سونگی ییللر اینیقسه سیاسی اوزگریشلردن کیین، بلخ ده یاشلر آرهسیده سنتی کییملردن فایدهلنیش کوپهیگن. شونینگدیک افغانستانلیک مهاجرلردن بیر قطاریهم سنتی کییملرگه قیزیقیب، قدیمی تکهلر و سنتی کییملرنی افغانستان دن تیلتهدیلر.
ایپک شاللر، افغانی کییم-کیچک و قندهار کلهپوشلری، بلخ مرکزی مزارشریف شهریدهگی دکانلرده باشقه وقتلرگه قرهگنده کوپراق ساتیلهدی.
مزارشریف شهری یشاوچیسی مشعل شریفینینگ ایتیشیچه: «بوگون سنتی کییملر اوزیگه مخصوص دیزاینلر، رنگ-برنگلیک، راحتلیک و مدنی اصللیک طفیلی، کوپینچه کیشینینگ توجهسینی اوزیگه قرهتگن. اوشبو کییملر بیر ملتنینگ کیملیگی و مدنیتینی کورستهدی.»
بیزلرنینگ فیسبوک صحیفهمیزگه باش اورینگ!
سونگی کونلر افغانستان ده کیینیش مدنیتی سیزیلرلی درجهده اوزگریب بارماقده. یاشلردن قطاری اینیقسه شهرلرده، کوپراق سنتی کییملرنی کییشگه یوز کیلتیرگنلر که بو انتخاب هم فرهنگی ایشانچلردن تاثیر کورگن و همده حاضرگی اجتماعی شرایط بیلن ماس تانیلهدی.
بو توغریده بلخ ده سنتی کییملر ساتهدیگنلردن بیری هیبتالله احمدینینگ ایتیشیچه: «اهالی سونگی بیر-ایکی ییلده سنتی کییملرنی کوپراق ساتیب آلهدیلر و شونینگدیک بیزلرهم ساتگنمیز.»
شونینگدیک یاشلردن قطاری، زمانهوی مود و سنتی کییملرنی اویغونلشتیریش بیلن، قدیمی فرهنگلر و بوگونگی زمانهوی حیات اورتهسیدهگی کوپریکنی قوریشگه حرکت قیلماقدهلر.
مزارشریف شهری یشاوچیلریدن بیری مژده عمرنینگ ایتیشیچه: «حاضر زمانهوی سنتی مود اسمیده ینگی بیر اسلوب اورته گه چیققن که، اونینگ کییش کوندهلیک حیاتده رواجلنگن. بو اسلوب راحتلیک، سنتی و زمانهوی دیزاینلرنینگ اویغونلشتیرمهسی دیر که، بو تکهلر هم قدیمی، هم شرق و غرب گوزهلیکلریگه ایگه و همده راحت دیر.»
غرب استایللری بیلن سنتی استایلنینگ قوشیلیشی، افغانستان کییملرینینگ تشقی مملکتلرده هم کوپراق قوللنیلیشیگه سبب بولگن.
بلخ دهگی تیکووچیلردن بیری عارف صاحبزادهنینگ سلاموطندار گه ایتیشیچه، ایشخانهسی گه مراجعت قیلگنلردن کوپ قطارینی عیاللر و یاشلر تشکیل بیرهدی. اونینگ کوپهیتیریشیچه: «تشقی مملکتلرده حیات کیچیرهدیگن یاشلر و شونینگدیک مملکت ایچیده حیات کیچیرهدیگن کیشیلر، سنتی کییملرنی کییشگه قیزیققن.»
بیزلرنینگ «ایکس» ترماغی ده هم تعقیب قیلینگ!
محلی کییملرنی کییشگه قیزیقیشنینگ کوپهیگنی و اوندن فایدهلنیشنینگ آشگنی، ایش بازارینی اوزگرتیریب و ینگی فرصتلرنی اورته گه کیلتیرگن.
فرهنگی ایشلری بوییچه بیلرمان نعمتالله آصفینینگ ایشانچیگه کوره، بو تغییرنینگ عاقبتلری فرهنگ و اجتماع اوچون «کوپ مثبت» دیر. اونینگ ایتیشیچه: «بیر تاماندن اینیقسه یاشلر آرهسیده مدنی بیرلیک و کیملیک حسی مستحکملنهدی و باشقه بیر تاماندن ایسه، اقتصادی فرصتلر اینیقسه عیاللر و قیزلر اوچون کوپینچه ایش زمینهسی یرهتیلهدی.»
بو تکهلرنینگ هر بیر ایپی افغانستان تاریخینی بیان قیلهدی. سنتی کییملر نه فقط بو مملکت اوتمیشینینگ بیلگیسی دیر، بلکیم خلاقیت، کیملیک و اهالی حرکتینی بیان قیلیش اوچون ینگی بیر بیان قیلیش طرزی حسابلنهدی.
