عبدالغفار و اونینگ عایلهسی یقینده پاکستان دن سمنگان گه قیتیب کیلگن عایلهلردن بولیب و اولرنینگ حیاتی ۱۲-عقرب ده یوز بیرگن زلزله طفیلی ینهده اوزگرگن. ایکی یاشر بالهسی ویرانهلر آستیده قالگنی نتیجهسیده اولیب و عایله اعضاسی یرهلنگن. حاضر اوشبو واقعهدن ایکی آی اوتگچ، بالهسینینگ اولیمی و باشپنهسیزلیک حیاتیگه سایه تشلهب و حیات کیچیریشنی کوپ قیینلشتیرگن.
او، بیش آی آلدین اوییدهگی اوسکونهلرنی توپله آلمهی، بوش قول بیلن پاکستان دن چیقریلگن. عبدالغفار، تورموش اورتاغی، ایکی یاشر بالهسی و کیکسه آنهسی بیلن سمنگان ولایتی حضرتسلطان تومنینینگ اوزاق بیر حدودیده قدیمی بیر اویده حیات کیچیریشگه باشلهگن.
پاکستان دن چیقریلیش حسرتی و حیات قیینچیلیکلری آغیرلیک قیلهدیگنی بیرحالده، یوز بیرگن زلزله اونینگ قیینچیلیکلرینی کوپهیتیرگن. زلزله ایکی یاشر بالهسینینگ ویرانهلر آستیده قالیشی و عایله اعضاسینینگ یرهلنیشیگه سبب بولگن. «اوزیم، تورموش اورتاغیم، بالهم و کیکسه آنم توپراق آستیده قالدیک. اهالی بیزلرنی قوتقریشگه کیلگن ایدیلر. بیر یریم ساعتدن کیین بیزلرنی قوتقردیلر و کسلخانه گه انتقال بیریلدیک، لیکن بالهگینم جایبهجای اولدی.»
عبدالغفارگه کوره، ایکی یاشر بالهسینینگ قولدن بیرگنی حاضرگچه اونینگ روحینی اذیت قیلیب و حیاتینینگ عادی جریانینی قیینلشتیرگن. «یادم گه کیلگنیده، جودهیم اذیت بولهمن. باغزیمدن نان اوتمهیدی. تورموش اورتاغیمنینگ احوالی هم یخشی ایمس. هر بیر ساعتدن جاییدن توریب و ییغلهیدی.»
اوشبو بالهنینگ بیبیسی مهربانو، مذکور واقعهدن ایکی آی اوتگنی بیلن بیراق حاضرگچه نبیرهسینینگ فراقیدن ییغلهب، حیات و باشپنهسیزلیک قیینچیلیکلریدن شکایت قیلهدی. «حاضر تیریکچیلیک اوچون بیران جای تاپیلیشینی آرزو قیلهمیز. شخصی ییریمیز یوق که بیران اوی قورسهک. قیشده هوا ساووق و ایسیتغیچ اوچون یاقیلغی مادهلریمیز هم یوق. برق و آزیق-آوقتیمیز هم یوق.»
معلوماتلر اساسیده، مملکت شمالیده یوز بیرگن زلزلهده ۲۶ کیشی قربان بولیب، بیر مینگدن آرتیق کیشی یرهلنگن. شونینگدیک مذکور واقعهده مینگلب یشش اوی بوزیلیب، زلزلهدن جبرلنگنلر ساووق موسومده باشپنهسیزلیک و حیاتنینگ دستلبکی نیازلری توغریسیده خواطرلنگنلر.
