بیرلشگن ملتلر تشکیلاتی نینگ افغانستانده‌گی دفتری، ینه بیر مرته افغانستانده زوروانلیکلر تیزلیکده توخته‌تیلیشی سورهگن.
بوگون (پنجشنبه ۲۴ – میزان) بیرلشگن ملتلر تشکیلاتی نینگ افغانستانده‌گی دفتری بیر اعلامیه ترقه‌تیب ایتیشیچه، افغانستانده اوروشلر توخته‌تیلیشی خصوصیده بوتون حربی کوچلر سوزلشوو آرقه‌لی تینچ بیر کیلیشوو گه قول تاپیشی کیره‌ک.
عین حالده اوشبو دفتر، افغانستانده دوام ایته‌دیگن اوروشلرده تینچ‌اهالی نینگ تلفاتی رقمی حقیده اشاره قیلیب و اوروشلر جریانیده ایکی تامان هم تینچ‌اهالی گه دقت قیلیشی نی سورهگن.
یوناما اعلامیه‌سیده کوپه‌یتیریشیچه، جاری هفتهده هلمند ولایتیده یوزبیرگن آتیشمه‌لرده مینگ‌لرچه تینچ‌اهالی اوی – جایلرینی ترک قیلیشگن.
اوشبو نهاد تامانیدن ترقه‌تیلگن گزارشده، هلمند ولایتی نینگ اوروشیده عیال و باله‌لر شامل کوپینچه تینچ‌اهالی اولیب و یره‌لنگنی یازیلگن.
طالبان گروهی اوتگن یک‌شنبه کونی هلمند ولایت مرکزی لشکرگاه شهری نینگ ایریم منطقه‌لریده هجوم قیلگن.
افغانستان ملی مدافعه وزیرلیگی نینگ سرپرستی اسد‌الله خالد، اوتگن کونی هلمند ولایتی نینگ خوفسیزلیک وضعیتی نی تیکشیریش اوچون اوشبو ولایت گه سفر قیلگن ایدی.
هلمند ولایت حاکمی سوزلاوچیسی عمر زواک نینگ ایتیشیچه، اوشبو آتیشمه‌لر جریانیده ۷ تینچ اهالی اولیب و ۲۳ تینچ‌اهالی یره‌لنگن.
ایتیش کیره‌ک کیم طالبان گروهی نینگ هجومی نتیجه‌سیده، هلمند ولایتیده ۵ مینگ عایله اوی – جایلرینی ترک قیلیشگن.
