کابل یشاوچیلریدن بیرقطاری، حکومت اداره‌لریده بروکراسی‌لیک (قاغذ پرانلیک) دن شکایت قیلیب ایتیشلریچه، مکتوب‌لرینی قانونی‌لشتیریش اوچون آی‌لر سرگردان بوله‌دیلر.
کابل بیلیم یورتی ادبیات فاکولته‌سیدن فارغ بولگن تمنا دانش نینگ ایتیشیچه، بیر ییل دن بویان ترانسکریپ و دیپلومینی آلیشنی کوتماقده دیر. «دیپلوم و ترانسکریپ آلیش اوچون کابل بیلیم یورتی گه باردیک؛ باش اول بیز گه عریضه بیرمه‌دی؛ عریضه نی قانونی‌لشتیردیک، بیر امضا اوچون نیچه کیشی آلدی گه باردیک، امضا ناتوغری بولگنده ایدی، عریضه نی باش دن قانونی‌لشتیرر ایدیک.» برچه سعی‌وحرکت‌لر بیلن او ترانسکریپ و دیپلوم آلالمه‌گن، او اوشبو وضعیت دن نالیب ایتیشیچه: «مراجعت قیلگنده ایرته کیل دییر ایدیلر. نیچه کون اوشبو مرحله نی اوتکزدیک و بیلیم یورت‌لر قیزلر یوزی گه یاپیلدی، دیپلوم و ترانسکریپ آلاله‌میز می یوق بیللی ایمس.»
بیزلرنینگ فیسبوک صحیفه‌میزگه باش اورینگ!
کابل یشاوچیلریدن باشقه بیری ناصر گه کوره، تامی اوستیده بیر قوت کوتاریش اوچون بلدیه ریاستی دن جواز آلیش گه نیازمند دیر؛ بیراق ایکی آی دن بویان جواز آلیش اوچون مذکور اداره دفترلری گه سرگردان بولیب و حاضرگچه جواز آلالمه‌گن. «ایکی قوتلی اوییم بار، بیراق باشقه بیر وقت کوتاریشنی ایسته‌ی من و بلدیه ریاستی نینگ جوازی گه احتیاجیم بار. کابل بلدیه‌سیگه باردیم ناحیه بار دیب بویردی، ناحیه باردیم بلدیه بار دیدیلر، بلدیه باردیم انشاآت ریاستی گه یوباردی، ایکی آی دن بیری سرگردان من؛ لیکن حاضرگچه بلدیه دن بیر حکم آلگنیم یوق.»
شونینگدیک، کابل یشاوچیلریدن باشقه بیری فواد، سکیز آی آلدین نکاح‌خط اوچون کابل شهری محکمه‌لریدن بیری گه مراجعت قیلگن ایتیشیچه: «سکیز آی آلدین نکاح‌خط اوچون کابل شهری محکمه‌لریدن بیری گه مراجعت قیلگن ایدیم، بیروکراسی‌لیک اوچون آلیش دن واز کیچدیم. اسلام امیرلیگی دن اداره‌لرده یشاوچیلر نینگ مکتوب‌لرینی قانونی‌لشتیریش اوچون قولی‌لیک یره‌تیشینی ایسته‌یمیز.»
عین‌حالده، اسلام امیرلیگی سوزلاوچیسی نینگ اورین باسرلریدن بلال کریمی گه کوره، حکومت اداره‌لریده بروکراسی‌لیککه چیک قوییش اوچون مکتوب‌لرنی قانونی‌لشتیریش ایشلرینی الکترونیکی قیلیش مقصدیده سعی‌وحرکت قیلماقده‌لر.
بیزلرنینگ توییترده هم تعقیب قیلینگ!
او نینگ کوپه‌یتیریشیچه: «مکتوب‌لرنی قانونی‌لشتیریش ایشلری الکترونیکی بولیش اوچون تلاش قیلماقده‌میز و اسلام امیرلیگی ده یشاوچیلر ایشینی قانونی‌لشتیریش اوچون آسان‌خدمت اداره‌سی فعالیت قیلماقده و فسادلی بولگن بیروکراسی تیکشیریله‌دی و یشاوچلیر شکایت‌لرنی تینگلش کمیسیونی گه شکایت‌لرینی ثبت ایته آله‌دیلر.»
افغانستان ده نیچه سنه دن بویان، بیروکراسی و اداری ایسکی سیستم یشاوچیلر گه عمومی خذمت کورسه‌تیش جریانینی قیینلشتیریب و ایریم موردلرده، بیر کون ده بوله‌دیگن ایش، هفته‌لر دوام تاپیشی گه سبب بوله‌دی.
