قندوز ولایتی اوزاق تومنلر یشاوچیلریدن قطاری، تومنلریده الکترونیکی کیملیک ترقهتیلهدیگن مرکزلر یوقلیگی، کیملیک ترقهتیلیشینینگ کوپینچه وقت آلیشی و باریب-کیلیشنینگ کوپینچه خرهجت کوتاریشیدن شکایت قیلهدیلر.
مذکور یشاوچیلرنینگ کوپهیتیریشلریچه، بو قیینچیلیک اولرنی تحصیلی حجتنی قولگه کیلتیریش، سیمکارت آلیش و حتا ایشگه آلینیش شامل حیاتنینگ اساسی ایشلرینی بجریشده قیینچیلیک بیلن روپهره قیلگن.
قندوز ولایتی کلباد تومنی یشاوچیسی بولمیش احصارگلنینگ ایتیشیچه، بیر آی باریب-کیلیشدن کیین الکترونیکی کیملیک آلالگن. «الکترونیکی کیملیک آلیش اوچون قریب ایکی یریم یا-ده اوچ مینگ افغانیسی آزیق-آوقت و یول کرایهسیگه صرفلنگن. اوزاق منطقهلرده اهالی کوپ کیلهدی، یول خامه و یول کرایهسی کوپ دیر. دولتدن تومنلرده اهالیگه یقین بولگن مرکزلرنینگ آچیشلرینی ایستهیمیز که برچه کیشی کیملیک آلسه.»
باشقه بیر تاماندن، قندوز ولایتی آقتاش تومنی یشاوچیسی بولمیش جاویدنینگ ایتیشیچه، اوشبو تومنلرنینگ قندوز ولایتی مرکزیگچه قریب ۵۰ کیلومتر فاصلهسی بولیب، هر بیر مرته باریب-کیلیش قریب ۵۰۰ افغانی خرهجت کوتارهدی. «کیملیک آلیش اوچون ایکی مینگدن ایکی یریم مینگ افغانی صرفلهدیم. کیملیگیمیز بولمسه حتا بیر سیمکارت آلالمهیمیز. دولتدن قیشلاق اهالی اوچون قولیلیک یرهتیلیشینی ایستهیمیز.»
شونینگدیک مذکور ولایت امامصاحب تومنی یشاوچیلریدن نوروز، الکترونیکی کیملیک ترقهتیلیش خرهجتی یوقاری کیتگنیدن شکایت قیلیب و کوپهیتیریشیچه، اوشبو کیملیکلر خرهجتی ۵۰ یا-ده ۱۰۰ افغانیدن حاضر ۵۰۰ افغانیگه ییتیشگن. «بیر کیملیک آلیش قریب بیر یریم آی زمان آلهدی. کیملیک آلیش جریانیگه قولیلیک یرهتیلیشینی ایستهیمیز. بوندن آلدین ۵۰ یا-ده ۱۰۰ افغانی ایدی که حاضر ایسه ۵۰۰ افغانیگه آلهمیز. خرهجتنینگ کمهیشینی ایستهیمیز.»
قندوز ولایتی اوزاق تومنلر یشاوچیلری، مسئوللردن تیزلیککه ترقهتیلیش و خرهجتی کمهیشی بیلن، اهالینینگ الکترونیکی کیملیک خذمتلریدن قولی شکلده فایدهلنیش امکانیتی یرهتیلیشینی سورهگنلر.
قندوز احصائیه و معلومات باشلیغی فضلالله صافی، مذکور ولایت تومنلریده الکترونیکی کیملیک ترقهتیلهدیگن مرکزلر آچیلیشی اوچون اهالی ایستهکلری توغریسیده هیچ نرسه دیمهی، بیراق ایتیشیچه، حاضر ایسه مذکور ولایتده الکترونیکی کیملیک ترقهتیلهدیگن اوچ مرکزنینگ فعالیتی بار. «حاضر ایسه قندوز ولایتیده کیملیک ترقهتیلهدیگن اوچ مرکز فعال دیر. ایکیتهسی قندوز مرکزی و بیرتهسی ایسه خانآباد تومنیده دیر. شونینگدیک بعضا پاکستان و ایران دن قیتگن قاچقینلر سانی کوپلیگی و مراجعت قیلهدیگنلر گوجوملیگی اوچون قیینچیلیک اورته گه کیلهدی.»
جناب صافی، یقینده بو ولایت مرکزیده «آسانخذمت مرکزی» آچیلیشینی بیان قیلیب و کوپهیتیریشیچه، بو مرکز آچیلیشی خذمتلر کورسهتیلیشی جریانینینگ قولیلشتیریشی ممکن. اونگه کوره، تومنلرده بو کبی مرکزلر آچیلیشی شرایط و کیرهکلی امکانیتلر یرهتیلیشیگه نیازمند بولیب و کیلهجکده بو توغریده قرار آلینیشی ممکن.
اونینگ ایتیشیچه، قندوز ولایتیده هر کونی اورته شکلده ۳۰۰ دن ۳۵۰ کیشی الکترونیکی کیملیک آلیش اوچون مراجعت قیلیب و اولرگه ییترلی خذمتلر کورسهتیلهدی. قندوز احصائیه و معلومات ریاستی باشلیغیگه کوره، کیملیک آلهدیگن کیشیلر قیینچیلیگینینگ اصلی بولیمی، حجتلری مکمل بولمهگنی یا-ده آتلرینینگ توغری یازیلمهگنی بولیب و اونینگ تیگیشلی کمیتهلرده تیکشیریلشی کیرهک که انه شوو سبب، کیملیک ترقهتیلیشی جریانی کیچیکتیریلهدی.
قندوز ولایتی اوزاق تومنلر یشاوچیلرینینگ اورغولشیچه، اهالی حیات کیچیرهدیگن محل یقینیده کیملیک ترقهتیلهدیگن مرکزلر آچیلیشی، قیینچیلیکلرینینگ بویوک قسمینی حل قیلیشی ممکن.
