فاریاب ولایتی شیرین‌تگاب تومنی یشاوچیلریدن قطاری، اوشبو تومن نینگ ۲۰ اورینلی کسل‌خانه‌سیده کسللر اوچون نیاز بولگن دارولر یوقلیگی و طبی جهازلر کملیگیدن شکایت قیلیب و ایتیشلریچه، انه شوو سبب، کسللر قیین‌چیلیگی درست بیر شکلده حل بولمه‌یدی.
اولر نینگ کوپه‌یتیریشلریچه، اوتگن ۵ آی‌دن بویان اوشبو کسل‌خانه‌ده دارو قیین‌چیلیگی بار؛ بیراق حاضرگچه بو توغریده مسئوللر آرقه‌لی هیچ قنده‌ی توجه صورت تاپمه‌گن.
شیرین‌تگاب تومنی‌ده‌گی کسل‌خانه گه تازه توغیلگن باله‌سی بستری بولگن کیشیلردن بیری امان‌الله نینگ ایتیشیچه، اوشبو کسل‌خانه‌ده دارو و طبی جهازلر کم‌لیگی سبب، کسلی گه نیاز بولگن دارولر نی بازاردن تیارلب و طبی معاینه‌لردن قطارینی ایسه کسل‌خانه‌دن تشقی‌ده انجام بیره‌دی.
بیزلرنینگ «ایکس» ترماغی ده هم تعقیب قیلینگ!
اونینگ کوپه‌یتیریشیچه: «کیله‌میز شفاکار دارو یوق دیه‌دی، بیر تخته دارو تاپیلمه‌یدی، بو ییرده نسخه نی یازه‌دیلر و ۱۰۰۰ یا-ده ۱۰ مینگ هم بولسه تشقری‌دن آله‌میز. هر نرسه کیرهک بولسه تشقری‌دن ساتیب آله‌میز. بیر دستکش قیمتی ۲۰ افغانی لیکن بو کسل‌خانه‌ده اوشه هم یوق. بیزلر نیمه قیله‌یلیک.»
شونینگدیک مذکور کسل‌خانه گه باله‌سی نینگ دوالنیشی اوچون بارگن شکریه نینگ ایتیشیچه: «باله‌م سینه‌بغل بولگن، ایچی هم کیته‌دی و قیتره‌دی. اوتگن کون عصر چاغی دولت‌آباد دن کیلدیک و حاضرگچه کسلی‌میز بسترده. شفاکارلر یخشی معاینه قیله‌دی؛ بیراق دارو یوق که بیزلر گه بیرسه‌لر. دارو نی بازاردن ساتیب آله‌میز. کسل‌خانه‌ده دارو خلاص بولگن دیه‌دیلر.»
شونده‌ی بیرحالده، مذکور کسل‌خانه گه مراجعت قیلگنلردن باشقه بیری حکمت‌الله، شیرین‌تگاب تومنی نینگ ۲۰ اورینلی کسل‌خانه‌سیده کسللر نیازی بولگن دارولر و ساغلیق خذمتلر نینگ ارائه بولمسلیگی‌دن خواطر بیلدیریب و ایتیشیچه، بو کسل‌خانه گه مراجعت قیلگنلردن کوپ قطاری تومن‌لر یشاوچیلری و قشاق اهالی دیر که اقتصادی قیین‌چیلیکلر سبب کسل‌لری گه دارو ساتیب آلیش گه کوچلری ییتیشمه‌یدی.
او مسئوللردن اهالی قیین‌چیلیگی حلی اوچون بو توغریده جدی توجه قیلیشلری نی ایسته‌‌گن. «اهالی قیین‌چیلیگی حلی اوچون بو کسل‌خانه‌ده برچه شفاکارلر ایشله‌یدیلر؛ بیراق امکانیت، دارو و سیروم یوق. اهالی قیین‌چیلیگی حلی اوچون اسلام امیرلیگی حکومتی نینگ توجه قیلیشی کیرهک.»
