افغانستان و پاکستان اورتهسیده حربی توقنشوولردن سۉنگ، اوتگن هفته جمعه کوندن بیری تورخم، اسپینبولدک، دندپتان، غلامخان و انگور اده چېگره بندرلری سودا توارلری و ترانزیت یوزیگه یاپیلگن.
افغانستانلیک سوداگرلردن بیرقطاری اوشبو احوال دوامیدن شکایت قیلیب ایتیشلریچه، اوشبو مدت دوامیده محصولاتلری بوزیلیب و یوزلب میلیون دالر زیان کورگنلر.
سوداگر خالداحمد رحمانی شوندهی دیېدی: «افغانستان و پاکستان اورتهسیدهگی چېگره بندرلرنینگ یاپیلیشی آلیش-بیریش بیلن شغللنهیاتگن سوداگرلر گه کتته ضرر یېتکزدی اینیقسه واگه بندری یاپیلیشی نتیجهسیده میلیونلب دالر یوقاتیلدی، حاضر اوزوم و آلمه حاصلینی ییغیش فصلی – برچه ساووتکیچ امبارلر توله و یاپیق، شو سببلی ینگی میوهلر بوزیلماقده.»
اوشبو سوداگرلر گه کوره، افغانستاننینگ ترانزیتی سودا توارلرینی ایراننینگ بندر عباس و چابهار یونهلیشلری بیلن انتقال بیریش ممکن؛ بیراق بو یونهلیشلر اوزاق و خرهجتی کوپ دیر.
شو بیلن بیرگه، افغانستان و پاکستان سودا قۉشمه اتاق مسئوللری، حاضرگی کونده چېگره ایکی تامانیده یوزلب موتر یوکی بیلن بند قالگن، بو احوال دوام تاپگن حالده، ایکیله مملکت سودا و اقتصادیات ساحهسیده کتته ضرر کوریشی ممکن دیب آگاهلنتیرهدیلر.
اوشبو اتاقنینگ اجرائیه باشلیغی نقیبالله صافی سلاموطندار بیلن صحبتده شوندهی دیېدی: «افغانستان و پاکستان اورتهسیده سودا و ترانزیت اوچون فایدهلنیلهدیگن قریب بیشته یول حاضر یاپیق، بو اېسه هر ایکی تامانگه ضرر یېتکزهدی. پاکستاننینگ افغانستان آرقهلی مرکزی آسیا گه قیلینهدیگن صادراتی هم بوندن ضرر کوردی، چونکه اولرنینگ یوک ماشینهلری هم توختهب قالگن. هر ایکی تامانده جوده کوپ یوک ماشینهلری بند قالگن اینیقسه تیز بوزیلهدیگن تازه میوهلر و سبزهواتلر اېندیلیکده بوزیلماقده.»
اسلام امیرلیگی صناعت و سودا وزیرلیگی مسئوللری گه کوره، افغانستان و پاکستان اورتهسیدهگی چېگره بندرلری یاپیلیشی بیلن، افغانستانلیک سوداگرلر ایراننینگ بندر عباس و چابهار یونهلیشلریدن قوللنیب و بعضی مرکزی آسیا مملکتلری آرقهلی آلیش-بیریشلریگه دوام بیرهدی.
اوشبو وزیرلیک سۉزلاوچیسی آخندزاده عبدالسلام جواد گه کوره: «چېگره بندرلرنینگ یاپیلیشی هر ایکی مملکت سوداسیگه ضرر یېتکزهدی و بو ضرر ایکی تامان خلقی گه تأثیر قیلهدی. حاضرگی وقتده بیز سودانی باشقه یوللر آرقهلی عملگه آشیرماقدهمیز و هېچ قندهی معما یوزه گه کیلمسلیگی اوچون حرکت قیلهیپمیز. بیزنینگ سودا فعالیتیمیز بندر عباس، چابهار، تاجیکستان و اۉزبېکستان آرقهلی عملگه آشیریلماقده و بازارلرده هېچ قندهی محصولات تنقیصلیگی یوق.»
ینگیلیکده پاکستان عملدارلری، اوشبو مملکت و افغانستان اورتهسیده چېگره بندرلر یاپیلیشی بیلن ایکیله مملکت سوداگرلری میلیونلرچه دالر زیان کورگنلرینی ایتگن.
