اسلامی امارت سرپرست حکومتی نینگ چیگره کوچلری قوشنی مملکت‌لر جمله‌دن ایران، پاکستان، تاجیکستان و ترکمنستان مملکت‌لری نینگ چیگره کوچلری بیلن اوتگن ۱۱ یریم آی جریانیده کمیده ۹ مرته توقنشگنلر.
اوتگن ییل جدی آیی نینگ ۱۳-ده رسانه‌لردن قطاری محلی منبع‌لردن نقل قیلیب گزارش بیرگن ایدیلر که، اسلامی امارت کوچلری ترکمنستان کوچلری بیلن جوزجان ولایتی نینگ خماب تومنی‌ده چیگره یقینیده آتیشگنلر، لیکن اسلامی امارت سرپرست حکومتی نیچه پیتدن کیین مذکور آتیشمه نی رد قیلدی.
اوشبو واقعه دوامی‌ده، جاری ییل ثور آیی نینگ ۲۵-ده اسلامی امارت چیگره کوچلری و تاجیکستان‌لیک چیگره‌چیلر قندوز ولایتی امام‌صاحب تومنی نینگ شیرخان بندریده آغزه‌کی اوروش‌دن کیین، آتیشگنلر.
بیزلرنینگ فیسبوک صحیفه‌میزگه باش اورینگ!
گزارش‌لر اساسیده، مملکت گه اسلامی امارت نینگ قدرت گه ایریشگنیدن حاضرگچه، اوشبو حکومت کوچلری کمیده اوچ مرته پاکستان کوچلری بیلن توقنشگنلر.
اسلامی امارت کوچلری بیلن پاکستان چیگره کوچلری آره‌سیده بیرینچی مرته ۱۴۰۰-ییل حوت آیی نینگ ۵-ده سپین‌بولدک ده یوز بیرگن که اوشبو آتیشمه نتیجه‌سیده، ۲ کیشی نینگ اولگنی و ۴ کیشی نینگ یره‌لنگنی بیلدیریلگن.
ایکینچی آتیشمه افغانستان و پاکستان چیگره کوچلری آره‌سیده قویاش ۱۴۰۱-ییل حمل آیی نینگ ۱۸-ده، اسلامی امارت کوچلری نینگ پاکستانی بیر جنرال هلی‌کوپتری اوستیگه اوق آتیلگنیدن کیین باشلنگن.
جاری ییل حمل آیی نینگ ۲۸-تاریخی‌دن کیین، ایکی مملکت کوچلری آره‌سیده پکتیا ولایتی‌ده آتیشمه یوز بیردی.
شونینگدیک، اسلامی امارت چیگره کوچلری و ایران چیگره‌چیلری اوتگن ییل قوس و حوت آیلری‌ده و اوشبو ییل نینگ سرطان و اسد آیی‌لریده آتیشگنلر.
اسلامی امارت بیلن ایران چیگره کوچلری آره‌سیده یوز بیرگن بیرینچی و ایکینچی آتیشمه‌لر تلفاتی خصوصیده معلومات ترقه‌تیلمه‌دی و ۷- سرطان‌ده یوز بیرگن اوچینچی آتیشمه‌ده، ایران قوریقچیلری‌دن بیری هلاک بولگن و ایران چیگره کوچلری نینگ بیر افغان باله گه اوق آتگنی، اوشبو آتیشمه نینگ دلیلی دییلگن.
افغانستان و ایران کوچلری آره‌سیده اینگ آخر یوز بیرگن آتیشمه نیمروز ولایتی نینگ کنگ تومنی اطرافیده یوز بیرگن، محلی مسئوللر اوشبو آتیشمه‌ده اسلامی امارت کوچلریدن ایکی‌ته سی نینگ اولیب و یره‌لنگنیدن خبر بیرگنلر.
مذکور آتیشمه ایران رسمی‌لری نینگ جدی عکس العمل‌لری بیلن روپه‌ره بولگن و اولر آتیشمه دلیلی نی افغانستان چیگره کوچلری نینگ چیگره چیزیغی‌دن نا آشنا بولگنلری نی ایتگنلر.