باشقه بیر تاماندن شیرین‌تگاب تومنی نینگ ساغلیق کینگش باشلیغی غلام نبی، مذکور تومن ۲۰ اورینلی کسل‌خانه‌سی نینگ قیین‌چیلیگی نی قبول قیلیب و سلام‌وطندار گه ایتیشیچه، کونده اورته شکلده ۲۰۰-۵۰۰ کسل اوزاق و قوشنی تومن‌لردن بو کسل‌خانه گه مراجعت قیله‌دی؛ لیکن هیچ دارو یوق.
اونینگ کوپه‌یتیریشیچه، بو قیین‌چیلیک نی نیچه مرته فاریاب ساغلیق‌نی سقلش ریاستی مسئوللری و قراردادی دفتر مسئوللری بیلن شریک قیلگنلر؛ بیراق حاضرگچه هیچ قنده‌ی توجه بولمه‌گن. جناب نبی گه کوره: «تومنیمیز نینگ قیین‌چیلیگی کوپ دیر. اوچ تومن نی پوشش آستیده آلگن‌میز. دولت آباد، جمعه بازار و شیرین تگاب دن کسللر کیله‌دی و معاینه بوله‌دی. دیپو دارو یوقلیگی نی ایته‌دی. یالغیز بیزلر ایمس بلکیم فاریاب ولایتی بویلیب اوشبو دفتر اوچون قیین‌چیلیککه‌میز. مجبور اهالی و اوز قیی‌چیلیگی‌میز نی مرکز گه ییتیشتیریشیمیز کیرهک.»
شونده‌ی بیرحالده، فاریاب ساغلیق‌نی سقلش ریاستی سرپرستی مخدوم فضل‌هادی فاروق اوشبو ولایت تومن‌لریده‌گی ساغلیق مرکزلر و کسل‌خانه‌لرده قیین‌چیلیک بارلیگی نی تصدیق‌لب و ایتیشیچه، دارو و طبی جهازلر کم‌لیگی قیین‌چیلیگی، مذکور ولایت ساغلیق مرکزلریده اوتگن ییللردن بیری بار و اونینگ حل بولیشی اوچون سعی‌وحرکت نینگ دوامی بار.
مخدوم فضل‌هادی فاروق نینگ سلام‌وطندار گه ایتیشیچه: «یالغیز شیرین تگاب ایمس، بلکیم باشقه تومن‌لر هم دارو کم‌لیگی قیین‌چیلیگی بیلن روپه‌ره دیر. تطبیق قیلووچی دفترلر سوزلری نی عمل گه آشیرمه‌دیلر. دفترلر آرقه‌لی خذمتلر نینگ درست شکلده ارائه بولیشی و اهالی قیین‌چیلیگی حلی اوچون دفترلر گه باسیم کیلتیریش خصوصیده سعی‌وحرکت قیله‌میز.»
بیزلرنینگ فیسبوک صحیفه‌میزگه باش اورینگ!
شونینگدیک فاریاب ساغلیق‌نی سقلش باشلیغی نینگ ایتیشیچه، مذکور ولایت‌ده بیرلشگن ملتلر تشکیلاتی نینگ باله‌لردن حمایت قیلووچی صندیغی (یونیسف) برچه ساغلیق مرکزلرده ساغلیق بولیمی نی تمویل قیلووچیسی دیر؛ لیکن اولر نینگ یاردم‌لری ییترلی ایمس.
ایتیش کیرهک که، فاریاب ولایتی شیرین‌تگاب تومنی یشاوچیلری کسل‌خانه‌لر و ساغلیق مرکزلرده طبی جهازلر و دارو کم‌لیگی قیین‌چیلیگی گه علاوه، ایچیم‌لیک سوو یوقلیگی، یوللر بوزوق‌لیگی و شفاکارلر توجه‌سیزلیگی خصوصیده شکایت قیلیب و بو توغریده اهالی گه جدی شکلده توجه قره‌تیلیشی نی ایسته‌گنلر.
