جرم، جامعه قانون_قاعده‌لری گه قرشی قبول قیلینگن جنایت یا که حرکت دیر که انده_سنده آدم‌لر گه زیان ییتکیزیب و ایریم پیت‌لرده هم انسان‌لر نینگ نابود بولیشی گه سبب بوله‌دی، جنایی جرملر بیر دولت نینگ کوچ و ضعیف‌لیگی، اقتصادی و فرهنگی وضعیتی گه باغلیق دیر که هر جامعه ده فرق قیله‌دی.
بیراق افغانستان ده سونگی نیچه سنه‌ده‌گی اوروش‌لر، اقتصادی امکانیت‌لردن محروم سیزلیک، آدم‌لر نینگ سوادسیزلیگی باعث، جنایی جرملر هردایم اولکه یشاوچیلریدن قربان‌لیک آله‌دی.
اوشبو گزارش ده سونگی نیچه آی‌ده جنایی جرملر کوپه‌یشی و عامل‌لری قولگه آلینیشی خصوصیده دولت نینگ بی فرق‌لیگی، جنایی حجت‌لر تیکشیریلیشی گه دایر جبر دیده‌لر نینگ رضایتینی عکس ایتتیره‌میز.
سلام‌وطندار نینگ معلوماتی اساسیده، ۴۰ کونده ۱۰-سرطان‌دن ۱۹-سنبله‌گچه افغانستان نینگ ۱۸ ولایتی‌ده ۴۵ جنایی واقعه گزارش بیریلگن که نتیجه‌ده، ۳۸ ایرکک، ۹ عیال و ۴ باله شامل ۵۱ کیشی هلاک بولیب و ۳۸ کیشی ایسه یره‌لنگن.
بیزلرنینگ فیسبوک صحیفه‌میزگه باش اورینگ!
قطار ولایت‌لرده یوز بیرگن جنایی واقعه‌لر
۴۰ کون ایچیده رویخط گه آلینگن جنایی واقعه‌لر آره‌سیده، افغانستان شمالی‌ده جایلشگن فاریاب ده ۷ جنایی واقعه ثبت بولیشی باعث، اوشبو ولایت بیرینچی اورین ده قرار تاپگن.
فاریاب: فاریاب ده ثبت بولگن ۷ جنایی واقعهده؛ ۱۲ و ۱۶-سنبلهده یوز بیرگن اَیری ایکی واقعهده، ناتانیش قوراللی کیشی‌لر تامانیدن ایکی کیشی هلاک بولگن. ۲۸-اسد، ۱۵ و ۲۳-سنبلهده یوز بیرگن باشقه اوچ واقعهده عایله‌لری تامانیدن تورت کیشی هلاک و ۲۸-اسدده یوز بیرگن باشقه بیر واقعهده ایسه بیر کیشی اشتباهی شکلده اولدیریلگن و سونگی بیر واقعهده ایسه، بیر کیشی نینگ جسدی اوغیرلنگنی‌دن کیین، ۱۸-اسدده تاپیلگن.
هرات: هرات ولایتی‌ده ۱۰-اسددن ۱۹-سنبله‌گچه یوز بیرگن ۶ جنایی واقعهده، ۱۰، ۱۳ و ۲۳-اسدده اوچ قتل واقعه‌سی، ۸-سنبلهده قتل گه اقدام قیلینگن بیر واقعه و انسان قاچاقی و انسان ساتیشی خصوصیده ایکی واقعه اوشبو آی نینگ ۱۲ و ۱۳ تاریخی‌ده ثبت بولگن که، اوشبو واقعهده بیر کیشی هلاک و اوچ کیشی یره‌لنگن.
غور: ۱۰-اسددن ۱۹-سنبله‌گچه، ۵ جنایی واقعهده ثبت بولگن؛ بیرینچی واقعه ۱۵-سنبلهده عایله‌لر آره‌سیده‌گی جنجل سبب یوز بیرگن که، نتیجه‌ده بیر کیشی هلاک بولگن. ۱۱، ۱۲ و ۲۵-اسدده یوز بیرگن باشقه واقعهده، اوچ کیشی هلاک و ۱۶-سنبلهده اوشبو ولایتده ۷ یاشر قیز نینگ جنسی زولنگنی گه دایر بیر واقعه ثبت بولگن.
