سونگی ییللرده امریکاگه مهاجرت قیلیش افغانستانلیکلر اوچون تینچلیک و برقرارلیک سری یول صفتیده قرهلهدی. مینگلرچه افغانستانلیک کوپینچه صرف-خرهجت بیلن پاکستان گه باریب، مهاجرتی ایستهکلری تیکشیریلیشینی کوتیب تورماقده.
اولر، امریکا آرقهلی مهاجرتی ایستهکلری توغریسیده ایجابی جواب آلیش امیدی بیلن ییللردن بیری نابیللی تقدیر بیلن پاکستان ده حیات کیچیرماقدهلر؛ لیکن مهاجرتی ایستهکلرینینگ تیکشیریلیش جریانی کوپ وقت آلگنی، اولردن قطارینینگ امیدینی امیدسیزلیککه اَیلنتیرگن. پاکستان دهگی افغانستانلیکلردن قطاری نهفقط مقصدلریگه ییتیشمهگنلر، بلکیم ییللر اوزاق بولیب و باشقه اوتمیش کبی بولمهگن اوز مملکتلری گه قیتیشگه مجبور بولگنلر.
جمعیت اوزگریب، اقتصادی و اجتماعی وضعیت تغییر قیلیب و اولر برابریده ینگی قیینچیلیکلر قرار تاپگن.
امریکا گه مهاجرتی ایستهگنی کوزهتیش مقصد بیر ییل افغانستان و پاکستان آرهسیده باریب-کیلیش قیلگن قندوز ولایتیدن بولمیش فرزاد غفورینینگ ایتیشیچه، مذکور باریب-کیلیشلر نتیجه بیرمهی و نهایت ویزهسیزلیک و باشپنه قیینچیلیکلر سبب، مملکتگه قیتیشگه مجبور بولگن. اونینگ کوپهیتیریشیچه: «پاکستان گه باریب-کیلیشیمدن بیر ییل بولگن ایدی، بیراق کیسیم ایشلری اونچهلیک یخشی آلغه کیتمهیدی و کوپ امیدسیز بولدم. پاکستان ده کوپینچه قیینچیلیک بیلن روپهره ایدیم، اوی کرایهسی یوقاری ایدی و اهالی درست یاندهشمس ایدی. چیگرهده هم درست یاندهشیلمهیدی.»
آلتی آیدن بیری پاکستان ده حیات کیچیرهدیگن و امریکا گه مهاجرتی ایستهگی بولگن قندوز ولایتیدن بولمیش غلام حسننینگ ایتیشیچه، بو مدتده کوپینچه اقتصادی و اجتماعی قیینچیلیکلر بیلن روپهره بولگن. شونینگدیک او پاکستان ده اوی کرایهسی یوقاریلیگی و قاچقینلرگه آزیق-آوقتنینگ قیمت ساتیلیشینی بیان قیلیب و کوپهیتیریشیچه: «اویلر کرایهسی کوپ قیمت ایدی و افغانستانلیک بولگنیمیزنی بیلگنلریده، حتا آزیق-آوقتنی هم قیمت ساتهر ایدیلر. چیگرهده هم پاکستان اردوسی درست یاندهشمهیدی. اقتصادی وضعیتیمیز یخشی ایمس ایدی، چونکه برچه پولیمنی پاکستان ده کیسیم اوچون صرفلهدیم. حاضر نیمه قیلهی دیب خواطرلنیب قالگنمین. لیکن ینه هم افغانستان ده امنیتنینگ کوپراق برقرار بولگنیدن خورسندمین.»
شونینگدیک بو کبی بیر وضعیتنی تجربه قیلگن کیشیلردن فیصل، بیر ییل پاکستان ده امریکا گه مهاجرتی ایستهگی نتیجهسینی کوتیب تورگن؛ لیکن نهایت مملکت گه قیتیشگه قرار آلگن. «بیر ییل پاکستان ده ایدیم، کیسیم ایشلری توختهگنی و مهاجرت اوچون بیر فرصت بولمهگنیده، افغانستان گه قیتیشگه قرار آلدیم. ینه هم امید قیلهمن که کیسلر ایشی قیته باشلنسه. افغانستان دن بیران جای گه باره آلسم، اوز مملکتیمیزدن کیتهمن، بیراق هیچ قچان پاکستان گه کیتمهیمن.»
امریکا دولتی ۲۰۲۵-ییل دسمبر آییده، دایمی یشش ایستهگی یا-ده گرین کارت دوسیهلریدن برچهسینی افغانستان شامل ۱۸ مملکت یشاوچیلری اوچون توختهتدی. دونالد ترامپنینگ قدرت گه قیتیشیدن کیین، امریکا کوپ قیین قاچقینلیک سیاستلرینی عملگه آشیرگن. واشنگتن ده امریکا ملی گاردی گه هجوم بولگنیدن سونگ، ترامپ حکومتی قاچقینلر اینیقسه افغانستانلیکلر برابریده اقداملرینی کوچهیتیرگن.
بولرگه علاوه، ییللر پاکستان ده مهاجرتی ایستهکلری جوابینی کوتیب تورگن افغانستانلیکلردن کوپ قطاری اوچون مملکت گه قیتیش، ینگیدن باشلش معناسیگه دیر که بو باشلنیش، اقتصادی قیینچیلیکلر، کیلهجک توغریسیده خواطرلنیش و کوتیب توریشنینگ قیغولنتیرووچی خاطرهلری بیلن بیرگه دیر.
مذکور کیشیلر حکایهسی، یالغیز نیچه ته مهاجرتی دوسیه حکایهسی ایمس؛ کیتیش امیدی و قالیش آرهسیده سرگردان بولگن بیر نسل حکایهسی دیر. بو، حاضرگچه اولر اوچون بیللی یکون کورینمهگن تقدیر دیر.
