ییللر دوامیده میکروفون آرقهلی اهالی بیلن گپلشگن آواز، ایندی اوچدی؛ سلاموطندارنینگ سابق خبرچیسی، دستور تیارلاوچیسی و نطاقی صوفیا محمدزی، قریب آلتی ییل سرطان کسللیگی بیلن کورهشیشدن کیین وفات قیلدی.
میلادی ۱۹۹۳-ییل کابل ده دنیا گه کیلگن صوفیا محمدزی، بالهلیک چاغیدن ییتکرمه دنیاسیگه قیزیققن ایکن که بو قیزیقیش، کیین اونینگ ییتکرمهده بیر دههدن کوپراق مسلکی فعالیت قیلیشیگه سبب بولگن. او، سلاموطندار رادیوسی، دولتی ادارهلردن قطاری و باشقه بیر قطار ییتکرمهلرده ایشلب و ییتکرمهده ایشلش آرقهلی اهالی سیسی بولیشگه سعیوحرکت قیلگن.
سلاموطندار رادیوسیده پشتو تیلیده خبرلرنی اوقیب و تورلی برنامهلرنی عملگه آشیرگن صوفیانینگ سیسی، ییللر افغانستاننینگ تورلی ولایتلریدهگی یشاوچیلر اوچون تانیش ایدی. قریب آلتی ییلدن بویان سرطان کسللیگی حیاتینینگ بیر بولیمینی قمرهب آلدی. بو کسللیک ییتکرمهلرده حضور تاپیش امکانیتینی چیکلنتیرسهده، لیکن ینه هم معلومات ییتکزیش و ایشلشگه قیزیقیشی اوچمهدی.
سلاموطندار رادیوسینینگ پشتو بولیمی مسئولی عبدالرحیم عاصم، صوفیا بیلن نیچه ییل همکار بولگن ییللری توغریسیده شوندهی دیدی: «صوفیا تورلی بولیم جملهدن ترجمه و نطاقلیکده ایشلهگن. اونینگ وفات قیلیش خبرینی ایشیتیش بیلن جودهیم قیغولندیم. صوفیا جودهیک لایق، جسور و یخشی بیر عیال ایدی. او هر قندهی بیر وضعیتده، بوینیگه بولگن مسئولیتنینگ درست شکلده عملگه آشیریش اوچون تلاش قیلهر ایدی.»
صوفیا محمدزی ایشداشلرینینگ ایتیشلریچه، کسللیک قیینچیلیکلری بولگنی بیلن، ییتکرمه ایشیدن اوزاق بولمهی و کوچی ییتیشگونگه قدر، بوتوغریده فعالیتگه دوام بیرگن.
صوفیا محمدزینینگ ایشداشلریدن بیری گزارشگر شریفه شهرادنینگ ایتیشیچه، او کسل بولگنی بیلن، ینه هم ایشیگه دوام بیرگن. «صوفیا متعهد و سعیوحرکت قیلهدیگن ایشداشلریمیزدن بیری ایدی. کسل بولگنی و قیین بیر کونلرنی اوتکزیش دورهسیده، ینه هم تورلی بولیملرده ییتکرمه ایشلریگه دوام بیردی، بیراق قیغو بیلن صوفیانینگ وفات قیلگنی افغانستان ییتکرمه عایلهسی اوچون قیغولنتیرووچی دیر.»
صوفیانینگ سلاموطندارده ییللر دوامیده آلیب بارگن فعالیتی، اونی ایشداشلری آرهسیده تانیش و اونوتیلمس بیر سیما گه اَیلنتیرگن.
سلاموطندارنینگ سابق خبرچیسی و صوفیا محمدزینینگ ایشداشلریدن داوودشاه مل، اونینگ بیلن قریب بیر دهه همکارلیکنی یادلهیدی. اونینگ ایتیشیچه، صوفیا ییللر بو ییتکرمهنینگ تورلی بولیملریده فعالیت قیلیب، تعهد، مسلکی مهارت و همکارلری بیلن یخشی یاندهشوو آرقهلی اوزیدن یخشی خاطرهلرنی قالدیرگن. «صوفیا قریب بیر دهه بیزلر بیلن ایشلهگن ایدی. او سلاموطندارده تورلی بولیمده ایشلهدی. جودهیم مسلکی و یخشی بیر عیال ایدی. هر بیر مسئولیت بوینیگه قوییلسه، مسئولیتینی درست بیر شکلده عملگه آشیرهر ایدی. شونینگدیک برچه ایشداشلری بیلن یاندهشووی یخشی و نیک ایدی. مسلکیده جودهیم لایق بیری ایدی.»
صوفیا محمدزی، ۱۴۰۵-ییل ۲۱-اسد، ییللر سرطان کسللیگی بیلن کورهشیشدن کیین کابلنینگ کسلخانهلریدن بیریده وفات قیلدی؛ لیکن ییللر اهالی بیلن میکروفون آرقهلی گپلشگن سیس، حاضرگچه رادیو آرشیفی و ایشداشلرینینگ خاطرهلریده ییشیتیلماقده.
