افغانستان نینگ شمال و شرقی ولایت‌لری مناسب آب‌وهوا و سیر سوولیگی سبب چاروه‌چیلیککه مشهور دیر؛ بیراق سونگی کون‌لرده مذکور ولایت‌لر اینیقسه تخار ده‌گی چاروه‌چیلر اوت یوق‌لیگی سبب جدی قیینچیلیک بیلن روپه‌ره بولیب و اولرنی خواطرینی کوچه‌یتیرگن.
تخارده‌گی چاروه‌چیلر نینگ ایتیشلریچه، اولر نینگ ییلاولری ایکینچیلیک ییرلر گه اوزگریب یا ده غصب بولگن و شونینگدیک، اقلیم اوزگریشی سبب دله‌لرده‌گی اوت‌لر قوروب و چاروه‌لری توییب آوقاتلنمه‌یدی.
اولر گه کوره، اوتمیش‌لرده چاروه‌لری نینگ اوتله‌تیش اوچون ییترلیچه ییلاولری بولیب و نسبی قیینچیلیکلرینی حل قیلر ایکنلر؛ لیکن سونگی ییل‌لرده بو امکانیت اولردن آلینگن.
بیزلرنینگ توییترده هم تعقیب قیلینگ!
تخار ده‌گی چاروه‌دارلردن محمد‌الله نینگ ایتیشیچه، چاروه‌دارلیک آته‌سیدن میراث قالگن و ۲۵۰ قویی بار؛ بیراق چاروه‌لری اوچون اوت یوق‌لیگی اونی قیینچیلیککه دوچ قیلگن. او حکومت‌دن بو قیینچیلیک حلی اوچون یاردم بیریشینی سوره‌یدی.
محمد‌الله نینگ کوپه‌یتیریشیچه: «۷۰ یا-ده ۸۰ ییل‌دن بیری چاروه‌چیلیک ایشی بیلن شغلله‌نیب کیلماقده من و حاضر ایسه ۷۰ یاشیم تولدی. ۴ ییل دن بیری قورغاقچیلیک سبب قوی‌لر آچ قالیب و اوت کم‌لیگی بیلن دوچ بولگن، بیر تاماندن چاروه‌لر اوچون ایچیم‌لیک سوو و اوت یوق دیر.»
چاروه‌دارلردن باشقه بیری غیب‌الله نینگ سلام‌وطندار گه ایتیشیچه، قیش موسومی‌ده چاروه‌لری گه ییترلیچه آوقات تیار قیله آلمسلیگی و ساووق باعث، قریب ۵۰ قویی تلف بولگن.
غیب‌الله نینگ کوپه‌یتیریشیچه: «ایکی یا-ده اوچ قوشنی‌میز ایکی و اوچ ییل‌گچه قوی‌لرینی قرض گه بیرگن، مهلت وقتی یکونله‌نیشیگچه پولینی آلاله دیمی یوق بیللی ایمس، سودا دن کیین اولردن قطاری مملکت نی ترک ایتگن و باشقه بیر قطاری شو ییرده دیر.»
شونده‌ی بیرحالده، تخار ولایتی ایکینچیلیک، سوغاریش و چاروه‌چیلیک ریاستی مسئوللری، چاروه‌چیلر نینگ قیینچیلیکلری حلی اوچون سعی‌وحرکت قیلیش‌لریدن ایشانچ بیرسه‌لرده، لیکن حاضرچاروه‌چیلر نینگ قیینچیلیگینی حل قیلیش اوچون بودجه‌لری یوق‌لیگینی معلوم قیله‌دیلر.
تخار ایکینچیلیک، سوغاریش و چاروه‌چیلیک ریاستی نینگ حیوان‌لر سلامت‌لیگی ایشلری بوییچه آمری هدایت‌الله قادری نینگ سلام‌وطندار گه ایتیشیچه، چاروه‌چیلر نینگ قیینچیلیگینی همکار مؤسسه‌لر و ایکینچیلیک، سوغاریش و چاوره‌چیلیک وزیرلیگی نینگ اضطراری یاردم‌لر بولیمی بیلن شریک قیلگن.
بیزلرنینگ فیسبوک صحیفه‌میزگه باش اورینگ!
اونگه کوره: «باشقه بیر قنچه جنجل‌لری‌میز بار، بیر قنچه ییلاو‌لریمیز بار که غصب بولگن، کوپینچه‌سینی سووی یوق و شونینگدیک سوو تاشقین‌لری، یامغیر و بوران یوز بیرگن چاغده، چاروه‌لرنی سقلش اوچون باش پناه یوق. بو ایکینچیلیک وزیرلیگی نینگ ایشلری دیر انشاءالله بو قیینچیلیک‌لر حلی اوچون دقت قیلینه‌دی.»
ایتیش کیره‌ک که، بو توغریده تخار حاکمی نینگ فکر_ملاحظه‌سینی اورگه‌نیش اوچون سعی‌وحرکت قیلدیک، بیراق موفق بولمه‌دیک. عین حالده، تخار طبیعی آفت‌لرنی باشقریش ریاستی نینگ ایتیشیچه، تخارده‌گی چاروه‌دارلر قیین‌چیلیگی حلی اوچون ایکینچیلیک، سوغاریش و چاروه‌چیلیک ریاستی مسئوللری بیلن بیر قنچه ییغیلیش اوتکزگنلر؛ بیراق حاضرگچه بوتوغریده جواب قیتیریلمه‌گن.
تخار طبیعی آفت‌لرنی باشقریش رئیسی احمدساجد سیر نینگ سلام‌وطندار گه ایتیشیچه: «بوندن آلدین ایریم موسسه‌لر تامانیدن چاروه‌دارلر اوچون سمینارلر یولگه قوییلگن و بو سمینارلرده اولرگه چاروه‌لرینی قنده‌ی اسره‌ش و اولرگه ییگولیک آزیق_آوقات‌دن قنده‌ی فایده‌لنیشی حقیده آگاهی‌لیک بیریلگن، بیراق بوتوغریده وزیرلیک تامانیدن مخصوص ریجه نظرگه آلینمه‌گن، امید قیله‌میز طبیعی آفت‌لرنی باشقریش ایشلری بوییچه وزیرلیگی چاروه‌چیلیک خصوصیده مخصوص بودجه اجره‌تسه و بیزهم چاروه‌دارلر اوچون اورگه‌تیش ریجه‌لرنی نظرگه توتسک.»
بو سوزلر عین‌حالده بیان بولماقده که، تخار ده‌گی چاروه‌چیلر قیش موسومی ده قیینچیلیکلری حلی اوچون سلام‌وطندار گه شکایت قیلیب و تخار محلی مسئوللری اولر نینگ قیینچیلیگینی حل قیلیش اوچون ایشانچ بیرگن ایدیلر، لیکن بو وعده‌لر حاضرگچه عملی بولمه‌گن.
