نجیبه اوتگن کون کابل شهری نینگ غربی قسمیده جایلشگن «کاج تعلیمی مرکزی» ده اویوشتیریلگن خودکش هجوم ده، اونلب همقطاری بیلن هلاک بولگنلردن بیری دیر.
او اوتگن کون (جمعه، ۸ میزان)، برچه آرزو و هوسی بیلن کاج تعلیمی مرکزی ده کانکور تستی ده اشتراک ایتگن ایدی که قانلی خودکش هجوم ده هلاک بولدی.
قیزی نجیبه نینگ قیغوسیگه چومگن آنه‌سی عزیزه نینگ ایتیشیچه، نجیبه نینگ چیزگن نقاش‌لری و قول یازمه‌لرینی کورگن حالده، صبری توگب و طاقتی تاق بوله‌دی. اونگه کوره: «چیزگن نقاش‌لرینی کوره‌من نجیبه ایسیمگه کیله‌دی، قلم‌لرینی کوره‌من نجیبه ایسیمگه کیله‌دی، بو کیچه تانگ آتگونچه کوزیم آلدیده ایدی، بو کیچه ایرته لبگچه نجیبه اوچون اویخیم کیلمه‌دی.»
بیزلرنینگ فیسبوک صحیفه‌میزگه باش اورینگ!
اتاق نینگ باشقه بیر چیتیده اولتیرگن نجیبه نینگ آته‌سی عوض‌علی، قیزی نینگ دایمی یوقاتیشیدن آه تارتیب ایتیشیچه، قیزی آدم‌لرنی درمانلش اوچون شفاکار بولیش‌نی ایستر ایدی، لیکن بو هجوم اونی برچه رویالری و حیاتی گه چیک قویدی.
عوض‌علی بو گَل هجوم‌لرگه نقطه قوییلیشینی طلب قیلیب و حادثه عامل‌لری تیزلیک بیلن محکمه گه تارتیلیشی گه امید بیلدیره‌دی. عوض‌علی نینگ ایتیشیچه: «تاجیک، پشتون، اوزبیک، هزاره و تورک برچه‌میز افغانستان‌لیک میز، نیگه اوز سینگیل و ایناغه‌لرینگیزنی نشانگه آلیب اولدیره‌سیزلر، بو جنایتچیلر قولگه آلینیب و محکمه بولیش‌لرینی ایسته‌یمیز.»
نجیبه بیر ییل دن کوپراق کانکور سیناوی گه اشتراک ایتیشنی کوتماقده ایدی؛ او اوز تنله‌گن غایه‌لری گه ایریشیش اوچون کاج تعلیمی مرکزی ده کانکور تستی ده اشتراک ایتیب و او ییرده اویوشتیریلگن خودکش هجوم عاقبتیده هلاک بولدی.
نجیبه نینگ سینگلیسی زینب گه کوره، هزاره‌لر نینگ تعلیمی مرکزلریده بو گَل هجوم‌لر اویوشتیریلیشی بیلن او و باشقه هزاره قیزلر، هر قنده‌ی شرایط ده تعلیم‌لری گه دوام بیریشه‌دی.
کابل غربی قسمی دشت برچی، نیچه ییل دن بویان قانلی واقعه‌لر گواهی دیر؛ بو هجوم‌لر کوپراق تعلیمی مرکزلرده اویوشتیریلیب تینچ اهالی اینیقسه اوقووچیلردن قربان‌لیک آلگن.
کاج تعلیمی مرکزی ده اویوشتیریلگن هجوم، کابل غربی ده‌گی ینگی قانلی هجوم‌لردن سنله‌دی.
بیزلرنینگ توییترده هم تعقیب قیلینگ!
کانکور تستی آلینیشی پیتیده اویوشتیریلگن هجوم ده اکثریتی قیزلر بولگن اونلب اوقووچی هلاک بولیب و یره‌لنگنلر.
اولردن قطاری مذکور تعلیمی مرکز نینگ دیوارلری دن سکره‌ب اوتیشی بیلن آمان قالگنلر.
حادثه گواه‌لری نینگ ایتیشلریچه، خوفسیزلیک کوچلر واقعه دن کیین، یره‌دارلر و قربان‌لر نینگ جسدینی انتقال بیریش گه مانع بولیشگن.
رسمی معلومات‌لر گه بناً، ۲۳ کیشی اولیب و ۳۵ کیشی یره‌لنگن اوشبو هجوم مسئولیتینی حاضرگچه هیچ کیم یا گروه اوز زمه‌سیگه آلمه‌گن.
اوتگن ایکی سنه ده، کابل نینگ غربی قسمیده بو گَل واقعه‌لر یوز بیریب و یوزلرچه کیشی نینگ اولیب و یره‌لنیشیگه سبب بولگن؛ لیکن عامل‌لری قولگه آلینیشی مقصدیده حاضرگچه اقدام بولمه‌گن.
