۱۲-عقرب، کیچه کیچ قورون سمنگان ولایتی فیروزنخچیر تومنیده جایلشگن «قوشمحله» قیشلاغیده، بیرینچیده قورقینچ بیر سیس ایشیتیلیب و کیین ایسه زلزله یوز یوز بیرگن که بو واقعه، اهالی آسایشتهلیگینی نیچه ثانیه ایچیده بوزگن.
اوشبو قیشلاق یشاوچیسی بولمیش میرویس، اویقودن تیترهب اویغنگن؛ بیراق اویدن چیقیشدن آلدین تام قولهب و اوی فضاسی قرانغو بولیب قالگن. کوپینچه سعیوحرکت بیلن تاش-توپراق آستیدن اوزینی قوتقره آلگن میرویس، یان اوییده ایناغهسی بیلن جیینینینگ اوخلهگنی ایسیگه توشگن.
اونگه کوره، ویرانهلر آستیدن عایلهسینینگ ایکی اعضاسینی قوتقریش اوچون نیچه ثانیه ایچیده قورقینچ بیر جایگه اوزگرگن بیر اویگه بارگن. ۱۸ یاشر ایناغهسی و ۱۲ یاشر جیینینینگ سیسینی ایشیتگن میروس، بوش قول و هیچ بیر امکانیتی بولمسدن، اولرنینگ تاشلر و توپراقلر آستیدن چیقریش اوچون سعیوحرکت قیلگن، بیراق بو حرکتلر ۴۰ دقیقهگچه هم نتیجه بیرمهگن.
۴۰ دقیقه اوتگچ، اولرنی قوتقره آلگن میرویسنینگ ایتیشیچه: «ایناغهم ویرانهلر آستیده قالگن ایدی. یالغیز بیر سیس قولاغیم گه کیلهر ایدی، بیراق قیرگه بولگنینی بیلمس ایدیم. هیچ کیم یوق ایدی، چون برچه یشاوچی اوز یامان وضعیتی بیلن شغللنگن ایدی. ۲۰ دقیقهدن کیین سیس چیقمهدی. قوشنلر کیلیب یاردم بیردی و تاش و توپراقلرنی کوتاردیک و کیین ایاغی بیلیندی. اونی ویرانهلر آستیدن چیقردیک، ضعف قیلگن ایدی، خوشبختانه تیریک قالدی.»
گرچند میرویس اوچون اوشبو ایکی کیشینینگ ویرانهلر آستیدن تیریک چیقریش بیر معجزه کبی بولگن، لیکن اقتصادی قیینچیلیکلر سبب ایناغهسی بیلن جیینینینگ دوالنه آلمسلیک، اونینگ خواطرلنتیرگن. «بیرتهسی قتیق باش آغیریققه چلینگن و باشقه یر تهسی ایسه شانه قسمیدن زیان کورگن. هر کیچه آغریق سبب اوخله آلمهیدیلر. پولیمیز هم یوق که اولرنی کابل، مزارشریف یا-ده سمنگان آلیب بارسک. بو ایکی کیشی کسل دیر و اولر یانده بالهلریمیز هم کسل بولگن. دولت یا-ده موسسهلردن بولرنینگ دوالنیشی اوچون یاردم بیریشینی ایستهیمیز.»
یوز بیرگن زلزلهده میرویسنینگ ۱۲ یاشر یوسف اسملی جیینی، شانه قسمیدن یرهلهنیب و مذکور زلزلهدن نیچه هفته اوتگچ، حاضرگچه معاینه و دوالنیش اوچون هیچ بیر شفاکار گه آلیب باریلمهگن. آغریقلر ایچیده، ینه هم بالهلیک اویینلری بیلن شغللنگن یوسف، زلزله کیچهسینی یامان بیر خاطره عنوان قیلیب و ایتیشیچه: «زلزله بولگنیده برچه نرسه ویران بولدی، تام باشیمیز گه قولهب توشدی. جودهیم قورققن ایدیم و توپراق آستیده قالگن ایدیم. ابهم مینی قوتقردی و حاضر شانهم آغریدی و قولیم ایشلمهیدی.»
مملکت شمالیده یوز بیرگن ۶.۳ درجه ریشترلیک زلزلهده، میرویس و سمنگان ولایتی فیروزنخچیر تومنینینگ «قوش محله» قیشلاغی یشاوچیلریدن یوزلرچهسی، ساووق هواده حاضرگچه قیشلاقلری یقینیدهگی «بابه قره» منطقهسیده توپراقلی تاغلر اوستیده خیمه قوریب، حیات کیچیرماقدهلر.
شونینگدیک بابه قره منطقهسی چوللری، زلزلهدن جبرلنگنلر اوچون تینچ بیر جای بولمهی، ایچیملیک سوو یوقلیگی، ساغلیق خذمتلردن فایدهلنه آلمسلیک و باشپنهسیزلیک، بو محلده تیریکچیلیک قیلهدیگنلرنینگ تینچ بیر حیاتگه ایگه بولیشدن محروم قیلگن.
شوندهی بیرحالده، زلزلهدن جبرلنگن میرویسنینگ آتهسی عاشور، حیاتنینگ دستلبکی امکانیتلری و خذمتلردن فایدهلنه آلمسلیکلری و اولرگه یاردم ترقهتیلیشینی ایستهب و ایتیشیچه، قیش موسومی ییتب کیلماقده و زلزلهدن جبرلنگنلر جدی قیینچیلیکلر بیلن روپهره دیر. عاشور، حاضر خیمه آستیده حیات کیچیریشلرینی بیان قیلیب و کوپهیتیریشیچه: «بیزلرگه بیر باشپنه قوریب بیرسینلر. عایلهم بیلن بیرگه خیمهده حیات کیچیرهمیز. هوا جودهیم ساووق بولگن. سوویمیز هم یوق. اوزاق جایلردن باریب سوو آلیب کیلهدیلر.»
میرویس، کوپینچه سعیوحرکت بیلن عایله اعضاسینی ویرانهلر آستیدن قوتقره آلگن؛ لیکن حاضر ایسه اونینگ بیلن مذکور قیشلاقدهی ۵۰۰ دن آرتیق عایلهنینگ اویینی ویران قیلگن زلزلهدن قورقیش سبب جبری شکلده کوچ قیلیشگه مجبور بولگن.
