ننگرهار امنیتی منبع‌لری نینگ ایتیش‌لریچه، بوگون (سه‌شنبه ۱۲- حوت) توشدن کیین ساعت ۴ اطرافیده مذکور ولایت مرکزی جلال‌آباد شهری نینگ بیرینچی ناحیه‌سیده، انعکاس خصوصی تلویزیونی نینگ عیال ایشلاوچی‌لری ناتانیش قوراللیلر آرقه‌لی هجوم آستیده آلینگن. منبعلرگه کوره، مذکور حادثه‌ده بو رسانه نینگ اوچ عیال ایشلاوچیسی هلاک و باشقه بیر عیال ایسه تن جراحتی کوتارگن.
ننگرهار ولایتیدن ایشانچلی دولتی بیر منبع نینگ سلام‌وطندارگه ایتیشیچه، انعکاس تلویزیونی نینگ مرسل، سعیده و شهناز ناملی اوچ عیال ایشلاوچیسی هلاک و شونینگدیک باشقه بیر عیال ایسه یره‌لنگن.
منبع نینگ کوپه‌یتیریشیچه، انعکاس تلویزیونی نینگ اوشبو عیال ایشلاوچی‌لری دفتر دن اوی‌لری تامان کیته‌دیگن بیرچاغده، ناتانیش قوراللیلر آرقه‌لی هجوم آستیده آلینگن.
ننگرهار حوزوی کسلخانه‌سی سوزلاوچیسی گل‌زاده سنگر نینگ ایتیشیچه، اوچ عیال خبرچی نینگ جسدی و بیر یره‌دار بو کسلخانه گه انتقال بیریلگن کیم یره‌لنگن کیشی نینگ ساغلیک وضعیتی یمان دیر.
مذکور هجوم دن کیین انعکاس تلویزیونی ینگی بیر خبر آرقه‌لی اوچ عیال ایشلاوچیسی نینگ هلاک ایتیلگنی نی تصدیقله‌دی. حادثه شاهدلری نینگ ایتیش‌لریچه، ناتانیش قوراللیلر مذکور کیشیلرنی هجوم آستیده آلیب و اوزلری ایسه محل دن قاچگن.
حادثه مسئولیتی نی حاضرگچه بیرار گروه یا-ده شخص بوینیگه آلمه‌گن.
شونینگدیک کمیده اوچ آی آلدین انعکاس خصوصی تلویزیونی نینگ خبرچیسی ملاله میوند، ناتانیش قورللیلر آرقه‌لی جلال‌آباد شهریده اولدیریلگن ایدی.