گرچند افغانستان اوچون ایران خاص نماینده‌سی اسلامی امارت مدافعه وزیرلیگی رسمی‌لری بیلن اوتگن کون یوز بیرگن آتیشمه حقیده جلسه تشکیل قیلگنلریدن خبر بیرگن، لیکن مدافعه وزیرلیگی اوشبو جلسه نی تصدیق یا-ده رد قیلمه‌ی و اوشبو آتیشمه نی سو‌ءتفاهم دیگن.
مدافعه وزیرلیگی سوزلاوچیسی عنایت‌الله خوارزمی نینگ سلام‌وطندار گه ایتیشیچه: «اوتگن کون یوز بیرگن آتیشمه سو‌ءتفاهم ایدی که حاضر حل بولگن و وضعیت عادی حالت گه اوزگرگن. مدافعه وزیرلیگی رهبری دایم مسئله‌لر نینگ حل قیلیشنی اوچون سوزلشوو یولیگه تاکید قیلگن دیر.»
شونده‌ی بیرحالده، ایکی کون‌دن بیری پکتیا ولایتی نینگ دندپتان تومنی‌ده افغانستان و پاکستان نینگ چیگره چیزیغی خصوصیده‌گی موجود قیین‌چیلیک‌لر باعث، بو یولاوچیلر یوزی گه یاپیق دیر.
پکتیا معلومات و مدنیت ریاست رئیسی خالق‌یار احمدزی، پاکستان و افغانستان چیگره‌سیده موجود بولگن قیین‌چیلیک نی تصدیق‌لب، اوشبو قیین‌چیلیک حل بولیشی اوچون سعی و حرکت‌لر و سوزلشوولر نینگ دوام قیلیشیدن خبر بیرگن.
اونینگ ایتیشیچه: «نیچه کون‌دن بیری افغان‌لر و پاکستان‌لیک‌لر آره‌سیده دندپتان ده قیین‌چیلیک‌لر اورته گه چیقگن. حاضر ایسه اوشبو قیین‌چیلیک‌لر نینگ حل بولیشی اوچون سوزلشوولر نینگ دوامی بار و شونینگدیک حاضرگچه یول یاپیق دیر. تیزلیککه یول نینگ آچیلیشی خصوصیده امید قیله‌میز.»
شونده‌ی بیرحالده، بیلرمان‌لر اوشبو آتیشمه‌لر و چیگره اوروش‌لری نینگ منطقه امنیتی گه زیان ییتیشتیره‌دیگن دیب و اورغولش‌لریچه، قیین‌چیلیک‌لر نتیجه‌لی بیر سوزلشوو آرقه‌لی حل بولیشی کیره‌ک.
بیزلرنینگ توییترده هم تعقیب قیلینگ!
بو توغریده سیاسی مسئله بیلرمان‌لردن طارق فرهادی نینگ سلام‌وطندار گه ایتیشیچه: «پاکستان و ایران چیگره کوچلری بیلن یوز بیرگن آتیشمه‌لر نینگ تورلی دلیل‌لری بار. پاکستان بیلن پاکستان‌لیک طالب‌لر تحریک گروه‌سی و ایران بیلن انسان ترافیکی، مخدره ماده قاچاقی، سوو و چیگره کوچلری نینگ ییترلیچه تعلیم‌لری یوقلیگی کبی موضوع‌لر دیر که حکومت مذکور مسئله‌لر نی جدی آلیشی کیره‌ک.»
شونینگدیک بو توغریده حربی مسئله‌لر بیلرمانی سرور نیازی نینگ سلام‌وطندار گه ایتیشیچه: «مملکت نیچه دهه اوروش‌دن کیین، نسبی بیر امنیت گه قول تاپگن دیر. اوشبو امنیت نینگ حفظ قیلینیشی اوچون سعی و حرکت بولیشی کیره‌ک.»
ایتیش کیره‌ک که، اسلامی امارت حکومتی حاضرگچه نیچه مرته ایران رسمی‌لری بین چیگره مسئله‌لری خصوصیده صحبت قیلگن دیر، لیکن اوشبو صحبت‌لر نینگ فایده‌لی بولیشی ممکن کورینمه‌یدی.
