جوزجان-بلخ قتناو یولیده یوز بیرگن ترافیکی حادثه نتیجهسیده، بالهلر و عیاللر شامل سکیز کیشی اولیب و تورت کیشی یرهلنگن.
جوزجان ولایتی آقچه تومنی خوفسیزلیک مسئوللرینینگ ایتیشلریچه، اوشبو حادثه اوتگن کون توشدن آلدین (۱۰-سنبله، دوشنبه)، مذکور تومننینگ «چکش» قیشلاغیده یوز بیرگن.
مسئوللرگه کوره، اوشبو ترافیکی حادثه «سراچه» رسوملی بیر موترنینگ سرکدن چیقیب و چپه بولگنی نتیجهسیده یوز بیرگن.
شوندهی بیر حالده، اوتگن کونی سمنگان-بلخ قتناو یولیده یوز بیرگن باشقه بیر ترافیکی حادثه نتیجهسیده، تورت کیشی یرهلنگن.
سمنگان امنیه قوماندانلیگی سوزلاوچیسی حشمتالله رحمانینینگ ایتیشیچه، مذکور حادثه بو ولایت حضرت سلطان تومنینینگ «یکهتوت» قیشلاغیده یوز بیرگن.
جناب رحمانی، اوشبو ترافیکی حادثه «کرولا» رسوملی بیر موترنینگ سرکدن چیقیب و چپه بولگنی نتیجهسیده یوز بیرگنی نی بیان قیلگن.
سمنگان امنیه قوماندانلیگی سوزلاوچیسیگه کوره، یرهلنگنلر مذکور ولایت مرکزی ایبک شهری یشاوچیلری بولیب و دوالنیش مقصد کسلخانه گه انتقال بیریلگن.
ایتیلیشچه، یوز بیرگن اوشبو ایکی ترافیکی حادثه سببی، هیداوچیلرنینگ احتیاطسیزلیگی و تیز هیدهشی دییلگن.
