یریم کیچه ساعت ۱ اطرافیده، شهر سکوت ایچیده بولگنی بیر پیتده موبایلنینگ آگاهلنتیرووچی زنگی چلینهدی. کابل شهری یشاوچیسی بولمیش متین نوری، حاضرگچه چرچهش و ییترلی اوخلمهگنلیک ایزلری کوزلریده بیلینیب تورگن بولسهده، اویقوسیدن اویغنهدی. ایش کییمینی کییب و موز ایشلب چیقریلهدیگن کارخانهسی تامان حرکت قیلهدی.
بالهلری اوچون دسترخوان اوستیگه ایسیق نان آلیب باریش مقصد، کیچهنینگ قرانغولیگی ایچیده موزنینگ آغیر قالبلرینی بیرته-بیرته موترگه یوکلهیدی. هوانینگ یاختی بولمسدن آلدین کوچهلر و سرکلر تامان کیتیب، دکانمه-دکان موز ترقهتهدی. «کیچهلر ساعت ۱ دن ایرتنگلر آلتیدن ۱۰ بجهگچه ایشیم بیتهدی. کمپنیهده کونده ایکیمینگ ته موز ایشلب چیقریلهدی. بیزلر کوچیمیزدن کوپراق هر موترگه موزلرنی یوکلهیمیز.»
متین، بیش کیشیلیک عایله سرپرستی دیر. کوندهلیک قولگه کیلتیرهدیگن درآمد بیلن آیده آلتیمینگ ۵۰۰ اوی کرایهسینی بیریشگه مجبور دیر. «تورت آی ایشلهیمن و یاز موسومی موز ساتیلهدیگن موسوم دیر. کونده ایکییریم یوز بیرهدی و آیده ۷ یریم مینگ افغانی بولهدی. حقیقتا قیین دیر. بیر آیده عایله نیازلرینی تامینلسهک، اوی کرایهسی قالهدی و قیینچیلیکلر کوپ و آیلیک ییترلی ایمس.»
بیزلرنینگ فیسبوک صحیفهمیزگه باش اورینگ!
اوی کرایهسینی تولش و عایله نیازلرینی تامینلشده امکانیتسیزلیک، متیننینگ کوندهلیک خواطرلرینینگ یالغیز بیر قسمی دیر. حاضر موز ساتیش بیلن شغللنگن متیننینگ ایتیشیچه، ایش قیینچیلیکلریگه علاوه ترافیک گوجوملیگی هم کوندهلیک درآمدی توغریسیده کوپ تاثیر قویهدی. «گوجوملیک بولهدی و یوللر بند بولهدی، موزلرنینگ دکانلرگه ییتیشتیریشیمیز کیرهک که وقت اوتهدی و موز سوو بولهدی. موز سوو بولگنیده کمپنیه قیته آلمهیدی و بیزلرگه تاوان بولهدی.»
ایسیق موسومده متیننینگ دکانلرگه موز ترقهتیشیدن تورت ییل بولگن. لیکن یاز موسومینینگ یکونلنیشی بیلن اونینگ ایشی هم یکونلنهدی و متین باشقه موسوملرده بیران ینگی ایش کیتیده بولیشی کیرهک. «باشقه موسوملرده برق بولسین، رستورانت بولسین هر ایش بولسه ایتهمن. اوی کرایهسی و عایله خرهجتی دیر. حیات حقیقتا قیین دیر.»
بیر کونده ۹ ساعتدن کوپراق توریب توختهش و موزنینگ ترقهتیش، متیننی ایاق غریققه چلینتیرگن؛ لیکن آز درآمدی سبب شفاکار گه باره آلمهی و دردینی چیدهش گه مجبور دیر. «ایاغیم آغریدی و مرهم هم آلدیم لیکن فایده قیلمهدی و شفاکار گه هم باره آلمهیمن چونکه، پول بولسه که باریب دوا آلسهک. بیر مینگ افغانی بیلن بولمهیدی. بو پول اونینگ فیس و نسخهسی هم بولمهیدی.»
متیننینگ کیچهوکوندوزی عادی نظم گه ایگه ایمس و باشقهلر اویقوده بولگنیده، اونینگ ایش کونی باشلنهدی؛ بیراق کونلرنینگ اوتیشی اونینگ حیاتیگه هیچ قندهی تغییر کیلتیرمهیدی. کوز موسومی ییتیب کیلیشی ایشینینگ یکونلنیشی معناسیگه بولیب، اوییگه بیر نیچهته ایسیق نان آلیب باریشی اوچون کیلهسی یاز موسومیگه قدر اوزیگه باشقه بیران ایش تاپیشی کیرهک.
