امریکا جمهور باشلیغی دونالد ترامپنینگ جماعتچیلیک آرهسیدهگی قوللب-قوتلاوی سیزیلرلی پسهیدی.
ییتکرمهلرنینگ معلوماتیگه کوره، سونگی قوشمه سوراونامه نتیجهلری، اونینگ عمومی ریتینگی ۳۷ فایزگچه توشیب، تاریخی اینگ پست کورستکیچلردن بیریگه ایلندی.
تدقیقات «واشنگتن پست»، «ایبیسی نیوز» و «ایپساس» همکارلیگیده اوتکزیلگن. اونده میلادی ۲۰۲۶ ییل ۲۴-۲۸ اپریل کونلری ایکی مینگ ۵۶۰ نفر امریکالیک اشتراک ایتگن.
نتیجهلر گه کوره، امریکالیکلرنینگ ۶۲ فایزی ترامپ سیاستیگه قرشی ایکنینی بیلدیرگن، اینیقسه اونینگ تشقی سیاستدهگی ایریم قدملری، جملهدن ایران گه نسبتن سیاستی کوپچیلیک تامانیدن قوللب-قوتلنمهگن – ۶۶ فایز قرشی، ۳۳ فایز ایسه معقوللـهگن.
اقتصادی سیاست بارهسیده هم قانیقیش پست؛ جمهوریتچیلرنینگ فقط ۳۴ فایزی اونی معقوللـهگن. متخصصلر بو حالتنی یاقیلغی نرخلرنینگ آشیشی بیلن ایزاحلماقده.
شو بیلن بیرگه، جمهوریتچیلر آرهسیده ترامپنینگ ریتینگی حلی هم یوقاری – ۸۵ فایز. بیراق مستقل سیلاوچیلر ایچیده بو کورستکیچ ۵۶ فایزگچه توشیب، ینگی اینگ پست درجهنی قید ایتگن.
سیاسی تحلیلچیلر فکریچه، جمهور باشلیغنینگ ریتینگیدهگی پسهیشی جمهوریتچیلرنینگ امریکا پارلمانی و امریکا سنا کینگشیدهگی موقعی گه سلبی تأثیر کورسهتیشی ممکن.
معلوم کی، امریکاده آرهلیق سیلاولر میلادی ۲۰۲۶ ییل ۳ نومبر کونی بولیب اوتهدی. اونده وکیللر پارلماننینگ برچه ۴۳۵ اورنی و سنانینگ ۳۳ اورنی اوچون کورهشهدی. سوراو نتیجهلریگه کوره، حاضرچه دموکراتلر سیلاوچیلر آرهسیده ۵ فایزلیک اوستونلیککه ایگه.
