فوتبال عالمیده اینگ هیجانلی ۲۰۲۶-ییلگی جهان کپی ۲۳ دوری، تورکی دولتلر نمایندهلیگیدن اوزبیکستان و تورکیه شامل ۴۸ مملکتنینگ فوتبال ملی تیرمه جماعهلری اشتراکی بیلن باشلنهدی. اوزبیکستان ایلکبار و تورکیه ایسه ۲۴ ییل کوتیشدن سونگ بو ییلگی جهان کپی گه یول تاپگن.
۲۰۲۶-ییلگی فوتبال بوییچه جهان کپی، مکزیک میزبانلیگی بیلن جنوبی افریقا ملی تیرمه جماعهلری اورتهسیده، ۲۱ جوزا/۱۱ جون، پنجشنبه، کابل وقتی بیلن کیچه ساعت ۱۱:۳۰ ده باشلنهدی.
فوتبال بوییچه جهان کپی بیرینچی مرته بولیب اوچ مملکت جملهدن کانادا، مکزیک و امریکا میزبانلیگیده ۴۸ مملکتنینگ فوتبال ملی تیرمه جماعهلری اشتراکی بیلن ۴ جماعهلیک ۱۲ گروهده اوتکزیلهدی. گروهی و حذفی بیللشوولر بیلن فینالگچه ۱۰۴ مسابقه اوتکزیلهدی.
اوشبو جهان کپی بیللشوولریده ایلکبار ۳۲ ته جماعه پلیآف (حذفی باسقیج) گه یول آلهدی. ۱۲ ته گروهنینگ هر بیریده ۴ تهدن جماعه اشتراک ایتیشی سببلی، گروهلرده بیرینچی و ایکینچی اوریننی ایگللهگن جماعهلردن تشقری، اینگ یخشی نتیجه قید ایتگن ۸ ته اوچینچی اورینده بولگن جماعهلر هم کیینگی باسقیچ گه چیقه آلهدی.
کانادا، مکزیک و امریکا قوشمه ایالتلری میزبانلیگیده اوتکزیلهدیگن ۲۰۲۶ جهان کپی قوییدهگی گروهلرده بیلگیلنگن:
A: مکزیک، جنوبی کوریا، جنوبی آفریقا و چک جمهوریتی
B: کانادا، سوئیس، قطر و بوسنی و هرزگوین
C: برازیل، مراکش، اسکاتلند و هائیتی
D: امریکا، آسترالیا، پاراگوئه و تورکیه
E: جرمنی، اکوادور، ساحل عاج و کوراسائو
F: هالند، جاپان، تونس و سوئد
G: بلژیک، ایران، مصر و نیوزیلند
H: اسپانیا، اروگوئه، سعودی عربستان و کیپورد
:I فرانسه، سنگال، نروژ و عراق
:J ارجنتاین، اتریش، الجزایر و اردن
:K پرتگال، کلمبیا، اوزبیکستان و کنگو
:L انگلستان، کرواسی، پاناما و غنا
۲۰۲۶-ییلگی جهان کپی باشلنیشی مکزیک و جنوبی افریقا اورتهسیده «آزتک مکزیکوسیتی» استدیومیده باشلنهدی و فینال ایسه امریکا میزبانلیگی بیلن قویاش ۱۴۰۵ ییل، ۲۸ سرطان کابل وقتی بیلن کیچه ساعت ۱۰:۳۰ ده «متلایف رادرفورد نیوجرسی» استدیومیده اوتکزیلیشی ریجهلشتیریلگن.
