امریکا جمهور باشلیغی دونالد ترامپ دنیا گه مشهور پرتگاللیک فوتبالچی کریستیانو رونالدونی، امریکا گه چقیردی.
اجتماعی ترماقلرده ترقهلگن ویدیو مراجعتده ترامپ رونالدونی «برچه دورلرنینگ اینگ بویوک فوتبالچیسی» دیب اتهگن.
«کریستیانو رونالدو، سین برچه دورلرنینگ اینگ بویوک فوتبالچیسیسن. امریکاده سین بیز گه کیرهکسن. درحال یولگه چیقیب – بیز تامان تیزراق کیلیشینگ کیرهک.» دیگن، ترامپ اوز مراجعیتیده.
ویدیو قیسقه فارمتده اعلان قیلینگن بولیب، اونده صنعی هوش/ذکاوت یاردمیده یرهتیلگن صحنهلر هم موجود. ایریم لوحهلرده ترامپ و رونالدو آق اوی حدودیده فوتبال اوینهیاتگندیک تصویرلنگن.
مذکور بیانات، میلادی ۲۰۲۶ ییلگی فوتبال بوییچه جهان کپی عرفهسیده ینگرهگن. معلوم کی، جهان کپی تورنمنتی امریکا، کانادا و مکزیکو میزبانلیگیده اوتکزیلیشی کوتیلهدی.
کوزهتوچیلر ترامپنینگ چقیریغینی بیر نیچه یوسینده تلقین قیلماقده. خصوصاً رونالدونی امریکانینگ MLS لیگهسیگه تکلیف قیلیش احتمالی بار یا کی جهان کپی آلدیدن فوتبال گه قیزیقیشنی آشیریش گه قرهتیلگن رمزی مراجعت بولیش ممکن.
حاضرده کریستیانو رونالدو، سعودی عربستاننینگ «النصر» کلوبیده توپ سورماقده. او حلی مذکور چقیریققه رسمی مناسبت بیلدیرمهگنی ایتیلگن.
