ایش و اجتماعی ایشلر وزیرلیگی، دولت، خصوصی سکتور، خلق‌ارا نهادلر، بیلیم یورت استادلری و دین عالملری نینگ اشتراکی و همکارلیگی بیلن، کابل شهری ده «ایش ملی کنفرانسی» آتیده ایکّی کون‌لیک ییغیلیش یولگه قویگن.
ایش و اجتماعی ایشلر وزیرلیگی مسئوللری گه کوره، مملکتده ایش‌سیزلر سانی کوپ‌لیگی و ایش‌سیزلیک عاملینی اشتراک اېتگنلر بیلن شریک قیلیش، بوتوغریده قرشی کوره‌ش و ایجابی اسلوب‌لر آرقه‌لی ایش فرصت‌لری یره‌تیلیشی اوچون ایجابی اسلوب‌لردن قوللنیش مقصدیده، بو کنفرانس نی یولگه قویگنلر.
اوشبو کنفرانس نینگ آچیلیش مراسمیده، اسلام امیرلیگی باش وزیری نینگ سیاسی اۉرین باسری محمد عبدالکبیر، مملکتده‌گی ایش‌سیزلیک افغانستانده اۉتگن اوروش‌لر و سابق دولت‌لر نینگ ناکام‌لیک میراثی دیب، بو معما حلی اوچون دنیا همجمعیت نینگ یاردم بیریشی کېره‌ک دیگن.
اونینگ کوپه‌یتیریشیچه: «ایش‌سیزلیک عامللری، سابق دولت‌لر نینگ ناکام ریجه‌لری دیر؛ بیراق اسلام امیرلیگی سۉنگی اوچ ییلده ایش‌سیزلیکنی کمه‌یتیریش اوچون ایجابی اقدام قیلگن، قۉشنی و خلیج مملکت‌لر بیلن ایشچی قبول قیلیش و اولر گه قانونی حجت بیریش اوچون کېلیشگن‌میز.»
بیزلرنینگ فیسبوک صحیفه‌میزگه باش اورینگ!
مذکور ییغیلیشده اسلام امیرلیگی باش وزیری نینگ سیاسی اۉرین باسری، دنیا همجمعیتدن بانکی و تجاری چېکلاو‌لرینی بیکار قیلیش‌لرینی اېسته‌گن.
بو مراسمده اسلام امیرلیگی تشقی ایشلر وزیرلیگی سرپرستی امیرخان متقی، افغانستانده‌گی ایش‌سیزلیک قۉشنی و غرب مملکت‌لری گه سلبی تأثیر قیلیشینی بیلدیریب، اولردن مملکت بویلب بو معما اساسی شکلده حل اېتیلیشی اوچون همکارلیک قیلیش‌لرینی اېسته‌گن.
اونینگ ایتیشیچه: «هم افغانستان و هم تشقی مملکت‌لر بوتوغریده مسئولیتی بار، ایش‌سیزلیک نینگ سلبی عاقبتی دنیا مملکت‌لری گه هم تأثیر قیله‌دی، دنیا همجمعیت بوتوغریده افغانستان بیلن همکارلیک قیلیشی درکار؛ افغانستانده بنگی‌وار ماده‌لر یوق اېتیلیشی بیلن بدیل اېکین و ایش فرصتی یره‌تیلیشی لازم.»
متقی نینگ کوپه‌یتیریشیچه، افغانستانده‌گی معمالر حل اېتیلیشی گه دایر دنیا همجمعیت نینگ مسئولیتی صفر، بیراق اېستک و بویروغ‌لری کوپ دیر.
بیزلرنینگ «ایکس» ترماغی ده هم تعقیب قیلینگ!
بیراق اوشبو ییغیلیشده خلق‌ارا ایش تشکیلاتی باشلیغی رامین بهزاد، افغانستانده ایش‌سیزلر سانینی کمه‌یتیریش اوچون بو تشکیلات نینگ همکارلیک قیلیشدن ایشانچ بیلدیریب، مملکتده ایش فرصت‌لری یره‌تیلیشی اوچون اېریم ریجه‌لرنی نظرگه آلگنلرینی معلوم قیله‌دی: «کیچیک و اۉرته تشبثات نی قۉللب-قوتلش اوچون بیرلشگن ملتلر تشکیلاتی همکارلیگی بیلن ایجابی برنامه‌لریمیز بار، اوشبو سعی-حرکت‌لر طفیلی سۉنگی ایکّی ییلده بیر میلیون ایش فرصت‌لرینی یره‌تگن‌میز و کیچیک و اۉرته ۴۰مینگ تشبثات نی مالی یا ده تخنیکی بولیمده یاردم بیریش گه اولگورگن‌میز.»
عین‌حالده، صناعت، سودا، ایکینچیلیک و چاروه‌چیلیک اداره‌لر نینگ مسئوللریدن بیرقطاری، بو اداره‌لرده ایش فرصت‌لری ظرفیتینی آشیریش موجود دیر بیراق بو ایش اوچون همکارلیک بولیشی کېره‌ک دیېدیلر.
صناعت و سودا وزیرلیگی سرپرستی نورالدین عزیزی نینگ ایتیشیچه: «خصوصی سکتوردن تولید ارزش‌لرینی یکونلنتیریب و کېین اېسه صادراتی‌میز بولیشی کېره‌ک، خام ماده پیشیریلیب و صادر بولسه، بونده‌ی حالده ایش فرصت‌لری هم یره‌تیله‌دی.»
ایش ملی کنفرانسینی آچیش مراسمیده، اسلام امیرلیگی نینگ باش وزیری محمدحسن آخوند یوللـه‌گن پیامیده، خلق‌ارا نهادلردن افغانستان ترقیاتی و ایش فرصت‌لری یره‌تیلیشی اوچون، بو مملکتده ایشلری یریم قالگن لایحه‌لر نینگ ایشلرینی قیته باشلش‌لرینی سۉره‌گن.
