قندوز ایکینچیلیک، سووغاریش و چاروهچیلیک ریاستیده مسئوللرنینگ ایتیشلریچه، پول عوضیگه ایشلش برنامهسی بو ولایتنینگ بیش تومنیده عملگه آشیریلیب و بو یول آرقهلی، بیر مینگ ۴۹۰ کیشی گه درآمد قولگه کیلتیریش زمینهسی یرهتیلگن.
قندوز ایکینچیلیک، سووغاریش و چاروهچیلیک ریاستی ایکینچیلیک آمری صلاحالدین واحدیگه کوره، پول عوضیگه ایشلش برنامهسی اوشبو ولایتنینگ خانآباد، کلباد، دشتارچی، علیآباد و آقتاش تومنلریده عملگه آشیریلگن. اونینگ ایتیشیچه: «بو برنامهلر اهالی تامانیدن عملگه آشیریلهدی و ایکینچیلیک بولیمینی درست سقله آلیشیمیز اوچون بو برنامهلردن درست شکلده فایدهلنیشلری توغریسیده امید قیلهمیز.»
بیزلرنینگ «ایکس» ترماغی ده هم تعقیب قیلینگ!
قندوز ایکینچیلیک، سووغاریش و چاروهچیلیک ریاستیده مسئوللرنینگ ایتیشلریچه، مذکور ولایتده پول عوضیگه ایشلش برنامهسی عملگه آشیریلیشی، درآمد قولگه کیلتیریش زمینهسینی یرهتیش گه علاوه، سوو منبعلری باشقریلیشی، توپراق خراب بولیشی آلدی آلینیشی و ایکینچیلیک سکتوری رواجلنیشیده اونملی اورینگه ایگه دیر.
باشقه بیر تاماندن، پول عوضیگه ایشلش برنامهسیدن فایدهلنگن قندوز یشاوچیلریدن قطاریگه کوره، اوشبو برنامه گه شرکت قیلیش اقتصادی وضعیتلری یخشیلنیشیگه یاردم بیرگن.
قندوز یشاوچیسی بولمیش فوادنینگ ایتیشیچه، پول عوضیگه ایشلش برنامهسیگه شرکت قیلیش مهارتلرنی اورگهنیش و اقتصادی قیینچیلیگی حلی اوچون بیر فرصت یرهتگن. «ایش زمینهسی یرهتیلگنیگه علاوه، سوو و توپراقنی مدیریت قیلیش زمینهسیده مهارتلرنی اورگنه آلدیم که کیلهجکلردههم اولردن فایدهلنه آلهمن. ترینچلر و سوو توغانلرینی قازیش کبی بولیملرده هم ایشلهگنمین.»
قندوز یشاوچیلریدن باشقه بیری حمیداللهنینگ ایتیشیچه: «بو فرصت، تورلی ایشلرگه شرکت قیلیش و اقتصادی وضعیتیمیزنی یخشیلش توغریسیده یاردم بیردی.»
شونینگدیک قندوز ولایتی علیآباد تومنی یشاوچیسی نیکمحمد، پول عوضیگه ایشلش برنامهسیگه شرکت قیلیشدن کیین اقتصادی قیینچیلیکلریدن بیر قسمینی حل قیله آلگن. «بو ییرگه یامغیر یاغگنی ییل، ۱۰-۲۰ یشش اوی بوزیلهر ایدی؛ تاغ تامانیدن کیلهدیگن سوودن برچهسی ییر آستیگه کیتهدی و اونینگ فایدهسی بار.»
پول عوضیگه ایشلش برنامهسی، «قولمه قول» موسسهسی و بیرلشگن ملتلر تشکیلاتینینگ آزیق-آوقت و ایکینچیلیک تشکلاتی همکارلیگی بیلن قندوزده عملگه آشیریلگن. قولمه قول موسسهسینینگ ولایتی مسئولی سیدوحیدالله هدفمند گه کوره: «سوو منبعلری باشقریلیشی و ایشسیزلیک توغریسیدهگی جدی قیینچیلیکلر سبب، بو برنامه اوتکزیلگن؛ مذکور برنامه ایکینچیلیک رواجلنیشی، توپراق خراب بولیشی کمهیشی، ییر آستی سوولر ذخیره بولیشی و اورمانلر همده اوتلاقلر رواجلنیشیده ایجابی تاثیرلرگه ایگه دیر.»
بیزلرنینگ فیسبوک صحیفهمیزگه باش اورینگ!
قندوز ایکینچیلیک ایشلری بوییچه ایش بیلرمان محمدرفیع بهزادنینگ ایتیشیچه، بو کبی برنامهلرنینگ عملگه آشیریلیشی افغانستان ده قشاقلیک کمهیشیگه یاردم بیره آلهدی. اونینگ کوپهیتیریشیچه: «اوشبو لایحه کوپینچه کیشیگه ایش زمینهسینی یرهتگن برنامهلردن دیر؛ گرچند بو لایحه ایجابی تاثیرلرگه ایگه بولگن؛ لیکن بو لایحهنینگ دوام تاپیشی و کیلهجکده کوپینچه برنامهنینگ عملگه آشیریلیشیگه شاهد بولیش توغریسیده امیدوارمیز.»
قندوز ده پول عوضیگه ایشلش برنامهسی، بو ولایتنینگ بیر قطار منطقهلری سوو کملیگی، توپراق خراب بولیشی و یشاوچیلرینینگ ایش فرصتلری کملیگی بیلن روپهره بولگنی بیرحالده، عملگه آشیریلهدی.
