سمنگان ولایتی حضرتسلطان تومنیده، جاری قویاش ییل ۱۲-عقربده یوز بیرگن زلزلهدن جبرلنگن کیشیلردن قطاریگه کوره، حیاتنینگ دستلبکی امکانیتلریدن فایدهلنه آلمهی و کیچهوکوندوزنی کوپ قیینچیلیکلر بیلن اوتکزهدیلر.
اولرنینگ ایتیشلریچه، هوا ساووقلیگی و دایمی باشپنه گه ایگه بولمسلیک، اوزلری و بالهلرینینگ کسل بولیشیگه سبب بولگن.
حضرتسلطان تومنی یشاوچیسی بولمیش جمعهخاننینگ ایتیشیچه، بالهلری هوا ساووقلیگی طفیلی کسل بولگن. اونینگ کوپهیتیریشیچه: «بالهلریمیز یوتلهدی و زکام بولگنلر، چونکه هوا ساووق دیر. اوزیم هم کسل بولگنمین. کیچهدن ایرتنگگچه خیمه آستیدهمیز. ساووقنینگ چیدهش ممکن ایمس.»
حضرتسلطان تومنی یشاوچیلریدن باشقه بیری پشمگلنینگ ایتیشیچه، دوالنیش مرکزلرنینگ اوزاقلیگی اولر برابریدهگی قیینچیلیکلردن باشقه بیری دیر. «کلینیک منطقهمیزدن قریب ۳۰ کیلومتر اوزاق دیر و وضعیتی عاجل بولگن کسللرنینگ قیینچیلیکلرینی حل قیلیش قیین دیر.»
شونینگدیک حضرتسلطان تومنیده یوز بیرگن زلزلهدن جبرلنگن قدرتاللهنینگ ایتیشیچه، دوالنیش مرکزلریده بستر، دارو، شفاکار و طبی جهازلر کملیگی، دوالنیش خذمتلریگه سمنگان یشاوچیلرینینگ فایدهلنیشینی چیکلنتیرگن. «بالهلر و عیاللر کسل بولگن. کلینیککه بارگنیمیزده درست دارو بیرمهیدیلر؛ ییترلی پولیمیز هم یوق که شخصی شفاکار گه باریب و کسللریمیزنی دوالنتیرسهک.»
شوندهی بیرحالده، حضرتسلطان ولسوالی عبدالوکیل حقیارنینگ ایتیشیچه، دوالنیش خذمتلری بولیمیده اوشبو تومن یشاوچیلری قیینچیلیگی حل بولهدی. اونینگ کوپهیتیریشیچه: «زلزلهده خراب بولگن بولیملر، تومن مرکزی یقینیده جایلشگن و بو ییرده کلینیگیمیز بار و کیچهوکوندوز شفاکارلر اهالیگه خذمت کورستهدی؛ ساغلیق خذمتلریدن فایدهلنه آلمهیمیز؛ ایبک شهریگه هم یقینمیز و اهالی بو ییرده دوالنمسه، ولایتی کسلخانهگه یوبارهمیز.»
افغانستان تومنلری و اوزاق بولیملریده ستندرد ساغلیقنی سقلش خذمتلریدن فایدهلنیشنینگ چیکلنگنی و دوالنیش مرکزلری کملیگی، حاضر یشاوچیلر اینیقسه جبرلنهدیگن گروهلر برابریدهگی جدی قیینچیلیکلردن بیری دیر.
