اوتگن کیچه ساعت ۹ ده کابل شهر نینگ ۱۷- حوزه‌سیده یانغین یوز بیریب و نتیجه‌ده کوپ قطار تیل تانکرلری اوت آلگن.
تیل ایسی و اوت آلگن تانکرلر فضانی آلگن، اونینگ چیککه‌سیده اهالی‌دن بیرقطار وضعیت‌نی تماشا قیلیش و باشقه بیرقطاری ایسه هیداووچی‌لرگه یاردم بیریش اوچون یانغین یوز بیرگن محلگه توپلنگن‌لر. اولردن بیرقطاری دقت‌سیزلیک بیلن اوت آلگن تانکرلرنینگ پارچه‌لرینی توپلماقده.
تیل تانکری نینگ هیداووچی‌سینی تانکر بیلن بیرلیکده اوت آلگنی فاجعه‌لی وضعیت دیر. واقعه گه گواه بولگن‌لرنینگ ایتیشلریچه، مذکور تانکرلردن کوپ قطاری نینگ هیداووچی‌لری اوت آلیب و جان‌لرینی قولدن بیرگنلر.
واقعه یوز بیرگن ساحه نینگ اطرافیده بولگن کوپ قطار اوی‌لر، رستورانت‌لر و بیر تیل تانگی زیان کورگن.
کابل پولیس قومندانلیگی نینگ ایتیشیچه، تیل تانکرلریدن بیری نینگ اوت آلگنی سبب، بو واقعه یوز بیرگن، لیکن عینی شاهدلرنینگ ایتیشلریچه، بو واقعه مقناطیسی ماین پارتله‌گنی سبب یوز بیرگن. شونینگدیک، گواه‌لردن باشقه بیر قطاری‌گه کوره، تیک‌اوچر تامانیدن مذکور تانکرلرگه قرشی اوق آتیلگن.
کابل پولیس قومندانلیگی سوزلاوچیسی فردوس فرامرز نینگ ایتیشیچه، یانغین قنده‌ی یوز بیرگنینی بیللی قیلیش اوچون تیکشیریش‌لرنی دوامی بار.
اوشبو یانغین سوداگرلر و نفتی ماده وارد قیله‌دیگن‌لرنینگ جدی تنقیدلری بیلن دوچ کیلگن. صناعت و سوداگرلیک اتاقی مسوول‌لری نینگ آگاه‌لنتیریش‌لریچه، بو واقعه عامل نینگ تیزلیک بیلن بیللی ایتیلیشی کیره‌ک.
اولرنینگ ایتیشلریچه، بو واقعه جدی شکلده تیکشیریلمه‌گن صورتده، مملکتده نفتی ماده وارد قیلمه‌یدیلر.
بو بیرینچی مرته ایمس دیر کیم، نفتی ماده تانکرلری اوت آله‌دی، بوندن آلدین هرات نینگ اسلام‌قلعه گمرکی‌ده گاز ذخیره‌گاهی اوت آلیب و سوداگرلرگه کوپینچه مالی زیان ییتیشتیرگن ایدی.