بادغیس: بادغیس ده ۱۰-اسددن ۱۹-سنبله‌گچه ثبت بولگن ۴ واقعهده، ۲- و ۴-سنبلهده یوز بیرگن ایکی واقعهده عایله‌وی جنجل نتیجه‌سیده ایکی کیشی هلاک بولیب و بیر کیشی یره‌لنگن.
۱۰- و ۱۸-اسدده اوشبو ولایتده یوز بیرگن باشقه ایکی واقعهده، ناتانیش قوراللی کیشی‌لر تامانیدن ایکی کیشی هلاک بولگن.
پکتیا: اوشبو ولایتده ۱۸-اسد و۲- و ۱۲-سنبلهده تورت جنایی واقعه قید ایتلیگن که، اوشبو واقعه‌لرده ۵ کیشی هلاک و ۲۳ کیشی یره‌لنگن.
مذکور ولایتده یوز بیرگن جنایی واقعه‌دن باشقه بیری‌ده، ایکی کیشی هلاک و ۷ کیشی یره‌لنگن.
پروان: ۶- و ۱۰-سنبلهده قوراللی کیشی‌لر تامانیدن اوچ کیشی هلاک و ۴-سنبلهده بیر کیشی ایناغه‌سی تامانیدن هلاک بولگن.
لوگر: لوگر ده ۱۹-اسدده یوز بیرگن الاحیده اوچ واقعهده، اوچ کیشی ناتانیش قوراللی کیشی‌لر تامانیدن اولدیریلگن.
ننگرهار: ۱۴-و ۱۵-اسدده ننگرهار ده یوز بیرگن اَیری ایکی واقعهده، ایکی کیشی ناتانیش قوراللی کیشی‌لر تامانیدن هلاک بولگن و ۱۳-اسدده یوز بیرگن باشقه بیر واقعهده، اوچ کیشی عایله اعضالری تامانیدن اولدیریلگن.
شونینگدیک ۱۶-سنبله بامیان ده، ۸-سنبله کابل ده، ۹-سنبله ارزگان ده، ۲-سنبله سمنگان‌ده، ۳-سنبله فراه ده، ۲۹-سنبله خوست ده، ۱۳-اسد دایکندی ده، ۲۱-اسد پنجشیر ده، ۲۰-اسد هلمند ده و ۱۳-اسد کاپیسا ده یوز بیرگن الاحیده واقعه‌لردن گزارش بیریلگن که، اوشبو واقعه‌لرده ۱۳ کیشی هلاک بولیب و ۱۲ کیشی یره‌لنگن. مذکور واقعه‌لر آره‌سیده عیاللر برابریده زوره‌وانلیک و قتل هم شامل دیر.
ولایت‌لرده حجت‌لر تیکشیریلیشی گه دایر نظر
سلام‌وطندار ۱۰_اسددن ۱۹_سنبله‌گچه یوز بیرگن جنایی واقعه‌لرنی ثبت قیلگنیدن کیین، اولرنینگ دوسیه‌لری تیکشیریلگنی خصوصیده رضایتلری نی بیلماق اوچون اولر بیلن ارتباط قورگن. بو آره ده قربان بولگنلر نینگ عایله و قرینداش‌لریدن یالغیز اون عایله دوسیه‌لری نینگ قنچه و قنده‌ی آلغه کیتگنی خصوصیده سلام‌وطندار بیلن شریک قیلیش اوچون صحبت گه حاضر بولگنلر که اولردن ۴ عایله کیم‌لیکلری سِر قالیش نی ایسته‌گن.
جبر دیده عایله‌لردن باشقه‌لری، سلام‌وطندار بیلن صحبت قیلمه‌ی یا_ده کوپینچه سعی و حرکت بیلن ارتباط قوره‌آلمه‌دیک.
مصاحبه گه حاضر بولگن عایله‌لر عدالت تامین‌لنمه‌گنی و دوسیه‌لری نینگ پروسه‌سی حکومت تامانیدن درست بیر شکلده تیکشیریلمهگنیدن شکایت قیله‌دیلر.
فاریاب: سلام‌وطندار فاریاب ده یوز بیرگن ۷ جنایی واقعه‌دن، یالغیز زیان کورگنلردن بیری بیلن صحبت قیلیش گه موفق بولدی.
