اسلام امیرلیگی باش وزیرینینگ اقتصادی اورین باسرلیگی گه کوره، افغانستان توپراغیده تاپی لایحهسی عملی ایشی حاضرگه قدر ۱۴ کیلومتر آلغه بارگن و باشقه ۷۰ کیلومتری لوله قوندیریش اوچون تیارلنگن.
اوشبو اداره، ۲۸-میزان، دوشنبه کونی بیر بیانیه ترقهتیب، اسلام امیرلیگی باش وزیرینینگ اقتصادی اورین باسری عبدالغنی برادر و تورکمنستان ملی رهبری قربانقلی بیردی محمدوف، افغانستان توپراغیده تاپی لایحهسی عملی ایشینی یقیندن کوزهتگنلرینی بیلدیرگن.
عبدالغنی برادر، تاپی لایحهسینی منطقهوی همکارلیک، اقتصادی بیرلیک و عمومی فراوانلیک سری مهم قدم دیب، اسلام امیرلیگینینگ سعی-حرکتی فقط تاپی بیلن چېکلنمهی، بلکه اساسی مقصدی افغانستان و تورکمسنتان اورتهسیده اقتصادی یونهلیشلرنی کېنگهیتیریش اېکنلیگینی قوشیمچه قیلگن.
بیانیه گه کوره، تورکمنستان ملی رهبری قربانقلی بیردی، کابل و عشقآباد اورتهسیدهگی علاقهلرنی فایدهلی و کېنگهیب بارهیاتگن دیب تعریفلهگن همده تاپی لایحهسینی آلغه آلیب باریشده اسلام امیرلیگینینگ کېنگ قمراولی همکارلیگینی یوقاری بهالهگن.
تورکمنستان ملی رهبری گه کوره، تاپی لایحهسی مملکتی اوچون استوار یونهلیشلردن بیری بولیب، منطقهوی اقتصادی برقرارلیکده مهم رول اوینهیدی. اونینگ کوپهیتیریشیچه، تاپی لایحهسی یکونلنگچ، افغانستان ییلیگه تخمیناً بیر میلیارد دالر درآمد آلهدی.
تاپی لایحهسینی عملگه آشیرووچی «تورکمن گاز» کمپنیه مسئولرینینگ ایتیشیچه، تاپی لایحهسینی عملگه آشیریش جریانی یخشی دوام ایتماقده و ایشلر کېلهسی ییلی افغانستان حدودیده یکونلنهدی.
