امریکا و کانادا اورتهسیده تجاری کیلیشوو مذاکرهلری نتیجهسیز یکونلنگنیدن سونگ، امریکا قوشمه ایالتلری کانادانینگ ایریم توارلریگه ۵۰ فایزلیک باج جاری قیلگن.
رویترز نشری، بوگون (۳۱ اسد/۲۲ آگست، شنبه) ترقهتگن گزارشیده، ایکی تامان مذاکرهلر نتیجهسیز یکونلنیشگه بیر-بیرینی عیبلهگن.
قید ایتیلیشیچه، قیمتی قریب ۲۰ میلیارد دالرلیک کانادا توارلریگه بوگوندن باشلب تعرفهلر جاری قیلینگن.
ینگی تعرفهلر، امریکا جمهور باشلیغی دونالد ترامپ و کانادا باش وزیری مارک کارنی اورتهسیدهگی کیسکینلیک کوچهیب بارهیاتگنینینگ بیلگیسی بولیب، امریکا، مکسیکو و کانادا اورتهسیدهگی ایرکین سودا بیتیمینی ینگیلش بوییچه مذاکرهلر جریانینی ینهده قیینلشتیریشی ممکن.
معلوم قیلینیشیچه، کارنی امریکا بیلن سودا مذاکرهلرینی توختهتگنینی و کانادا ینگی تعرفهلر گه دالرمه-دالر جواب بیریشینی بیلدیرگن. او واشنگتننی مذاکرهلرنینگ سونگی باسقیچیده تکلیف شرطلرینی اوزگرتیرگنینی عدالتسیز و اقتصادی جهتدن اساسسیز دیب بهالهگن.
مذاکرهلردن بیر نیچه ساعت آلدین ایکی دولت کیلیشوو گه یقینلشگنی ایتیلگن ایدی. منبعلر گه کوره کیلیشوو فولاد و موترلر گه قوییلگن تعرفهلرنی پسهیتیریش همده امریکا الکولی ایچیمیلیکلرینی کانادا دکانلریگه قیته کیریتیش امکانینی بیریشی ممکن ایدی.
ینگی باجلردن تشقری، امریکا کانادا فولادی، یاغاچ توارلری و موترلریگه نسبتن اولدن موجود تعرفهلرنی هم سقلب قالماقده. اوشبو ترماقلر سونگی ۱۸ آیده امریکا سودا چارهلریدن سیزیلرلی ضرر کورگن.
ایسلهتیب اوتهمیز، اولراق امریکا جمهور باشلیغی دونالد ترامپ ۸۰ دن آرتیق دولتدن وارد قیلینهدیگن محصولاتلر گه نسبتن ینگی باج جاری قیلگندی.
