سمنگان ولایتی جهادیه مدرسه‌سیده اویوشتیریلگن پارتلش عاقبتیده ۴۰ دن آرتیق کیشی اولیب و یره‌لنیشی، ایچکی و خارجی مناسبت‌لر گه روپه‌ره بولگن. اوشبو پارتلش اوتگن کون توش نمازینی اوقیش چاغیده مذکور ولایت نینگ مرکزی ایبک شهری حدودلریده جایلشگن جهادیه مدرسه‌سیده یوز بیرگن.
سمنگان ولایتی کسلخانه باشلیغی سیدمحمدعثمان حمیدی نینگ سلام‌وطندار گه ایتیشیچه، مذکور پارتلش عاقبتیده ۱۹ کیشی هلاک بولیب و باشقه ۲۳ کیشی یره‌لنگن. اونینگ کوپه‌یتیریشیچه، اولگنلر و یره‌دارلر آره‌سیده باله‌لر هم شامل دیر.
ایچکی ایشلر وزیرلیگی سوزلاوچیسی عبدالنافع تکور، مذکور پارتلش عاقبتیده اوشبو مدرسه نینگ چمه‌سی ۱۰ اوقووچیسی هلاک بولگن و باشقه بیر قطاری ایسه یره‌لنگنینی ایتگن ایدی.
عبدالنافع تکور نینگ کوپه‌یتیریشیچه، کشفی و امنیتی کوچلر اوشبو «کیچیریب بولمس واقعه» عامللرینی قولگه آلیش مقصدیده سعی و حرکت قیلماقده‌لر.
بیزلرنینگ فیسبوک صحیفه‌میزگه باش اورینگ!
افغانستان اوچون امریکا ایلچیخانه‌سی نینگ شارژدافیری کرن دیکر، بوگون (پنجشنبه، ۱۰ قوس) اوز توییتری ده، مذکور هجوم نی قاره‌لب و اونی «وحشیلرچه» دیگن. او افغان باله‌لری محافظت بولیشینی سوره‌گن. «بیز قورقینچ‌نی فرزندلریمیز حیاتیدن چیقریشیمیز کیره‌ک.»
افغانستان خاتین قیزلری و انسان حقلری ایشلری بوییچه امریکا نینگ مخصوص نماینده‌سی رینا امیری، چهارشنبه کیچه، ۹ قوس، اوز توییتری ده سمنگان ولایتی نینگ مرکزی ایبک شهری ده جهادیه مدرسه‌سیده اویوشتیریلگن پارتلش‌نی «وحشیلرچه» دیگن.
اونگه کوره: «سمنگان ده اویوشتیریلگن وحشیلرچه هجوم، اونلب کیشی نینگ اولیب و یره‌لنیشیگه سبب بولدی، جوده هم اچینرلی دیر. باله‌لر گه قرشی بو گَل زوروانلیک، افغانستان کیله‌جگیگه هجوم قیلیش دیر و توخته‌تیلیشی کیره‌ک.»
افغانستان اوچون امریکا نینگ مخصوص نماینده‌سی توماس وست هم مذکور هجوم‌نی قاره له‌گن. کابل ده ایران ایلچیخانه‌سی اوز توییتری ده، بو هجوم‌نی قتیق شکلده محکوم قیلگن.
شونینگدیک خلق‌ارا کیچیریم تشکیلاتی، اوشبو هجوم گه مناسبت بیلدیریب ایتیشیچه، مذکور قانلی هجوم افغانستان خلقی نینگ دردلری همان دوام ایته‌یاتگنیدن دلالت بیره‌دی.
عین‌حالده، بیرلشگن ملت‌لر تشکیلاتی نینگ باله‌لردن حمایت قیلووچی صندیغی (یونیسف)، اوشبو هجوم گه مناسبت بیلدیریب، سمنگان ده‌گی واقعه دن دهشت گه توشگنینی بیلدیرگن. یونیسف گه کوره، مذکور پارتلش ده باله‌لر قربان بولگن، بیراق مذکور نهاد نینگ ایتیشیچه، قربان بولگن باله‌لر سانی معلوم قیلینمه‌گن.
یونیسف نینگ کوپه‌یتیریشیچه، اوشبو ییل نینگ بیرینچی یریمیده افغانستان بویلب کوپراق مدرسه‌لر و عالی درگاه‌لرده اویوشتیریلگن هجوم‌لرده، چمه‌سی ۲۸۸ باله اولیب و یره‌لنگن. یونیسف گه کوره، واقعه‌لر رقمی کوپ بولیشی ممکن.
بیرلشگن ملت‌لر تشکیلاتی نینگ باله‌لردن حمایت قیلووچی صندیغی، باله‌لر نشانگه آلینمسلیگینی طلب قیلگن. مذکور صندیغ نینگ ایتیشیچه، افغانستانده‌گی برچه تامان‌لر باله‌لر نینگ آمان قالیشی اوچون سعی و حرکت قیلیش‌لری کیره‌ک.
بیزلرنینگ توییترده هم تعقیب قیلینگ!
باشقه تاماندن، اسلام امیرلیگی باش وزیرلیگی نینگ سیاسی اورین باسری مولوی عبدالکبیر، ارگ نینگ توییتری ده ترقه‌لگن قیغوداشلیک پیامیده، مذکور پارتلش‌نی قتیق شکلده قاره‌لب، بو هجوم‌نی انسان قدریت‌لری و اسلام قاعده‌لری گه قرشی و «کیچیریب بولمس» جنایت دیگن.
اوشبو پیام ده یازیلیشیچه: «افغانستان خلقی و اسلام یاولری قرآن و سنت طلبه‌لرینی نشانگه آلیش بیلن، اسلام بیلن دشمن ایکنلیکلرینی اثباتله‌دیلر. اوشبو جنایت عامللری جواب‌سیز قالمسلیگیدن ایشانچ بیلدیره‌من.»
شونینگدیک افغانستان سابق دولت رهبری حامد کرزی، بیر بیانیه ترقه‌تیب اوشبو پارتلش نی قاره‌لب و اونی انسان و اسلام قدریت‌لری گه گه قرشی اته‌گن.
عین‌حالده، سابق دولت ملی یره‌ش عالی کینگش باشلیغی عبدالله عبدالله هم، فیسبوک صحیفه‌سیده بیر پیام ترقه‌تیب مذکور پارتلش‌نی قاره له‌گن. جناب عبدالله نینگ یازیشیچه، نماز اوقووچیلر، طلبه‌لر، دینی مدرسه‌لر، مسجدلر و عبادتخانه‌لر نشانگه آلینیشی، اسلام و انسان قدریت‌لری گه قرشی دیر.
مذکور پارتلش مسئولیتینی حاضرگچه هیچ کیم یا گروه تن آلمه‌گن.
