اسرائیل باش وزیری بنیامین نتانیاهو، ایراننینگ باییتیلگن ۴۰۰ کیلوگرام اورانیوم سقلنهدیگن جاییدن خبری بارلیگی و بو حقده امریکا گه خبر بیرگنینی معلوم قیلدی.
نتانیاهو، ۶-میزان، یکشنبه کونی فاکسنیوز بیلن صحبتده بوندهی بیانات بیردی.
اسرائیل باش وزیری اوشبو صحبتیده، ایران گه دیپلماتیک و اقتصادی باسیملر دوام تاپیشیگه تأکیدلب و بو مملکت هستهای قورال گه قول تاپیشی اوچون رخصت بیریلمسلیگی کېرهک دیگن.
خلقارا اتمی انرژی آژانسینینگ معلوماتی اساسیده، ایران یاز موسمی باشیده تخمیناً ۶۰ فایزلیک تازهلیکه ایگه بولگن ۴۰۰ کیلوگرامدن آرتیق باییتیلگن اورانیومی بولگن. آژانس شونینگدیک، هستهای قورال ایشلب چیقریش اوچون اورانیوم ۹۰ فایزدن یوقاری درجهده باییتیش ضرور اېکنینی تأکیدلهگن. بیراق تهران اېسه هستهای قورال گه قول تاپیش یولیدهگی هر قندهی اورینیشنی رد ایتگن.
اوتگن ییل اسرائیل و امریکانینگ ایران هستهی سایتلری گه اویوشتیرگن هجومی آرتیدن، اوشبو مملکت تشقی ایشلر وزیری عباس عراقچی، بو باییتیلگن اورانیوم ذخیرهلری کومیلگنینی و تهران اېندی اوندن فایدهلنه آلمسلیگینی معلوم قیلگن اېدی.
