مملکت شمالیده یوز بیرگن زلزله نتیجهسیده، سمنگان ولایتی حضرتسلطان تومنینینگ «کوکجر»، «علیخیل» و «غزنیگک» قیشلاقلریدهگی جبرلنگنلردن قطارینینگ ایتیشلریچه، بو واقعهدن قریب ایکی آی اوتگچ، حیاتنینگ دستلبکی امکانیتلریدن فایدهلنه آلمهیدیلر.
اولرنینگ کوپهیتیریشلریچه، خیمه کملیگی، آزیق-آوقت، یاقیلغی مادهلر و طبی خذمتلردن فایدهلنه آلمسلیک، جبرلنگن کیشیلرنینگ حیاتینی تهدید قیلهدی.
حضرتسلطان تومنی یشاوچیلریدن نیازگل، کوپینچه کیشینینگ انسانسیورلیک یاردملردن محروم قالگنینی بیان قیلیب و ایتیشیچه: «اهالیدن کوپ قطاری یاردمدن محروم قالگن و حاضرگچه هیچ یاردم قولگه کیلتیرمهگن. قیشلاغیمیزدهگی کیشیلردن یریمی یاردم قولگه کیلتیرمهگن. ایشسیزلیک دیر و قیش موسومی ییتیب کیلگن. نیازمند کیشیلرگه یاردم بیریلیشینی ایستهیمیز. برچه نرسهمیز بوزیلگن، نقدی یاردم بیریلسین که اوییمیزنی قیته قورهیلیک و آزیق-آوقت، خیمه و یاقیلغی ماده نیاز دیر.»
شونینگدیک اوشبو تومن یشاوچیلریدن باشقه بیری حشمتاللهنینگ ایتیشیچه، زلزلهدن کیین کوپینچه قیینچیلیک بیلن روپهره بولیب و انسانسیورلیک یاردملرگه محتاج دیر. «حاضرگچه بیزلرگه نقدی یاردم بیریلمهگن، بیر قطار کیشیگه خیمه ترقهتیلگن، بیراق بیزلرگه خیمه ییتیشمهدی. حاضر دیوارلری یاریلگن اویده حیات کیچیرهمیز. ایکی کیچهدن بیری یامغیر یاغهدی و بالهلریم کسل بولگن. اوییمیز اورتهدن کیتگن. بیزلرگه اوی قوریب بیریلیشینی ایستهیمیز. هیچ نرسهمیز یوق و بیزلرگه یاردم بیریلسین.»
حضرتسلطان تومنی «کوکجر» قیشلاغی یشاوچیلریدن اجمل، اهالینینگ نیازمندلیگی توغریسیده شوندهی دیدی: «قیش موسومی ییتیب کیلگن، باشپنه، آزیق-آوقت و باشقه بیر قطار نرسه گه نیاز بار. قار و یاغمیر یاغهدی و بیزلرگه یاردم بیریلیشی کیرهک.»
شوندهی بیرحالده، سمنگان ولایتی حضرتسلطان تومنیده محلی مسئوللرنینگ ایتیشلریچه، زلزله نتیجهسیده جبرلنگن عایلهلرگه، تورلی نهادلر آرقهلی یاردم بیریلگن. اوشبو تومن ولسوالی عبدالوکیل حقیارنینگ ایتیشیچه: «ادارهلردن کوپ قطاری اهالی گه یاردم بیردی. یاردملر خیمه، نقد پول، آزیق-آوقت و اوی اوسکونهلریدن عبارت ایدی. حاضر هم ادارهلردن قطاری سروی قیلگن و یاردملر حاضرگچه ترقهتیلمهگن. حکومت آرقهلی هم نقدی یاردم ترقهتیلگن. شهیدلر عایلهسیگه یوز مینگ افغانی و یرهلنگنلردن هر بیریگه ۵ مینگ افغانی یاردم بیریلدی. اویلری بوزیلگن کیشیلرگه هم سمنگان عالملر کینگشی رهبرلیگیگه کمیسیون تامانیدن پول ترقهتیلهدی.»
جاری قویاش ییل ۱۲-عقربده یوز بیرگن زلزله، اهالی گه کوپینچه جانی و مالی زیانلرنی ییتیشتیریش یانیده، اوچ مینگدن آرتیق یشش اوینی ویران قیلیب و عایلهلردن کوپ قطارینینگ جبرلنیش وضعیتیگه قرار بیرگن.
