خوفسیزلیک کینگشی، افغانستان ده بیرلشگن ملتلر تشکیلاتی اورینباسرلیک هیئت ادارهسی (یوناما) مأموریتی اوزهیتیریلیشی حقیده، ایرته ییغین اوتکزیشی ممکن.
یونامانینگ بوگون (۲۴-جوزا/۱۴-جون، یکشنبه)، اکس صحیفهسیده یازیشیچه، خوفسیزلیک کینگشینینگ آواز بیریلیش ییغینی ایرته کابل وقتی بیلن توشدن کیین ۰۶:۳۰ ده اوتکزیلهدی.
یوناما مأموریتی، عادی شکلده هر ییلی خوفسیزلیک کینگشی آرقهلی ۱۲ آیلیک بیر دورهگه اوزهیتیریلهدی؛ لیکن ۲۰۲۶-ییل مارچ آییده، کینگش اعضاسی آرهسیده فرقلی فکرلر اوشبو مأموریتنینگ عادی طرزده اوزهیتیریلیشیگه توسیق بولگن.
مذکور پیتده، چین و روسیه یوناما مأموریتینینگ بیر ییللیک اوزهیتیریلیشینی قوللب-قوتلهگن، بیراق امریکا بو نهاد فعالیتینی قیته کوریب چیقیلیشی و اونینگ مأموریتی اوزهیتیریلیش مدتی چیکلنیشینی طلب قیلگن ایدی.
مذکور اختلافلر نتیجهسیده، خوفسیزلیک کینگشی یوناما مأموریتینی بیر ییل اورنیده، یالغیز اوچ آی اوزهیتیرگن که بو مدت حاضر یکونلماقده و کینگش اعضالری ینه بیر مرته مذکور مأموریت کیلهجگی حقیده قرار آلیشلری ممکن.
یوناما ۲۰۰۲-ییلده فعالیتینی افغانستان ده باشلهب و خلقارا یادرملرنینگ هماهنگلیگی، سیاسی جریانلرنی قوللب-قوتلش، بشر حقوقی وضعیتینی نظارت قیلیش و ایچکی همده خلقارا نهادلر بیلن تعامل قیلیش مسئولیتینی بوینیگه آلگن.
