روسیه جمهور باشلیغی ولادیمیر پوتین، چین گه بارمسدن و اوشبو مملکت جمهور باشلیغی شی جینپینگ بیلن اوچرهشمسدن آلدین، مسکو و پکن اورتهسیدهگی تاباره رواجلنیب بارهیاتگن علاقهلر دنیاده «برقرارلشتیروچی کوچ» گه ایلنگنینی بیلدیردی. اونگه کوره، ایکی دولت خلقارا ترتیبنی قوللب-قوتلش و اوزارا همکارلیکنی کینگهیتیریش اوچون حرکت قیلماقده.
پوتین، بوگون (۲۹ ثور/۱۹ می، سهشنبه) چین گه ایکی کونلیک سفر قیلیشیدن آلدین ایتیشیچه، روسیه و چین باشقه مملکت گه قرشی اتفاق توزیشنی مقصد قیلمهگن. اونگه کوره، ایکی مملکت اورتهسیدهگی همکارلیک «دنیا بویلب صلح و فراوانلیک» اساسیگه قوریلگن.
او، مسکو و پکن خلقارا حقوق، بیرلشگن ملتلر تشکیلاتی نظامی همده شانگهای همکارلیک تشکیلاتی و بریکس کبی توزیلمهلردن دفاع قیلیش اوچون همکارلیک قیلهیاتگنینی تأکیدلهگن.
روسیه جمهور باشلیغی شونینگدیک، ایکی دولت اورتهسیدهگی مناسبتلر «مثلی کوریلمهگن درجه» گه ییتگنینی قوشیمچه قیلگن. اونگه کوره، تامانلر حاکمیت و ملی بیرلیکنی حمایه قیلیش کبی مسئلهلرده بیر-بیرینی قوللب-قوتلهیدی.
پوتین، سهشنبه کونی شام پیتی چین گه باریب و چهارشنبه کونی ایسه چین جمهور باشلیغی شی جینپینگ بیلن اوچرهشووی کوتیلهدی.
روسیه و چین سونگی ییللر اینیقسه اوکراین اوروشی باشلنگنی و مسکو گه قرشی غرب باسیملری آشیریلگنیدن کیین، اقتصادی و سیاسی همکارلیکلرینی کینگهیتیرگنلر.
