افغانستان ده بیرلشگن ملتلر تشکیلاتی اورینباسرلیک هیئت ادارهسی (یوناما)، نینگ اعلام قیلیشیچه، بالهلر ۸۰ فایز قربانلیک بیلن، افغانستان ده اوروشدن پارتلمهی قالگن قورال-یراغدن اینگ کوپ ضرر کورگنلرنی تشکیل بیرهدی.
مذکور نهاد، بوگون (۱۴-دلو، سهشنبه)، فیسبوک صحیفهسیده یازیشیچه، افغانستان اوروشدن قالگن قورال-یراغدن اینگ کوپ ضرر کورگن اوچینچی مملکت دیر.
یونامانینگ کوپهیتیریشیچه، بالهلر کوپراق اویین چاغیده اوروشدن پارتلمهی قالگن قوراللرگه قول اوریش بیلن جبرلنهدیلر. افغانستان ده بیرلشگن ملتلر تشکیلاتینینگ اورینباسرلیک ادارهسیگه کوره، ماینتازهلش بولیمیده آگاهیلیک بیریش و جدی اقدام قیلیش بیلن افغانستان یشاوچیلری حیاتینی قوتقریش ممکن.
بیرلشگن ملتلر تشکیلاتیگه تیگیشلی بو نهاد، افغانستان ده ماین تازهلش بولیمیده نادولتی نهادلرنینگ قوللب-قوتلنیشی و بودجه اجرهتیلیشینی ایستهگن.
یوناما شونینگدیک بوندن آلدین هم، افغانستان ده اوچ مینگ کیلومترمربعدن آرتیق ییرنینگ اوروشدن قالگن ماینلردن تازهلنگنی؛ لیکن حاضرگچه انیقلنگن بیش مینگدن آرتیق موردنینگ تازهلنیشگه نیازی بارلیگینی معلوم قیلگن.
اوتگن ییل هلوترست موسسهسی، بیر گزارش ترقهتیش بیلن آیده افغانستانلیک قریب ۵۰ کیشینینگ ماین و اوروشدن پارتلمهی قالگن مادهلر پارتلشی عاقبتیده، اولیب یا-ده یرهلنیشینی اعلام قیلگن ایدی.
