اسلام امیرلیگی سوزلاوچیسی ذبیحالله مجاهد، سلاموطندار بیلن صحبتده حکومتنینگ خارجی سیاستی بیطرفلیک تمایلی و منطقهوی همکارلیکنی مستحکملشگه اساسلنگنینی بیلدیردی.
مجاهد گه کوره، اسلام امیرلیگی منطقهدهگی برچه مملکتلر بیلن ملی منفعتنی انابت گه آلیب، سیاسی و اقتصادی یخشی علاقه قوریشگه سعی-حرکت قیلماقده. او شوندهی دیگن: «اسلام امیرلیگی اوز سیاستیده منطقهدهگی مملکتلر بیلن یخشی قوشنیچیلیک و دوستانه مناسبتلرنی یولگه قوییش، شونینگدیک مملکتنینگ ملی منفعتلری اساسیده اولر بیلن دیپلماتیک و اقتصادی همکارلیکنی رواجلنتیریشنی اساسی یونهلیش ایتیب بیلگیلهگن.»
اسلام امیرلیگی سوزلاوچیسینینگ تأکیدلشیچه، افغانستان جغرافیه جایلشووی طفیلی منطقهنینگ اقتصادی و ترانزیت علاقهلرینی باغلشده مهم صلاحیت گه ایگه. اونینگ ایتیشیچه، مملکتده خوفسیزلیکنی سقلش و منطقه دولتلری بیلن علاقهلرنی کینگهیتیریش اوشبو صلاحیتنی افغانستان همده بوتون منطقه اوچون اقتصادی امکانیتلر گه ایلنتیریشی ممکن. شونینگدیک او، اسلام امیرلیگی بو مقصد گه ایریشیش اوچون منطقهوی همکارلیکنی رواجلنتیریش دایرهسیدهگی سعی-حرکتلرینی دوام ایتتیریشینی بیلدیردی. او شوندهی دییدی: «منطقهوی اقتصادیاتنی رواجلنتیریش اوچون افغانستان مهم اورینگه ایگه. شو سببلی افغانستانده خوفسیزلیکنی تأمینلشیمیز و برچه دولتلر بیلن یخشی مناسبتلرنی یولگه قوییشیمیز ضرور. اسلام امیرلیگی عینن شو مقصد گه ایریشیش یولیده بار کوچی بیلن حرکت قیلماقده.»
ایریم سیاسی تحلیلچیلرنینگ فکریچه، اوشبو سیاستنی کینگهیتیریش افغانستاننینگ خلقارا نفوذینی آشیریش و دیپلماتیک علاقهلرینی رواجلنتیریش اوچون قولی شرایط یرهتیشی ممکن.
سیاسی تحلیلچی عبدالجبار اکبرینینگ فکریچه، تشقی سیاستده موازنت تمایلی و اقتصادی همکارلیککه تیهنیشی اسلام امیرلیگینینگ خلقارا میداندهگی آبرو-اعتبارینی مستحکملش همده اونینگ خلقارا مقیاسده تن آلینیشی جریانینی تیزلشتیریشی ممکن. اکبری شوندهی دییدی: «یوقاری درجهدهگی همکارلیک اسلام امیرلیگینینگ خلقارا مقیاسده تن آلینیشی جریانیگه یاردم بیریشی ممکن. قنچهلیک یخشی سیاست یوریتسک، شونچهلیک خلقارا میدانده آبرو و ایشانچ قازانیش امکانیتیمیز آرتهدی.»
اسلام امیرلیگی حاکمیت تیپهسیگه کیلگنیگه بیش ییل تولیشی عرفهسیده خلقارا همجمعیت بیلن ملاقاتنی کینگهیتیریش و دیپلماتیک علاقهلرنی رواجلنتیریش مسئلهسی حکومت تشقی سیاستینینگ مهم یونهلیشلریدن بیری بولیب قالماقده. شو دور مابینیده اسلام امیرلیگی منطقه دولتلری بیلن علاقهلرنی کینگهیتیریش، اقتصادی همکارلیکنی رواجلنتیریش همده سیاسی ملاقاتنی مستحکملشگه علیحده اعتبار قرهتهدی. شونگه قرهمی، خلقارا مقیاسده رسماً تن آلینیشی هنوزگچه حکومت آلدیدهگی اساسی معمالردن بیری بولیب قالماقده. حاضرگچه اسلام امیرلیگینی رسماً تن آلگن یگانه دولت روسیه دیر.
