اسلام امیرلیگی مملکت نینگ جنوبی و باشقه ولایت‌لریده تشقی پول‌لر بیلن معامله قیلیشنی تقیق‌له‌گندن کیین، حاضر مملکت نینگ کوپ سانده ولایت‌لری جمله دن ارزگان ده افغانی پول بیلن معامله قیلینماقده.
ارزگان یشاوچیلری، افغانی پول بیلن معامله قیلیش دن خورسندلیک بیلدیرسه‌لر ده اما ایتیشلریچه، افغانی پول رواجلنیشی بیلن قطار دکاندارلر توارلر نرخینی آشیرگن و حکومت بو توغریده دقت قیلیشی کیره‌ک.
اولر سرپرست حکومت دن، قیمت‌چیلیک آلدی آلینیشی اوچون بو ولایت گه افغانی پول کوپراق یوباریشنی سوره‌یدیلر.
بیزلرنینگ فیسبوک صحیفه‌میزگه باش اورینگ!
ارزگان یشاوچیلری دن فرید نینگ سلام‌وطندار گه ایتیشیچه: «افغانی پول بیلن معامله قیلینیشدن خورسندمیز، بیراق دولت دن بوتوغریده دقت قیلیشینی ایسته‌یمیز. سابق کلدار بیلن ساته‌دیگن دکاندارلر حاضر افغانی پول بیلن معامله قیله‌دیلر. مثال صورتده ۱۰ کلدار ساته‌دیگن نرسه نی حاضر ۱۰ افغانی ساتیشه‌دی. نرخ-نوالر آشگن دولت و بلدیه اداره‌سیدن بازار نی کنترول قیلیش‌لرینی سوره‌یمیز.»
ارزگان یشاوچیلری دن باشقه بیری نذیر گه کوره: «افغانی پول رواجلنیشیدن خورسندمیز چونکه مملکتی‌میز پولی دیر. مسئوللر دن توارلر قیمتی خصوصیده دقت قیلیش‌لرینی ایسته‌یمیز. دکاندارلر نرخ-نوالرنی اوز باشیمچه‌لیک‌لری بیلن قیمت قیله‌دیلر.»
باشقه تاماندن، دکاندارلردن بیرقطاری نینگ ایتیشلریچه، توارلر نرخینی آشیریشمه‌گن، بلکه پول نرخی قیمت یا که کمه‌یشی بیلن توارلر نرخی اوزگره‌دی.
اولر گه کوره، توارلرنی بلدیه اداره‌سی نینگ نرخ‌نامه‌سی اساسیده ساته‌دیلر و بویوک بازارلرده بیر قطار توارلر نینگ نرخی آشگن.
دکاندارلردن شیرجان نینگ ایتیشیچه: «بیز مصرف و فایده‌میز گه قره‌ب ساته‌میز. بلدیه اداره‌سی تامانیدن نرخ‌نامه بیریلگن اونگه قره‌ب ساته‌میز.»
عین‌حالده، ارزگان معلومات و مدنیت باشلیغی آقاولی قریشی گه کوره، بو ولایت ده افغانی پول رواجلنیشی بیلن ییگولیک و باشقه توارلر قیمتینی هر کون کنترول قیلیش اوچون مخصوص کمیته شکللنگن.
بیزلرنینگ «ایکس» ترماغی ده هم تعقیب قیلینگ!
قریشی جنابلری گه کوره، نرخ‌نامه گه اعتبار بیرمه‌گن دکاندارلر بیلن قانونی یانده‌شیلیب و حتا قولگه آلینیش‌لری ممکن.
او نینگ کوپه‌یتیریشیچه: «افغانی پول رواجلنیشی اوچون مخصوص کمیته شکللنگنی کبی، نرخ-نوالرنی کنترول قیلیش اوچون مخصوص کمیته شکللنگن. نرخ‌نامه گه اعتبار بیرمه‌ی و توارلرنی قیمت ساتگن‌لر بیلن قانونی یانده شیله‌دی. دکان‌لری یاپیلیب و اوزلری قولگه آلینه‌دیلر. نرخ‌نامه کمیته‌سی تامانیدن قانونی و قضایی ارگان‌لر گه تانیشتیریلیب و حبس گه آلینیش‌لری ممکن.»
ایتیش کیره‌ک، ارزگان کبی مملکت نینگ کوپ سانده جنوبی ولایت‌لریده آلیش-بیریش بوندن آلدین پاکستانی کلداری بیلن معامله بولردی، بیراق سونگی کون‌لرده بو ولایت ده برچه آلیش-بیریش افغانی پول بیلن معامله بوله‌دی و یشاوچیلر افغانی پول رواجلنیشیدن خورسندلر.