فاریاب نینگ شیرین‌تگاب تومنی‌ده ناتانیش قوراللی کیشی‌لر تامانیدن هلاک بولگن قوماندان جلیل قرینداش‌لری نینگ ایتیش‌لریچه، قاتل حاضرگچه قولگه آلینمه‌گن. اونینگ قرینداش‌لریدن بیری سلام‌وطندار گه ایتگن که، قاتل بیللی دیر؛ لیکن مذکور تومن محکمه‌سیده نفوذی بارلیگی سبب، حاضرگچه قولگه آلینمه‌گن.
بوندن آلدین، فاریاب خوفسیزلیک مسئوللری، ایناغه‌سی تامانیدن اولدیریلگن سینگیل نینگ دوسیه‌سی تیکشیریلگنی و متهم نینگ قولگه آلینگنی و ۷۰ یاشر کیکسه نینگ اولدیریلگنی خصوصیده اونینگ اوغلی قولگه آلینگنیدن خبر بیرگنلر.
هرات: هرات ده ثبت بولگن واقعه‌لردن، اولدیریلگن کیشی نینگ عایله‌سی عدالت تامین بولمه‌گنی خصوصیده شکایت قیلیب و حاضرگچه هیچ کیم قولگه آلینمه‌گنی نی بیلدیرگن. باشقه جنایی واقعه‌لر اوچون، هرات امنیه قوماندانلیگی مسئوللری سلام‌وطندار گه، متهم‌لر نینگ عدلی و قضایی نهادلر گه معرفی قیلگنلری نی ایتگنلر.
هرات ده قربان بولگنلر نینگ یقین‌داشلریدن بیری فریدون نینگ ایتیشیچه: «قوماندانلیککه باردیک، استخبارات گه باردیک، سوز بیره‌دیلر؛ لیکن قاتل هیچ قولگه آلینمه‌یدی. قنده‌ی شهر نینگ ایچیده بیری اولدیریله‌دی، اما قاتل قولگه آلینمه‌یدی؟»
- هرات یشاوچیلری اوشبو ولایتده جنایی جرملر و ناتینچ‌لیکلر کوپه‌یگنیدن خواطر بیلدیریشگن
- کابل شهری نینگ یشاوچیلریدن قطاری جنایی جرملر کوپه‌یگنی توغریسیده خواطر بیلدیریشگن
- ایچکی ایشلر وزیرلیگی نینگ مسئوللری: ۹۰ فایز اهالی خوفسیزلیک وضعیتدن راضی دیر
غور: سلام‌وطندار غور ده یوز بیرگن جنایی واقعه‌لرده قربان بولگنلر نینگ اقارب‌لریدن بیری بیلن تماس آلیش گه موفق بولدی که، مذکور کیشی جینی نینگ قتل دوسیه‌سی تیکشیریلمهگنیدن شکایت قیلگن.
ناتانیش قوراللی کیشی‌لر تامانیدن اولدیریلگن مولوی عبدالمتین عایله اعضالریدن بیری نینگ سلام‌وطندار گه ایتیشیچه، نیچه مرته حکومتی ارگان‌لر گه مراجعت قیلگن؛ بیراق حاضرگچه اولر نینگ دوسیه‌لری تیکشیریلمه‌ی و اوشبو واقعه گه تیگیشلی هیچ کیم قولگه آلینمه‌گن.
غور محلی مسئوللری نینگ ایتیش‌لریچه، مذکور ولایتده یوز بیرگن بیش واقعه‌دن، اوچ واقعه گه تیگیلشی متهم‌لر قولگه آلینیب و دوسیه‌لری جریان‌ده دیر؛ باشقه ایکی مورد ده ایسه حاضرگچه هیچ کیم قولگه آلینمه‌گن.
بادغیس: بادغیس ده یوز بیرگن ۴ جنایی واقعه‌دن، مسئوللر ایکی واقعه گه تیگیشلی متهم‌لر نینگ قولگه آلینگنیدن خبر بیرگنلر و شونینگدیک، قولگه آلینگن متهم روانی کسللیگی سبب، اوی‌ده سقلنه‌دی و تورتینچی واقعهده ایسه، مذکور معلومات نینگ سلام‌وطندار گه ارائه بولگنی‌قدر، اسلامی امارت هیچ کیم نی قولگه آلمه‌گن.
