کابل شهری نینگ سرک‌لریده قول اوستیده سودا ساته‌دیگن عیاللر کوپه‌یشی، مملکت‌ده عیاللر آره‌سیده ایشسیزلیک سطحی یوقاری کیتیشی و قیین بیر وضعیت نی کورسته‌دی.
عیاللردن قطاری نینگ ایتیش‌لریچه، ایشسیزلیک کوپه‌یشی و سرپرست‌سیزلیک سبب، اولر قول اوستیده سودا ساتیش گه مجبور بولگنلر.
کابل شهری نینگ سرک‌لریده ماسک ساته‌دیگن معصومه نینگ ایتیشیچه، بو وضعیت‌دن قوتقریلیب و بیر ایش تاپیش اوچون نیچه مرته کابل بلدیه‌سی و باشقه نهاد‌لر گه مراجعت قیلگن، بیراق هیچ ایش تاپیلمه‌گن.
اونینگ کوپه‌یتیریشیچه، کونده ۱۰۰-۱۵۰ افغانی قولگه کیلتیره‌دی که، اوشبو پول بیلن یالغیز باله‌لری نینگ دستلبکی مصرف‌لری نی تامین قیله آله‌دی.
بیزلرنینگ فیسبوک صحیفه‌میزگه باش اورینگ!
اونگه کوره: «مجبورمین، ۵ ته نان اوچون بو ییر گه کیله‌من. قولگه کیلتیره‌دیگنیم پول بیلن نان آله‌من. باله‌لریم کیچیک، نهاد‌لردن یاردم بیریش‌لری نی ایسته‌یمن. سرک‌لرده ایشلش‌دن ۵ مینگ بیرگن‌لری صورت‌ده بیر ییرده ایشلش یخشی. ایش بیرگن‌لری صورت‌ده، تمیزچیلیک هم قیله‌من. نیچه مرته بلدیه گه کیتدیم ایش بیرینگلر دیب.»
شونینگدیک کابل شهری نینگ بیر چیککه‌سیده کراچی‌ده سوو ساتیب عایله خره‌جتینی تامین‌له‌یدیگن لیلما نینگ ایتیشیچه، هر بیر بوتل نینگ ساتیش بیلن، یالغیز ایکی افغانی فایده قیله‌دی که، اوشبو ایش آرقه‌لی عایله خره‌جتی نی تامین‌له‌یدی.
لیلما نینگ کوپه‌یتیریشیچه: «اوی‌ده ایشله‌یدیگن هیچ کیم یوق، سوو ساتیش گه مجبورمین. هر بیر بوتل سوو‌دن ۲ افغانی قاله‌دی. اوچ آی‌دن بیری اوی کرایه‌سی نی بیرگنیم یوق. ایکی ییل‌دن بیری سوو ساته‌من. بیر باله‌م آچلیک طفیلی توییب-آوقات‌لنمه‌سلیک کسل‌لیگی گه چلیندی. هیچ قنده‌ی یاردم بیریلمه‌گن. اوی‌میزده هیچ ایرکک یوق. ایرتنگ‌دن آخشم‌گچه ایشله‌یمن و هیچ کیم سوو هم آلمه‌یدی.»
قول اوستیده سودا ساته‌دیگن عیاللر، حکومت‌دن اوشبو وضعیت‌دن قوتقریلیش اوچون ایش زمینه‌سی یره‌تیلشی نی ایسته‌دیلر.
شونده‌ی بیرحالده، عیال حقوقی فعال‌لریدن قطاری نینگ ایتیش‌لریچه، اسلام امیر‌لیگی قول اوستیده سودا ساته‌دیگن عیاللر گه ایش زمینه‌سی یرهتیشی بیلن، شهر‌ده قول اوستیده سودا ساته‌دیگنلر سانی کوپیشی نینگ آلدی آلینیشی ممکن.
بو توغریده عیال حقوقی فعال‌لریدن حسنا روفی نینگ ایتیشیچه: «قول اوستیده سودا ساته‌دیگن عیاللر نینگ آلدی نی آلیش اوچون حکومت اولر گه ایش زمینه‌سی نی یرهتیشی کیره‌ک. عیاللر گه ایش زمینه‌سی یره‌تیلگنی صورت‌ده، سرک‌لرده هیچ بیر عیال و باله نینگ قول اوستیده سودا ساتمه‌یشی ممکن.»
باشقه بیر تامان‌دن، کابل بلدیه‌سی سوزلاوچیسی نعمت‌الله بارکزی نینگ ایتیشیچه، اولر قول اوستیده سودا ساته‌دیگنلر نینگ تنظیم بولیشی اوچون، کابینه فیصله‌سی اساسیده عمل قیلگنلر.
بیزلرنینگ فیسبوک صحیفه‌میزگه باش اورینگ!
اونینگ کوپه‌یتیریشیچه: «بو توغریده بلدیه اوز فعالیت‌لری نی انجام بیرگن. بیزلر گه جنسیت مطرح ایمس. قول اوستیده سودا ساته‌دیگنلردن برچه‌سی گه نظم خصوصیده قانونی مورد‌لر نی انجام بیردیک. کابل شهری نینگ منظم بیر شهر بولیشی کیره‌ک و کابل بلدیه‌سی کابینه فیصله‌سی اساسیده قول اوستیده سودا ساته‌دیگنلر نینگ منظم بولیشی خصوصیده ییترلی فعالیت‌لر نی انجام بیرگن.»
عین حالده، ایش و اجتماعی ایشلر وزیرلیگی نینگ نشرات آمری سمیع‌الله ابراهیمی نینگ ایتیشیچه، مذکور وزیرلیک اینگ یقین زمان‌ده، قول اوستیده سودا ساته‌دیگن عیاللر گه کسب و کار اورگتیش برنامه‌لری نینگ یولگه قویلیشی نی نظر گه آلگن دیر.
اونینگ کوپه‌یتیریشیچه: «ایش و اجتماعی ایشلر وزیرلیگی سرک‌لرده قول اوستیده سودا ساته‌دیگن عیاللر نی، کمیته آرقه‌لی توپله‌ب و اوشبو وزیرلیک بیر قطار برنامه‌لر اساسیده اولر گه کسب و کار اورگنیش‌لری اوچون درس بیریلیب و اونینگ تطبیق بولیشی بیلن، مذکور عیاللر قشاق‌لیک‌دن نجات تاپه‌دیلر.»
ایتیش کیره‌ک که، ایرکک‌لر کبی عیاللر هم قشاقلیک، کمبغل‌لیک و سرپرست‌سیزلیک سبب، سرک‌لرده قول اوستیده سودا ساتیب، عایله خره‌جتی نی تامین‌لش گه مجبور دیر.
