اوچ سناتور ۴۰ مینگ دالر رشوه آلیش اوچون اوشلنگنیدن بیر کون کیین، بویوکلر کینگشی اوشبو واقعه خصوصیده کوپینچه معلومات کینگش گه بیریلمه‌گنی نی بیلدیرگن.
گرچند اوتگن کونی (دوشنبه) ملی خوفسیزلیک ریاستی و باش‌قاره‌لاوچیلیک اداره‌سی بیر قوشمه اعلامیه ترقه‌تیب، افغانستان ملی اسلامی جمهوریت اساسی قانونی نینگ ۱۰۲- ماده‌سی گه اساسا قضیه حقیده بویوکلر کینگشی گه مکتوبی شکلده معلومات بیریلگنیدن خبر بیرگن ایدی، لیکن بویوکلر کینگشی بوگون (سه‌شنبه، ۹- جدی) بیر اعلامیه آرقه‌لی اوشبو موضوع نی رد ایتیب و افغانستان اساسی قانونی نینگ ماده‌سی رعایت ایتیلیشی نی سوره‌گن.
افغانستان اساسی قانونی نینگ ۱۰۲- ماده‌سیده گوره، اگرده بویوکلر کینگشی نینگ عضوی جرم گه عیبلنیب اوشلنگن حالده، مسؤل بولگن مأمور کینگش گه عیبلنگن عضو حقیده معلومات بیریشی لازم و عیبلنگن عضو عدلی نهاد تامانیدن تیکشیریله‌دی.
اوتگن کونی بلخ ولایتی نینگ حاکمی محمد فرهاد عظیمی ۳ سناتور رشوه آلگنی اوچون اوشلنگنیدن خبر بیردی. جناب عظیمی نینگ ایتیشیچه، سنا مجلسی‌دن ۳ کیشی‌لیک هیأت درآمد کیلتیره‌دیگن اداره‌لرنی تیکشیریش اوچون اوشبو ولایت گه کیلیب، لیکن حیرتان بندری دن رشوه آلیش پیتده اوشلنگن‌لر.
اوشبو ۳ سناتور، بویوکلر کینگشی نینگ اقتصاد کمیسیونی اعضاسی بولگن‌لر.
باش‌قاره‌لاوچیلیک اداره‌سی و ملی خوفسیزلیک ریاستی تامانیدن ترقه‌تیلگن گزارش گه کوره، فاریاب ولایتی نینگ سناتوری محمد انور باشلیق، سرپل ولایتی نینگ سناتوری محمد عظیم قویاش و خوست ولایتی نینگ سناتوری لیاقت الله بابکرخیل بلخ ولایتیده رشوه آلیش پیتده اوشلنگن.
جمهورلیک ریاستی نینگ ایتیشیچه، جمهور رئیس محمد اشرف غنی، انتصابی سناتور بولگن محمد انور باشلیق و لیاقت الله بابکرخیل نینگ عضویتی بویوکلر کینگشی دن لغو ایتگن.