شونده‌ی بیرحالده، بادغیس ده ۲۳ یاشر بیر ییگیت نینگ اولدیریلگنی خصوصیده قرینداش‌لری مذکور جنایی واقعه گه تیگیشلی حکومت نینگ توجه‌سیزلیگی‌دن ناراض‌لر.
مذکور واقعهده قربان بولگن نینگ اقارب‌لریدن بیری، کیم‌لیگی سِر قالیش نی ایسته‌ب سلام‌وطندار گه ایتیشیچه: «اوشبو قضیه‌دن کوپ زمان اوتگن؛ بوتوغریده دولت بی فرق و هر مرته اوشبو کیشی نینگ دوسیه‌سی تکمیل بولمه‌گنی نی ایته‌دیلر. پس قچان تکمیل بوله‌دی؟»
پکتیا: پکتیا یشاوچیسی سیف‌الله اوشبو ولایت زرمت تومنی‌ده یوز بیرگن واقعهده عایله اعضاسیدن ایکی کیشی هلاک بولیب و ۷ کیشی یره‌لنگن. او قاتل نینگ قولگه آلینمه‌گنی خصوصیده شکایت قیلیب، سلام‌وطندار گه ایتیشیچه: «اوشبو اوچ کیشی حاضرگچه قولگه آلینمه‌گن؛ شو ییرده اوزلری نی یاشیریب یورگنلر.»
پروان: پروان ده جنایی واقعه گه تیگیشلی عیب‌لنگن اوچ کیشی، ینگی‌لیکده حکومت تامانیدن بی‌گناه تانیلیب و قوییب یوباریلگنلر که، زیان کورگن عایله نینگ ناراضلیگی گه سبب بولگن. پروان ده یوز بیرگن ایکینچی جنایی واقعهده، زیان کورگن عایله عدالت تطبیق بولیشی نی ایسته‌یدی.
پروان ده یوز بیرگن جنایی واقعه‌لردن بیری‌ده زیان کورگن حسیب‌الله نینگ ایتیشیچه: «قوراللی کیشی‌لر دستلب اونی کلتکلب و کیین اونی شهید قیلگنلر.»
شونینگدیک زیان کورگنلردن باشقه بیری محمدرضا نینگ ایتیشیچه: «آته و آنه‌سی تحمل قیله‌آلمه‌یدیلر. اسلامی امارت‌دن قاتل‌لر نی تاپیب و جزالنتیریلیشی نی ایسته‌یدیلر.»
لوگر: لوگر ده یوز بیرگن اوچ جنایی واقعهده زیان کورگنلر، دوسیه‌لری نینگ تیکشیریلمهگنیدن شکایت قیله‌دیلر.
نعمت‌الله، لوگر ده اولدیریلگن‌کیشی نینگ عایله اعضالریدن بیری دیر. اونینگ ایتیشیچه: «زیان کورگن عایله نیمه جرم گه اولدیریلگنی بیللی بولمه‌گنی خصوصیده تشویش‌ده‌لر! حکومت بو توغریده توجه قیلیشی کیره‌ک.»
کاپیسا: کاپیسا ده اسلامی امارت کوچلری نینگ رنجری بیر باله نی باسیب اولدیرگن ایدی، مسئوللر اوشبو دوسیه نینگ تیکشیریلگنی نی ادعا قیله‌دیلر؛ بیراق اولدیریلگن باله نینگ عایله‌سی سلا‌وطندار بیلن صحبت قیلمه‌گن.
سلام‌وطندار اوشبو گزارش ده بیان بولگن باشقه جنایی جرم‌لرده زیان کورگنلر بیلن علاقه قوریش گه موفق بولمه‌یدی و شونینگدیگ زیان کورگنلردن باشقه بیر قطاری امنیتی تهدیدلر سبب، صحبت قیلیش گه حاضر بولمه‌دیلر.
اسلامی امارت سرپرست حکومتی نینگ عالی محکمه مسئوللری، گرچند اوشبو دوسیه‌لر تیزلیک بیلن تیکشیریلمسلیگینی قبول قیله‌دی؛ لیکن اوشبو برچه دوسیه‌لر تیکشیریلشیدن ایشانچ بیلدیرگن.
