افغانستان گه تاووق گوشتینینگ وارد قیلووچی اینگ بویوک منبع بولگن پاکستان چیگرهلری یاپیلگنیدن کیین، مملکتده بو محصول قیمتی سیزیلرلی درجهده آشگن. بلخ ولایتی یشاوچیلریدن قطارینینگ ایتیشیچه، پاکستان دن تاووق گوشتی وارد بولیشی توختهتیلگنی بیلن، بیر کیلو تاووق گوشتینینگ قیمتی ۳۲۰ افغانیگچه ییتیشگن.
بلخ مرکزی مزارشریف شهری یشاوچیلریدن حامدنینگ ایتیشیچه، پاکستان چیگرهسی یاپیلگنیدن کیین قوی گوشتیگه نسبت، تاووق گوشتی قیمتی آشگن. «بیر کیلو تاووق گوشتینی ۳۲۰ افغانیگچه ساتیب آلدیک. باشقه چاروهلر گوشتیدن فایدهلنیشگه امکانیتیمیز ییتیشمهیدی؛ انه شوو تاووق گوشتی اقتصادیراق دیر. دولتدن قیمتلرنینگ کنترول بولیشیگه توجه قیلیشلرینی ایستهیمیز.»
شونینگدیک مزارشریف شهری یشاوچیلریدن باشقه بیری جمشید، مملکتده ییتیشتیریلهدیگن تاووقلرنینگ صفتی و پاکلیگی توغریسیده صحبت قیلیب و ایتیشیچه: «مملکتده ایشلب چیقریلهدیگن گوشت، صفت و پاکلیک نقطهی نظریدن یخشی دیر، چونکه مملکتده ییتیشتیریلهدی و بیریلهدیگن دانهلر توغریسیده هم آگاهیلیگیمیز بار. قوریلگن فارملر مملکت اقتصادی ترقیاتی یانیده عایلهلرگه هم کوپینچه یاردم بیرهدی.»
باشقه بیرتاماندن، بلخ ده تاووق گوشتی ساتهدیگنلردن قطارینینگ ایتیشیچه، بو ولایتده جوجه ییتیشتیریش کارخانهلری آچیلگنی و فعالیتی کوچهیگنی بیلن، بازار وضعیتی یخشیراق بولیب و حاضر تاووق گوشتی قیمتی کمهیگن.
مزارشریف شهریدهگی تاووق گوشتی ساتهدیگنلردن شفیقاللهنینگ ایتیشیچه: «بوندن آلدین آچیلگن فارملر و حاضر قوریلگن فارملر، تاووق گوشتی قیمتیگه کوپ تاثیری بار. پاکستان دن تاووق گوشتی کیلسین دیب قرهب اولتیرگنیمیز پیتده، بیر کیلو تاووق گوشنینینگ قیمتی ۳۰۰ افغانیدن آشیشی ممکن ایدی، لیکن حاضر ایسه بو شهرده بیر کیلو تاووق گوشتی ۲۲۰ افغانی دیر.»
شوندهی بیرحالده، جوجه ییتیشتیریش کارخانهلر مسئوللرینینگ اورغولشیچه، باشقه مملکتلردن گوشت و جوجه کیلتیریلیشی آلدی آلینگنی صورتده، بلخ ولایتی نیازلرینی تامینلش یانیده، باشقه ولایتلر نیازلرینی هم تامینلشلری ممکن. بلخ دهگی کارخانهلردن بیرینینگ مسئولی نجیبالله ملگرینینگ ایتیشیچه: «اوشبو تولیدی جوجهلر شرقی ولایتلر آرقهلی طلب بولگن و اوندن کیین، بلخ و سمنگان ولایتلریگه هم تولید قیلهمیز. اهالینینگ ایستهک میزانی بیراز تامینلنگن. حکومتدن پاکستان و باشقه مملکتلردن تاووق گوشتی وارد بولیشی آلدی آلینیشینی سورهیمیز.»
باشقه بیرتاماندن، بلخ سودا و صناعت ریاستی مسئوللری، ایچکی سرمایه یاتقیزووچیلرنینگ قوللب-قوتلنیشیگه تاکیدلب و ایتیشلریچه، بو رقم سرمایه یاتقیزیلیشلر ایچکی تولید ظرفیتینی آشیریش، آزیق-آوقت محصوللری برقرار تامینلنیشی، واردات گه تیگیشلی بولیشنی کمهیتیریش، قیمتلر ثباتی و مملکت اقتصادی کوچلنیشیگه سبب بولهدی.
بلخ سودا و صناعت ریاستی اورینباسری نصیراحمد نیازنینگ سلاموطندار گه ایتیشیچه: «بو ریاست تیگیشلی نهادلر بیلن هماهنگلیکده، جواز بیریش، ایچکی تولیدلردن حمایت قیلیش، سرمایه یاتقیزووچیلرنی تشویق قیلیش و مناسب اداری و قانونی امکانیتلرنی یرهتیش جریانیده آسایشتهلیک کیلتیریشی توغریسیده ایچکی سرمایه یاتقیزووچیلرنی قوللب-قوتلهیدی. چونکه بیزلر صناعتی پارکلرده مناسب ییر یرهتیلیشی، اداری و قانونی آسایشتهلیکلر یرهتیلیشی، انرژی و آستقورمهلردن فایدهلنیش امکانیتی یرهتیلیشی، سرمایه یاتقیزووچیلرنی تشویق و ساتیش بازاردن حمایت قیلیش بیلن، بو کبی کارخانهلرنینگ کوچهیتیره آلهمیز.»
بلخ ده جوجه ییتیشتیریش آلتی کارخانهنینگ فعال بولگنی بیرحالده، ینه هم افغانستان گه اوزبیکستان و ایران دن جوجه و تاووق گوشتی کیلتیریلهدی؛ امید بیرووچی بو جریان دولت و سرمایه یاتقیزووچیلرنینگ حمایتی یانیده، تاووق صناعتی و مملکت بازارلریده گوشت قیمتی بیللی بولیشیده خودکفالیک اوچون مهم آدیم بوله آلهدی.
