پاکستان عالم‌لری جمعیت حزبی نینگ رهبری مولانا فضل‌الرحمان اوشبو مملکت دین عالم‌لریدن عبارت بیر هیئت ییتکچیلیگی ده، اسلام امیرلیگی نینگ تکلیفی گه بناً کابل گه سفر قیلیب و اسلام امیرلیگی رسمی‌لری بیلن اوچره‌شووی کوتیله‌دی.
اوتگن کون مولانا فضل‌الرحمان آزادلیک رادیوسی بیلن اوتکزگن صحبتیده، اسلام امیرلیگی رهبری بیلن اوچره‌شووینی ایتگن ایدی، باشقه تاماندن پاکستان ییتکیرمه‌لری اوشبو مملکت نینگ سیاسی و مذهبی سیماسی نینگ یقین‌لریدن نقل قیلیب، پاکستان عالم‌لری جمعیت حزبی نینگ رهبری اوشبو سفری ده اسلام امیرلیگی رسمی‌لری بیلن تی‌تی‌پی مسئله‌سی حقیده بحث ایتیشینی ایتگن ایدی، بیراق سرپرست حکومت سوزلاوچیسی ذبیح‌الله مجاهد سلام‌وطندار بیلن اوتکزگن صحبتیده بو سوزلرنی تصدیق یا که رد قیلمه‌گن.
اسلام امیرلیگی سوزلاوچیسی ذبیح‌الله مجاهد، پاکستان‌لیک هیئت نینگ کابل گه سفری خصوصیده ایتیشیچه، مولانا فضل‌الرحمان اسلام امیرلیگی رسمی‌لری بیلن اوچره‌شووی ده ایریم مسئله‌لر حقیده بحث ایتیشی ممکن.
بیزلرنینگ فیسبوک صحیفه‌میزگه باش اورینگ!
ذبیح‌الله مجاهد نینگ سلام‌وطندار گه ایتیشیچه: «بوگون پاکستان عالم‌لری جمعیت حزبی نینگ باشلیغی مولانا فضل‌الرحمان، بیر هیئت ییتکچیلیگی ده کابل گه کیلیشی ممکن، سفری دایره‌سیده اسلام امیرلیگی رسمی‌لری بیلن ایریم موضوع‌لر نی بحث آلیشی کوتیله‌دی، انشاءالله اولر نینگ سفری ایکی مملکت و ایکی ملت اوچون اونیملی بولیشی ممکن.»
پاکستان ییتکیرمه‌لری مولانا فضل‌الرحمان دن نقل قیلیب ایتیشلریچه، پاکستان‌لیک سیاسی و مذهبی اوشبو سیما بو مملکت وقتینچه‌لیک حکومتی نینگ اویغون‌لیگی بیلن افغانستان گه سفر قیلیشی ممکن.
خلق‌ارا مناسبت‌لر ایش بیلرمانی بلال فاطمی گه کوره، مولانا فضل‌الرحمان پاکستان نینگ سیاسی منفعتی اوچون افغانستان گه سفر قیله‌دی، شونی اوچون افغانستان گه او نینگ سفرینی فایده‌سی یوق دیر. «اوتگن کون مولانا فضل‌الرحمان تشقی ایشلر وزیرلیگی گه چقیریلگندی و تشقی ایشلر وزیرلیگی آرقه‌لی پاکستان استخباراتی تامانیدن لازم موضوع‌لر شریک قیلیندی و سفری دایره‌سیده ایستلگن موضوع‌لر دن تشقری چیقمسلیگی ایتیلگن، شونی اوچون مولانا فضل‌الرحمان نینگ سفری پاکستان حکومتی نینگ پیامی دن باشقه نرسه ایمس دیر.»
بیزلرنینگ «ایکس» ترماغی ده هم تعقیب قیلینگ!
اوتگن هفته چهارشنبه کونی، قندهار حاکمی محمدشیر آخوند ییتکچیلیگی ده اسلام امیرلیگی هیئتی پاکستان گه سفر قیلگن بیرحالده، پاکستان عالم‌لر جمعیتی نینگ رهبری مولانا فضل‌الرحمان افغانستان گه سفر قیلیشی کوتیله‌دی.
خلق‌ارا مناسبت‌لر ایش بیلرمانی واحد فقیریار، اسلام امیرلیگی و پاکستان حکومتی آره‌سیده‌گی کیسکین‌لیکلر گه اشاره قیلیب ایتیشیچه، پاکستان حکومتی ایچکی سیاستی اوچون افغانستان بیلن قرشی‌لیکلری گه چیک قوییش آرتیده ایمس دیر.
او نینگ کوپه‌یتیریشیچه: «پاکستان حکومتی روپه‌ره بولگن ایچکی بحران‌لر جمله دن اقتصادی، سیاسی و خوفسیزلیک قیینچیلیک‌لر باعث، بو اولکه افغانستان بیلن مناسبت‌لرینی ناتینچ اسره‌ش آرتیده دیر. چونکه پاکستان حکومتی مذکور مملکت نینگ ایچکی بحران‌لرینی باشقه‌لر گه نسبت بیریشنی ایسته‌یدی بو مسئله اوچون افغانستان مناسب اولکه دیر.»
پاکستان رسمی‌لری، اوشبو مملکت ده‌گی ناتینچ‌لیکلر گه افغانستان فقرالری و اسلام امیرلیگی دخیل بولیشنی ادعا قیلگن بولسه ده، لیکن اسلام امیرلیگی بو ادعالر نی رد قیلگن.