اسلامی امارت سرپرست حکومتی عالی محکمه‌سی نینگ معلوماتی مسئولی عبدالرحیم راشد نینگ سلام‌وطندار گه ایتیشیچه، جنای جرملر گه عاید دوسیه‌لر کوپ‌لیگی، اوشبو پروسه نینگ بیراز مدت آلیشی گه سبب بولگن و شونینگدیگ جنایی جرملر خصوصیده‌گی دوسیه‌لردن قطاری جمهوریت‌دن میراث قالگن. «قتل‌لر، اوغیرلاوچیلیک و آدم اوغریلیک کبی دوسیه‌لر، دیوان جزا گه تیگیشلی دیر. دوسیه‌لردن بیر قطاری عامه امنیت گه تیگیشلی؛ بیراق دیوان جزا و عامه امنیتی دیوانی خصوصیده‌گی دوسیه‌لر نی تیکشیریش، اوچ هفته الی بیر آی وقت آلیشی ممکن.»
اونگه کوره، اسلامی امارت نینگ قدرت گه ایریشگنیدن اوشبو ییل نینگ ۱_ سنبله‌گچه، قضا دستگاه‌سی، جنایی جرملر شامل ۴۰ مینگ دوسیه تیکشیریلگن.
شونده‌ی بیرحالده، افغانستان یشاوچیلری سونگی آی‌لرده جنایی جرملر کوپه‌یشیدن شکایت قیلگنلر.
ایچکی ایشلر وزیرلیگی سوزلاوچیسی عبدالنافع تکور نینگ سلام‌وطندار گه ایتیشیچه: «اوتمیش ییل‌لر گه قره‌گنده جنایی جرملر کمه‌یگن و جرم اجتماعی بیر پدیده دیر که، مکمل شکلده اورته‌دن کیتمه‌یدی. کونده مملکت بویلب اونلرچه مجرم نی قولگه آله‌میز و عدلی و قضایی نهادلر گه تسلیم بیره‌میز.»
بیزلرنینگ توییترده هم تعقیب قیلینگ!
تکور نینگ ایتیشیچه، حاضر اوشبو وزیرلیگ مجرم‌لر نی آسان بیر شکلده تانیلیشی اوچون بیر طرح اوستیگه ایشله‌یدی؛ بیراق او، بو توغریده کوپینچه معلومات بیرمه‌یدی.
باشقه بیر تاماندن، اسلامی امارت تامانیدن لغو بولگن افغانستان انسان حقوقی کمیسیونی‌ده مسئوللر، جنایی جرملر وضعیتی و حاضرگی حکومت آرقه‌لی اوشبو قضیه‌لر نینگ تیکشیریلیشی خصوصیده خواطرده‌لر.
سابق حکومت‌ده افغانستان انسان حقوق کمیسیونی اورین‌باسری محمد‌نعیم نظری نینگ سلام‌وطندار گه ایتیشیچه: «ناتینچ‌لیک نینگ یامان‌لنگنی و قضیه‌لر نینگ کوپه‌یشی بیلن یشاوچیلر نی فیزیکی امنیت تهدید قیلیشی گه گواه‌میز. اوشبو واقعه‌لر یوز بیرگن پیتده، قیغو بیلن اسلامی امارت تامانیدن درست بیر شکلده دوسیه‌لر تیکشیریلمه‌یدی.»
قشاق‌لیک، ایش‌سیزلیک و حاکمیت یوقلیگی مملکت‌ده جنایی جرملر نینگ کوپه‌یشی گه سبب بولگن دیب عنوان قیلینگن.
ایتیش کیره‌ک که، سلام‌وطندار تامانیدن ۴۰ کون ایچیده ثبت قیلینگن جنایی جرملر گه برچه قضیه‌لر کیریتیلمه‌گن. شونگه اوخشه‌گن واقعه‌لر بیر آی جریانیده باشقه ولایت‌لرده هم یوز بیرگن که اوشبو واقعه‌لردن بیر قطاری رسانه‌یی یا_ده رسانه‌لر آرقه‌لی ترقه‌تیلیشی نی ایستمه‌گنلر.