتی یرهتیلهدی.»
باشقه بیرتاماندن، اقتصاد وزیرلیگی اقتصادی وضعیت یخشیلنیشی و ایش امکانیتلری یرهتیلیشی بوییچه برنامهلری بارلیگینی بیان قیلهدی. اوشبو وزیرلیک ایچکی تولیدلرنی حمایت قیلیش، سرمایه یاتقیزیشنی جذب قیلیش و خصوصی بولیم فعالیتلرینینگ کوچهیتیریشنی ایش امکانیتلری یرهتیلیشی ییچیم یوللریدن بیلهدی.
اقتصاد وزیرلیگی سوزلاوچیسی عبدالرحمان حبیبنینگ ایتیشیچه: «ایچکی تولیدلردن حمایت قیلیش، مملکتده ایشلب چیقریلگن توارلردن فایدهلنیش، تولیدی بولیملرده سرمایه یاتقیزیلیش و ایش فرصتلری یرهتیلیشی، اینگ مهم ییچیم یوللردن حسابلنهدی.»
شوندهی بیرحالده، بیرلشگن ملتلر تشکیلاتی و یاردم بیرووچی نهادلردن قطاری افغانستان اقتصادیگه آرتیب باره یاتگن باسیملر حقیده آگاهلنتیرگن. مذکور نهادلرگه کوره، هوا اوزگریشلری و قوشنی مملکتلردن افغانستان یشاوچیلرینینگ کینگ کولملی قیتیشی، بار اقتصادی قیینچیلیکلر یانیده ایش بازاری و عایلهلر تیریکچیلیگیگه کوپینچه باسیمنی کیلتیرگن.
