بلخ ولایتی اخبارات و مدنیت ریاستی مسئوللری، اوشبو ولایتده مولاناجلالالدین محمد بلخینینگ آتهسی بهاوالدین خانقاهسینی قیته قوریش ایشی باشلنگنینی معلوم قیلدیلر.
بلخ ولایتی اخبارات و مدنیت ریاستینینگ مسلکی اعضاسی آغادل لیوال گه کوره، اوشبو خانقاهنینگ قیته قوریش ایشی نیچه باسقیچده، تورکیه تیکا دفتری نینگ مالیهوی یاردمی بیلن دوام اېتماقده.
اونینگ ایتیشیچه، بو لایحه خانقاه اطرافیدهگی دیوارنی قوریش، کورکم محیط یرهتیش و باشقه ساحهلرنی اوز ایچیگه آلیب و ۶۰۰ مینگ دالر عوضیگه قوریلیشی ممکن.
او شوندهی دییدی: بو لایحهنینگ بیرینچی باسقیچی ایشی خانقاه اطرافیدهگی دیوارنی اوز ایچیگه آلهدی، قریب ۷۰ فایز ایشی توگهگن و اونینیگ قالگن ایشلری تیزلیک بیلن باشلنیشی کوتیلهدی. اوشبو لایحهنینگ قالگن بولیملری ایشی تیزلیک بیلن باشلنهدی.
شو بیلن بیرگه، بلخ ولایتی اخبارات و مدنیت باشلیغی محمدالله ضرار، خانقاه ایشی یانیده خواجه ابو نصر پارسا مسجدی و باشقه بعضی تاریخی آبدهلرنینگ قیته تیکلش ایشی دوام ایتماقدهلیگینی بیلدیردی.
مولاناجلالالدین محمد بلخی آتهسینینگ خانقاهسی، بلخ ولایتی بلخ تومنیده و ۲۰ کیلومتر مزارشریف شهریدن اوزاقلیکده جایلشگن بولیب و هر ییلی کوپ سانده سیاحلر کیلیب یقیندن کورهدیلر.
