کابل شهرینینگ مکروریان کهنه منطقهسی بیر چیککهسیده، بیر دکان یانیده اولتیرگن؛ اوتکزگن قیینچیلیکلرینی ایجین توشگن پیشانهسیدن بیلیش ممکن. عمریدن ۱۲ ییلنی بنگیوار ماده استعمال قیلیش بیلن اوتکزگن ۳۴ یاشر هجرتالله، نیچه پیتدن بیری اعتیادنی ترک قیلیب و دوددن اوزاق بولگن بیر حیاتگه قیتگن.
او، آرام و حسرتدن توله بیر سیس بیلن بنگیوار ماده گه چلینگن پیتلریدهگی اچینرلی تجربهلری توغریسیده ایتیشیچه، بنگیوار ماده گه چلینگن بیر کیشینینگ حیاتی، یالغیز اونی استعمال قیلیش بیلن یکونلنمهیدی؛ بلکیم اونینگ حیاتیدهگی برچه اونملی نرسهلرینی هم اورتهدن کیتزهدی. «معتاد بولگن بیر کیشی، پولی نی قولدن بیرهدی. هر نرسهسینی قولدن بیرگنیده، اوغیرلماققه یا-ده چیقیندیلرنی ییغیشگه باشلهیدی.»
بنگیوار مادهگه چلینیش، هجرتاللهنینگ حیاتیگه جدی شکلده تاثیر قیلگن ایکن که او، ایش، عایله و دوستلرینی بیرته-بیرته قولدن بیرگن. «بنگیوار مادهگه چلینیشدن کیین، بیرینچیده ایشلهیدیگنیم موترنی قولدن بیردیم. عایلهمنی قولدن بیردم و دوستلریم اینیقسه یقین دوستمنی قولدن بیردیم. اولر میندن اوزاقلشدیلر و همهسیدن مهم اعتباریمنی قولدن بیردیم.»
هجرتاللهنینگ ایتیشیچه، نیچه ییل آلدین اسلام امیرلیگی کوچلری آرقهلی بنگیوار ماده استعمال قیلهدیگن کیشیلرنینگ ییغیلگنیدن سونگ، دوالنیش بیر مرکز گه انتقال بیریلیب، اوزینی اعتیاد زنجیرلریدن قوتقره آلگن. «فینکس کسلخانهسیگه بارگنیمده او ییرده بنگیوار ماده گه چلینگن تورت-بیش مینگ کیشی بستری ایدی. ساچلری یوق ایدی و برچهسی کل ایدی. شو رقم حالتلرنی کوردیم که اولر حتا قاوون و ترووز پوستلرینی ییهر ایدیلر. مین اوزیم هم شیرینلیکنی ساغینگن ایدیم. اسلام امیرلیگی کوچلری آرقهلی بو مرکز گه انتقال بیریلگنیمدن اوچ کون اوتگچ، عایلهم مینی کوریشگه کیلدی. اوچ آیدن کیین آغوش کمپیگه انتقال بیریلیب و او ییرده مسلک اورگندیم.»
حاضر، هجرتالله جمعیتگه قیتیب و اوز ایاغیده توختهش اوچون سعیوحرکت قیلهدی. عایله و یقینداشلری یاردمی بیلن، کابل شهرینینگ مکروریان کهنه منطقهسیده آزیق-آوقت ساتیلهدیگن بیر دکان آچگن. «کونده ۳۰۰ افغانی درآمدیم بار. حاضر اوقیب و تقدیرنامه آلگنیم مسلکده قشاقلیک سبب ایشله آلمهیمن. حاضر آزیق-آوقت ساتیلهدیگن بیر دکانیم بار و تینگریدن راضیمین.»
هجرتالله، عایلهلردن بنگیوار مادهگه چلینگن عایله اعضالری بیلن بیر مجرم ایمس، بلکیم بیر کسل صفتیده یاندهشیشلرینی ایستهگن. «روحی کسللیگی بولگن، ساغلیگینی قولدن بیریب و تنی ضعیف بولگن بیر کیشینی، بالهلری یا-ده ایناغهلری کبی قولیدن توتیب و اونی معتادلر کمپیگه آلیب بارسینلر. کسلخانه گه وضعیتینی سورهش اوچون بارسینلر.»
برچه قیینچیلیکلر بیلن اعتیاد ییللرینی اوتکزیب و ساغلام حیاتیگه قیتگن هجرتالله، دایمی ساغلام بولیب قایلشنی آرزو قیلهدی.
